1 ATEPTAP PEETUUSYEK 17 - BUKUIT NE TILIL

Kogirindoi Natan magetab Daudi ne kimachei koteech hekalut

¹ Ak ye kimenyei Daudi gonnyi, kolenji Daudi maotiot Natan, Keero, amenye gotab ketikab taragonik, ago menyei moingetab arorutietab Jehovah angok orit.

² Ak kilenji Natan Daudi, Yai tuguk tugul che mi muguleldang’ung’; amu mi Jehovah koboten.

³ Ak eng’ kemounoto konyonji ng’olyotab Kamuktaindet Natan kolenji,

⁴ Ui ilenji Daudi otwogindennyu, Kamwa Jehovah ko u ni kole, Meteekwa got ne amenye:

⁵ amu tom ameny got koboch betut ne kiamutu Israel kotogos, agoi ra; kobate kiawendote emait, ak got ne kituiyechin.

⁶ Eng’ komoswek tugul che kiawendote koboto Israel, ko tos kiamwachi ng’olyo age eng’ kiruogikab Israel, che kiang’at kobai bikyuk, alenji, Amu nee si moteekwa got ne bo taragonik?

⁷ Noto anyun imwachini otwogindennyu Daudi ilenjini, Kamwa Jehovah ne bo lugosiek ko u ni kole, Kiamutun eng’ biutab kechirek, ye kiisuboti kechirek, si iegu bounindet eng’ bikyuk Israel:

⁸ ak kiatebi koboten eng’ komosta age tugul ne kiiwe, ak kiaiste buniguk eng’ taing’ung’; ak ayaun kainet ne u kainaikab bik che eechen che mi ng’ony.

⁹ Ak alewenjini oldo bikyuk Israel, ak amine ichek, si kobiit komeny oldanywa, ama kiutoi kogeny; anan kota kobar ichek lagokab yaitiet kogeny, ko u tai.

¹⁰ Ak koboch betut ne kiang’ate kiruogik koboi bikyuk Israel. Ak aterteri buniguk tugul. Kogeny amwaun ale teegun Jehovah got.

¹¹ Ak ye igesgei betusieguk si iwe ole mi kwanisieguk, alumde iyoteng’ung’, ne bo weriguk; ak agimit bounatennyi.

¹² Teekwa inendet got, ak agimiti ng’echerennyi ne bo laitornatet koigeny.

¹³ Aegu kwandanyi, ak koek werinnyu: ak maistoe inendet rirennyu, ko u ye kiaistoe inendet ne kiindounenen:

¹⁴ ago andoi inendet kotebe gonnyu ak kotebe bounatennyu koigeny: ak kigimiti ng’echerennyi ne bo laitornatet koigeny.

¹⁵ Kimwachi Natan Daudi ko u ng’alechuto tugul, ak ko u ng’ang’utioni tugul.

¹⁶ Yeityo kwo go laitoriat Daudi, ak kotebi eng’ taitab Jehovah; ak kole, A ng’o, ee Jehovah Kamuktaindet, ak nee gonnyu, kot imutwa agoi ra?

¹⁷ Ak kiek nito kit ne ming’in eng’ taing’ung’, ee Kamuktaindet, agoi kaing’alal agobo gotab otwogindeng’ung’ eng’ betusiek che chang’ che bwanei, ak kaiita eng’ koitetab chito ne bo torornatet, ee Jehovah Kamuktaindet.

¹⁸ Nee age ne ta komuchi Daudi komwaun agobo teegisto ne kiyachin otwogindeng’ung’? Amu ingen otwogindeng’ung’.

¹⁹ Ee Jehovah, kaiyai etunatoni tugul agobo otwogindeng’ung’, ak ko u muguleldang’ung’ inyege, si ibarte tuguchu eechen tugul konaak.

²⁰ Ee Jehovah, mami age ne ogerge, ama mi Kamuktaindet age kobatenen, ko u eng’ tugul che kigegas eng’ itikyok.

²¹ Ak ngoro bororiet ne kergei ak biguk Israel, che kiwa Kamuktaindet kotiakyigei koek bikyik, si iyachige kainet eng’ tuguk che eechen ak tuguk che bo kamuiset, ye kiion bororiosiek eng’ taitab biguk, che kiitiach eng’ Misri?

²² Amu kiiyai biguk Israel koek biguk koigeny; ak kiiegu inye Jehovah Kamuktaindenywa.

²³ Ara anyun, ee Jehovah, ingogimit koigeny ng’olyot ne kiimwa agobo otwogindeng’ung’ ak agobo gonnyi, ak iyai ko u ye kaimwa.

²⁴ Ak ingogimit kaineng’ung’, ak kotororit koigeny, kele, Jehovah ne bo lugosiek ko Kamuktaindetab Israel, inendet Kamuktaindet eng’ Israel: ak kigimiti gotab Daudi otwogindeng’ung’ eng’ taing’ung’.

²⁵ Amu kiing’ang’ji otwogindeng’ung’, ee Kamuktaindennyu, ile iteekyini inendet got: kanyiganit anyun otwogindeng’ung’ kosa eng’ taing’ung’.

²⁶ Ara anyun, ee Jehovah, i Kamuktaindet, kaiyomisyi otwogindeng’ung’ kii mie:

²⁷ ak nguno anyun, kebaibaitu iberur gotab otwogindeng’ung’, si kobiit koteb koigeny eng’ taing’ung’: amu kaiberur inye, ee Jehovah, ak iberurot koigeny.