1 ATEPTAP PEETUUSYEK 20 - BUKUIT NE TILIL

Kiterteri Amonik

¹ Ak kingogesgei kenyit, eng’ betusiek che kicham kobendi laitorinik luget, komut Joab nyigonikab luget, ak kong’em emetab lagokab Amon, ak kobwa koyiem Raba. Ago kitebi Daudi eng’ Jerusalem. Ak kibar Joab Raba, kowong’.

² Ak kiinem Daudi narietab laitoriandenywa eng’ metinnyi, ak kigeer kole yamegei ak talentait agenge ne bo tahabu, ak kimi koik che bo kamanutiet ne o eng’ orit; ak kigigerjine metit Daudi; ak kiib barunenik che chang’ kot che bo nganaset komong’.

³ Ak kiimut bik che kimi nganaset komong’, ak komurmure musumenosiek, ak karik che kiburburene mbarenik, ak aonok. Ak kiyachi Daudi ko u noto nganasok tugul che bo lagokab Amon. Ak kiweek Daudi ak bik tugul koba Jerusalem.

Chito chemosit ne bo Pilistik

⁴ Ak kingobata nito, kong’eet borietab Pilistik eng’ Geser: kobar Sibekai Husatindet Sipai, ne bo werikab chito chemosit: ak kigiterter bichoto.

⁵ Ak kibiit kogeny luget ak Pilistik; ak kibar Elanan weritab Jair Lami ng’etab kametab Goliat Gitindet, ne ki kergei irumetab ndirinnyi ak ketit ne taachin usisiek chito ne nabisiei.

⁶ Ak kibiit luget kogeny eng’ Gat, ole kimi chito ne koi kot, ne kitinyei morik tiptem ak ang’wan, ki lo eng’ eut age tugul, ak ki lo eng’ keldo age tugul; ak kiga kisikyi agine chito chemosit.

⁷ Ak ye kingoreny inendet Israel, kobar Jonatan weritab Simea ng’etab kametab Daudi inendet.

⁸ Kigisikyi bichuto chito chemosit eng’ Gat; ak kibar Daudi ak otwogikyik bichoto.