1 ATEPTAP PEETUUSYEK 14 - BUKUIT NE TILIL

Koterteri Daudi Pilistik

¹ Ak kiiyokto Hiram laitoriatab Turo bik koba oldab Daudi, koipchi taragonik, ak koyokyi bik che waei koik, ak musogikab baoinik, koba koteekyi inendet got.

² Ak kinai Daudi kole kogogimit Jehovah inendet koek laitoriatab Israel, amu kigitoror bounatennyi, amu bikyik Israel.

³ Ak kiitun Daudi osotik alak eng’ Jerusalem: ak kisich Daudi werik che chang’ ak tibik che chang’.

⁴ Ak chu ko kainaikab lagok che kisichei eng’ Jerusalem; Samua, Sobab, Natan, ak Solomon;

⁵ ak Ibar, Elisua, ak Elpelet;

⁶ ak Noga, Nepeg, ak Japia;

⁷ ak Elisama, Beeliada, ak Elipelet.

⁸ Ak kingogas Pilistik kole, kogiil Daudi koek laitoriatab Israel tugul, kotogosta Pilistik koba kocheng’ Daudi: ak kigas Daudi ak kwo kobargei ak ichek.

⁹ Kiga kobwa Pilistik kobokyi atebwetab Repaim.

¹⁰ Ak kiteebe Daudi Kamuktaindet kolenji, Atogoste awe kebarge ak Pilistik? Ak tos, inde eunnyu ichek? Ak kilenji Jehovah, Togoste, amu andoi ichek eung’ung’.

¹¹ Kotogos anyun kobwa Baal-perasim, ak kibar Daudi ichek eng’ yoto; ak kile Daudi, Kagoiyesta Kamuktaindet bunikyuk eng’ eunnyu, ko u beek che iyestoi. Koguure anyun kainetab koronoto Baal-perasim.

¹² Ak kibagage oloto kanamonikwak; ak king’at Daudi, ak kigibeel eng’ mat.

¹³ Ak kita kobokyi kogeny atebwonoto Pilistik.

¹⁴ Ak kiteebe Daudi kogeny Kamuktaindet; ak kilenji Kamuktaindet inendet, Amat itogoste isub ichek: ui taban, si iche ichek eng’ ye itoorjingei ketikab logoek.

¹⁵ Ak ye igas cheetab banda eng’ ketichato bo logoek barak, iwe anyun obarge: amu kagondoenen Kamuktaindet kwo kobar lugetab Pilistik.

¹⁶ Ak kiyai Daudi ko u ye king’at Kamuktaindet inendet: ak kibar lugetab Pilistik koboch Gibeon agoi Geser.

¹⁷ Ak kiyom emotinwek tugul toogunatetab Daudi; ak kiigochi Jehovah bororiosiek tugul koiywei inendet.