1 ATEPTAP PEETUUSYEK 18 - BUKUIT NE TILIL

Lugosiekab Daudi ak boukying

¹ Ak kingobata nito, kobar Daudi Pilistik, ak koterter ichek, ak konam Gat ak nganasokyik koreb eng’ eunekab Pilistik.

² Ak kobar Moab; ak kiek Moabik otwogikab Daudi, ak koib kagochinoik.

³ Ak kibar Daudi Hadareser laitoriatab Soba eng’ Hamat, ye kingowendi kogimiti bounatennyi eng’ ole negite ainetab Euprate.

⁴ Ak kirebe Daudi inendet karisiek elfut, ak murenik elfusiek tisab che kilanyei mbartanyisiek, ak elfusiek tiptem che kibunei kelyek; ak kieb Daudi kutung’oikab mbartanyisiek, ago kiituuch eng’ choto che yamei karisiek bogol.

⁵ Ak kingobwa Suriekab Damasko, kotoret Hadareser laitoriatab Soba, kobar Daudi bik elfusiek tiptem ak aeng’.

⁶ Kiinde anyun Daudi irimosiek Suria ne bo Damasko; ak kiek Suriek otwogikab Daudi, ak kiib kagochinoik. Ak kiigochi Jehovah Daudi katerteret eng’ komosta age tugul ne kiwa.

⁷ Ak kiib Daudi long’onikab tahabu che kitinyei otwogikab Hadareser, kobwa Jerusalem.

⁸ Ak kiib Daudi sugunonik che chang’ eng’ Tibat ak Kun, nganasokab Hadareser, che kiyae Solomon nyanjet ne bo sugunwet, ak tolochik, ak tuguk che bo sugunonik.

⁹ Ak kingogas Tou laitoriatab Hamat kole kogobar Daudi luget tugul ne bo Hadareser laitoriat ne bo Soba,

¹⁰ koyokto Hadoram werinnyi kwo oldab laitoriat Daudi, kwo kogat inendet, ak koberur, amu kiga bargei ak Hadareser ak kobar inendet; amu kibargei Hadareser ak Tou; ak kitinyei terenik alak tugul che bo tahabu ak feda ak sugunonik.

¹¹ Kiitabanji Daudi Jehovah tuguchuto agichek, koboto feda ak tahabu che kiibune bororiosiek tugul; eng’ Edom, ak eng’ Moab, ak eng’ lagokab Amon, ak eng’ Pilistik, ak eng’ Amalek.

¹² Kibar kogeny Abisai weritab Seruia bikab Edom eng’ Atebwetab Munyuk elfusiek taman ak sisiit.

¹³ Ak kiinde irimosiek Edom; ak kiek Edomik tugul otwogikab Daudi. Ak kiigoch Jehovah Daudi katerteret eng’ komosta age tugul ne kiwa.

¹⁴ Ak kilaitoran Daudi eng’ Israel tugul; ak kiiruokyi bikyik tugul eng’ lititindo ak iman.

¹⁵ Ak kibou Joab weritab Seruia luget; ak ki sirindetab tuguk che biitu Jeosapat weritab Ailud.

¹⁶ Ak ki tisiik Sadok weritab Aitub, ak Abimelek weritab Abiatar; ak ki sirindet Sabsa;

¹⁷ ak kibou Benaia weritab Jeoiada Keretik ak Peletik; ak ki che eechen werikab Daudi che kitebe ye negite laitoriat.