1 ATEPTAP PEETUUSYEK 16 - BUKUIT NE TILIL

Tiendab Daudi ne bo kalosunet

¹ Kiib anyun moingetab Kamuktaindet, ak konde kwenutab emait ne kiga teekyi Daudi; ak kiigoito kagochinoik che kibeelei ak kagochinoikab kalyet eng’ taitab Kamuktaindet.

² Ak kingo kagoges Daudi kogoitoetab kagochinet ne kibeelei ak kagochinoikab kalyet, koberur bik eng’ kainetab Jehovah.

³ Ak kiigochi chi age tugul ne bo Israel, ne muren ak kwonyu, kiigochi chi age tugul makatiat, ak bendo kitigin, ak makatiatab sabibuk che yaamnyotin.

⁴ Ak kilewen alak eng’ Lawik kobois eng’ taitab moingetab Jehovah, ak koyai kabwatet, ak komwachin kongoi Jehovah Kamuktaindetab Israel, ak kolosu inendet:

⁵ ki ne o Asap, ak ki ne rubei Sekaria, Jeiel, Semiramot, Jehiel, Matitia, Eliab, Benaia, Obed-edom ak Jeiel, kobutei kibugandinik ak ketubosiek; ak kibirei Asap sanisiek che bo sugunonik, kocheiyo mising’;

⁶ ak kiguutei kotugul iriagok Benaia ak Jahasiel tisiik, eng’ taitab moingetab arorutietab Kamuktaindet.

⁷ Kong’at anyun Daudi eng’ betunoto, kigochi Jehovah kongoi korok, eng’ Asap ak tupchosiekyik.

⁸ Oweekyi kongoi Jehovah, oguur eng’ kainennyi; Ongonaak boisionikyik eng’ bik.

⁹ Otienji, otienji kalosunoik; Ong’alale boisionikyik che kikwong’e.

¹⁰ Olosunege kainennyi ne tilil: Ingoboiboitu mugulelwekab ichek che cheng’ei Jehovah.

¹¹ Ocheng’ Jehovah ak kimnatennyi; Ocheng’ togennyi kotugul.

¹² Obwat boisionikyik che kikwong’e che kigoyai; Kwong’utikyik, ak kiruogutikab kutinnyi;

¹³ Ee okwek, keswekab Israel kiboitiondennyi, Okwek lagokab Jakobo, chechik che kigelewen.

¹⁴ Inendet ko Jehovah Kamuktaindennyo: Mitei kiruogutikyik ng’ony komugul.

¹⁵ Obwat kayomisennyi koigeny, Ng’olyot ne king’atyi ibinwek elfut;

¹⁶ Arorutiet ne kiyai koboto Abraham, Ak kayosiennyi ne kiiyosiechi Isak;

¹⁷ Ak kiigimityi Jakobo noto koek ng’atutiet, Kiigimityi Israel koek kayomiset ne bo koigeny:

¹⁸ Kolenji, Agonin emetab Kanan, Koek kebebertab boroteng’ung’:

¹⁹ Ye kita ko o bik che ng’ering’; Ee, kio ng’ering’ mising’, ak kio toek eng’ oloto;

²⁰ Ak kibendat kobunot bororiet age agoi bororiet age, Ak kibun bounatet age koba oldab bik alak.

²¹ Kima chamji chi koyachi ichek ne ya; Ee, kiger kong’ laitorinik amu ichek;

²² Kole, Amat otwa chechuk che kigiil, Amoyachi ne ya maotikyuk.

²³ Otienji Jehovah, ng’ony komugul; Obarte yetunennyi eng’ betut agoi betut.

²⁴ Omwaite torornatennyi eng’ bororiosiek, Ak boisionikyik che kikwong’e eng’ bik tugul.

²⁵ Amu o Jehovah, nyolu kilos inendet mising’: Kanyol kiywei inendet kosiir cheptalelisiek tugul.

²⁶ Amu cheptalelisiek tugul che bo bik ko matilei kiy: Ago kiyaei Jehovah kipsengwetisiek.

²⁷ Mi tainnyi teegisto ak etunatet: Mi oldanyi kimnatet ak kagasetab ge.

²⁸ Ogochi Jehovah, okwek tilionutikab bik, Ogochi Jehovah torornatet ak kimnatet.

²⁹ Ogochi Jehovah torornatet ne nyoljin kainennyi: Oibu kagochinet, ak obwa tainnyi: Ogutung’ji Jehovah eng’ kororonindab tililindo.

³⁰ Botan eng’ tainnyi, ng’ony komugul: Kigigimit ng’ony si mang’eigei.

³¹ Ingogasgei kipsengwetisiek, ak ingobaibait ng’ony; Ingomwa eng’ bororiosiek, kole Laitorani Jehovah.

³² Ingomoror nyanjet, ak tuguk che nyiitat oloto; Ingogasgei mbarenik, koboto tugul che mi oloto;

³³ Si kotienso anyun eng’ boiboiyet ketik che mi osnet eng’ taitab Jehovah, Amu nyonei koruokyin ng’ony.

³⁴ Oweekyi Jehovah kongoi; amu mie inendet: Amu tebyei rirenennyi koigeny.

³⁵ Ak omwa ole, Soruech, ee Kamuktaindetab yetunennyo, Ak iyumech ak isoruech kemong’u eng’ bororiosiek, Si kobiit keweekyi kongoi kaineng’ung’ ne tilil, Ak kilosuge eng’ kalosuneng’ung’.

³⁶ Iberurot Jehovah, Kamuktaindetab Israel, Koboch koigeny agoi koigeny. Ak kimwa bik tugul kole, Amen, ak kolos Jehovah.

³⁷ Kobagach anyun eng’ yoto, eng’ taitab moingetab arorutietab Jehovah, Asap ak tupchosiekyik, si kobiit kobois eng’ taitab moinget betusiek tugul, ko u ye yamegei ak boisietab betut age tugul.

³⁸ Ak Obed-edom, koboto tupchosiekwak, bik tamanwogik lo ak sisiit; ak kobagach agine Obed-edom weritab Jedutun ak Hosa koek ribikab kurget:

³⁹ ak kobagach Sadok tisiindet ak tupchosiekyik tisiik, eng’ taitab gotab Jehovah eng’ komosta ne toror ne kimi Gibeon,

⁴⁰ si kogochin Jehovah kagochinoik che kibeelei eng’ kaptisisietab kagochinet ne kibeelei kotugul karon ak koskoleny, ko u tugul che kigisirji Ng’atutikab Jehovah, che king’atyi Israel;

⁴¹ ak kimi koboto ichek Heman ak Jedutun ak che kiga ng’et tugul che kigilewen, che kigimwa eng’ kainaikwak, koweekyi kongoi Jehovah, amu tebyei rirenennyi koigeny;

⁴² ak kimi koboto ichek Heman ak Jedutun che kitinyei iriagok ak sanisiek che bo sugunonik che kibirei, che bo ichek che birei kocheiyo mising’, ak tuguk che kibutei che bo tienwogikab Kamuktaindet: ak kotebe werikab Jedutun ormarich.

⁴³ Ak kiba bik tugul kwo chi tugul gonnyi: ak kiweek Daudi kwo koberur gonnyi.