1 ATEPTAP PEETUUSYEK 21 - BUKUIT NE TILIL

Koiiti Daudi bik, ak biret ne kibiitune koitonoto

¹ Ak king’eet Setani kogirinda Israel, ak kiigochi Daudi koiit Israel.

² Ak kilenji Daudi Joab ak bounikab bik, Oba, oiit Israel kong’eete Beer-seba agoi Dan; ak obwa omwawa, si anai koitenywa.

³ Ak kile Joab, Ingotes Jehovah bikyik konyil che te koitenywa bogol: ago, kiptaiyandennyu laitoriat, tugul ko ma otwogikab kiptaiyandennyu? Amu nee si komach kiptaiyandennyu kii? Amu nee si komachei inendet kong’eetyi tengekto Israel?

⁴ Ago kiiterter ng’olyotab laitoriat Joab. Kwo anyun Joab amu noto, kochut emet tugul ne bo Israel, agoi Jerusalem.

⁵ Ak kiigochi Joab Daudi kit ne te koitetab bik. Ak che bo Israel tugul ko ki elfut konyil elfut, ak murenik elfusiek bogol che ki bo rotokab chok: ak che bo Juda ko ki murenik elfusiek bogol ang’wan ak tamanwogik tisab che ki bo rotokab chok.

⁶ Ago ma kiitito Lawik ak Benjamin: amu kiek ng’olyotab laitoriat kit ne kiwechei eng’ Joab.

⁷ Ak ma cham Kamuktaindet kiito; kobir anyun Israel.

⁸ Ak kilenji Daudi Kamuktaindet, Kiayai tengekto ne o, amu kiayai kii: ago asomin ale, iste tengektab otwogindeng’ung’; amu kiayai eng’ berberindo ne o.

⁹ Ak kimwachi Jehovah Gad keerindetab Daudi, kolenji,

¹⁰ Ui mwachi Daudi ilenji, Kamwa Jehovah ko u ni kole, Kagonin tuguk somok; lewen agenge eng’ choto, si kobiit ayaun.

¹¹ Konyo anyun Gad ole mi Daudi, ak kolenji inendet, Kamwa Jehovah ko u ni kole, Lewen ne imache;

¹² kenyisiek somok che bo rubet; anan kobaratin buniguk arawek somok, koonotin rotwetab buniguk; anan ko betusiek somok che bo rotwetab Jehovah, noto ko koroitab ng’ony ne nyonei emet, ak kobarisiot malaikaiyatab Jehovah eng’ kiwotosiek tugul che bo Israel. Ibwat anyun nguno kit ne awoljini inendet ne koiyokwa.

¹³ Ak kilenji Daudi Gad, Ami eng’ bichiindo ne o: ngabutyi eutab Jehovah; amu eechen mising’ rirenosiekyik: ameng’ abutyi eutab chi.

¹⁴ Koyokyi Jehovah anyun koroitab ng’ony Israel: ak kibek murenik elfusiek tamanwogik tisabu che bo Israel.

¹⁵ Ak kiiyokto Kamuktaindet malaikaiyat kwo kobar Jerusalem: ak ye ki negit kobar, kogeer Jehovah, ak kowal kabwatennyi agobo yaitionoto, ak kolenji malaikaiyat ne kibarisiei, Kagoyam; bagakte. Ak kitonone malaikaiyatab Jehovah ole negit ruanyut ne kiborse ne bo Ornan Jebusindet.

¹⁶ Ak kiyot met Daudi, ak kogeer malaikaiyatab Jehovah kotononi eng’ kwenutab ng’ony ak kipsengwet, kotinyei rotwetab chok ne kaging’us eng’ eunnyi, ak kong’werere Jerusalem. Kobutyi ng’ony anyun Daudi ak boisiek kotoore togochikwak ng’ony, kolaachi kuniok.

¹⁷ Ak kilenji Daudi Kamuktaindet, Koma ko ane ne kong’atei kiit bik? Anendet ne koayai tengekto ak ayai kit ne ya mising’; ago koyai nee kechirechu? Ee Jehovah, Kamuktaindennyu, asain ale, ingobira eung’ung’ ak gotab kwandanyu; ago mat kebir biguk eng’ koroito.

¹⁸ Kong’at anyun malaikaiyatab Jehovah Gad kolenji Daudi, Ui togoste, ak iteekyi Jehovah kaptisisiet eng’ ruanyut ne kiborse ne bo Ornan Jebusindet.

¹⁹ Kotogosta Daudi anyun eng’ ng’olyotab Gad, ne kamwa eng’ kainetab Jehovah.

²⁰ Kowelelgei Ornan, ak kogeer malaikaiyat; ak kiunygei werikyik ang’wanu che kimi ak inendet. Kiborei Ornan nganok.

²¹ Ak kingonyonei Daudi ole mi Ornan, kotobendo Ornan kogeer Daudi, kwo komanda eng’ ruanyunato kiborse, ak kong’uruk eng’ taitab Daudi kot kotiiny toget ng’ony.

²² Kolenji anyun Daudi Ornan, Kona komosita iborse, si ateekyi Jehovah kaptisisiet eng’ yuto: igona eng’ alyet ne yamegei: si kosis koroito, mata kobar bik.

²³ Ak kilenji Ornan Daudi, Ib, kobunjin, ak ingoyai kiptaiyandennyu laitoriat kit ne keerei kole mie: keero, agonin eik koek kagochinoik che kibeelei, ak agonin tuguk che kiborse koek kwenik, ak agonin nganok koek kagochinetab busiek; kagonin tugul.

²⁴ Ak kilenji laitoriat Daudi Ornan, Achicha; aale alyet ne yamegei iman: amu maibe king’ung’ak agochi Jehovah, anan agoite kagochinet ne kibeelei ne ma kial.

²⁵ Kogochi anyun Daudi Ornan sekelisiek bogol lo che bo tahabu ngegaman, koale oloto.

²⁶ Ak kiteekyi Daudi Jehovah kaptisisiet eng’ yoto, ak kiigoito kagochinoik che kibeelei ak kagochinoikab kalyet, ak kisa Jehovah; ak kiwolji inendet eng’ kipsengwet eng’ mat ne kichorjigei kaptisisiet ne bo kagochinet ne kibeelei.

²⁷ Ak king’at Jehovah malaikaiyat; ak kiger rotwennyi eng’ choget.

²⁸ Ak kingogeer anyun Daudi eng’ sainato kole kagowolji Jehovah inendet eng’ ruanyut ne kiborse ne bo Ornan Jebusindet, koeny kagochinoikyik eng’ yoto.

²⁹ Amu kimi eng’ betusiechoto gotab Jehovah ne kiteechei Musa eng’ ong’atet, komosta ne toror eng’ Gibeon, koboto kaptisisietab kagochinet ne kibeelei.

³⁰ Ago kima imuch Daudi kwo taitab kaptisisionoto kwo koteepse Kamuktaindet: amu kiiyweisiei amu rotwetab chok ne bo malaikaiyatab Jehovah.