1 ATEPTAP PEETUUSYEK 12 - BUKUIT NE TILIL

Toretikab Daudi

¹ Chu ko che kibwa ole mi Daudi eng’ Siklag, ye kita kounyegei amu Saul weritab Kis: ak ki boto bik che kimen che ki toretikyik eng’ luget.

² Kitinyei kwangok, ak kiimuchi koboisie eutab tai ak eutab katam eng’ wirtaetab koik eng’ borowet ak eng’ mwoktoetab kipchabonik eng’ kwangok; ki bo tupchosiekab Saul ne bo Benjamin.

³ Ne o ko ki Aieser, korub Joas, werikab Semaa Gibeatindet; ak Jesiel, ak Pelet, werikab Asmabet; koboto Beraka, ak Jeu Anatotindet;

⁴ ak Ismaia Gibeonindet, chito ne kim eng’ bichoto sosom, ak kibou bichoto sosom; ak Jeremia, Jahasiel, Johanan, ak Josabad, Gederatindet;

⁵ Elusai, Jerimot, Bealia, Semaria, ak Sepatia Harupindet;

⁶ Elkana, Isia, Asarel, Joeser, ak Jasobeam, Koraik;

⁷ ak Joela, ak Sebadia, werikab Jeroam ne bo Gedor.

⁸ Ak kiitabangei che bo bikab Gad, koba ole mi Daudi, eng’ irimet eng’ ong’atet, murenik che kimen che nyigonen, murenik che kiginet, bik che kiimuchi konam long’onik ak ng’otwek; che ki u togochikwak togochikab ng’etunyik, ak kichepcheben ko u cheptirgichik che mi tulonok;

⁹ ki ne o Eser, ne bo aeng’ ko Obadia, ne bo somok ko Eliab;

¹⁰ ne bo ang’wan ko Mismana, ne bo mut ko Jeremia;

¹¹ ne bo lo ko Atai, ne bo tisab ko Eliel;

¹² ne bo sisiit ko Johanan, ne bo sogol ko Elsabad;

¹³ ne bo taman ko Jeremia, ne bo taman ak agenge ko Makbanai.

¹⁴ Chuto bo werikab Gad ko ki kiptainikab luget: ne ki ming’in eng’ ichek ko ki u bik bogol, ak ne ki o eng’ ichek ko ki u bik elfut.

¹⁵ Chu ko ichek che kiga landa eng’ Jordan eng’ arawet ne bo tai, ye kiga nyi beek kot koba timin eng’ ngegusiekyik tugul; koba koon bik tugul che ki bo atebwosiek, koba kong’asis, ak cherongo.

¹⁶ Ak kibwa che bo lagokab Benjamin ak che bo Juda irimet ole kimi Daudi.

¹⁷ Ak kimanda Daudi kotorokta ichek, ak komwachi ichek kolenji, Ngot obwanjina eng’ kalyet otoreta, konamegei muguleldanyu ak okwek: ago ngot ko kobwane ong’wekyina bunikyuk, ago mami yaitiet eunekyuk, ko ingogeer Kamuktaindetab kwanisiekyok kioto, ak koger kong’.

¹⁸ Konyonji anyun tamirmiriet Amasai, ne ki ne o eng’ bichoto sosom, ak kole, Ki cheguk, Daudi, ak kimi komostang’ung’, inye weritab Jesii: mi kalyet, ingoteb kalyet koboten, ak ingoteb kalyet koboto toretiguk; amu toretin Kamuktaindeng’ung’. Kotaach anyun Daudi ichek, ak koyai koek kiptainikab kweanet.

¹⁹ Kiba ole kimi Daudi agichek alak che bo Manase, ye kingobwa koboto Pilistik kobokyin Saul, ago ma toret bichoto icheget: amu kiiruoch kiptainikab Pilistik si koon inendet kole tun bagachech ak kwo konamgei ak Saul kiptaiyandennyi, si koek ng’oiyonditab sobonwekyok.

²⁰ Ak ye kiwendi Siklag, kobwa ole mi inendet che bo Manase, Adna, Josabad, Jediael, Mikael, Josabad, Eliu, ak Siletai, kiptainikab elfusiek che ki bo Manase.

²¹ Ak kitoret Daudi kobargei ak kweanaikab bik che kiiboktooti: amu tugul ko ki bik che kimen, che nyigonen, ak ko ki kiptainikab luget.

²² Amu kibwanei betut age tugul kotoreti Daudi, kot koek luget ne o, ne u lugetab Kamuktaindet.

²³ Chu ko koitetab kandoikab ichek che kiga ilaach karik che kiyae luget, che kiga bwa ole mi Daudi eng’ Hebron, kogochi inendet bounatetab Saul, ko u ng’olyotab Jehovah.

²⁴ Lagokab Juda che kitinyei long’onik ak ng’otwek ko ki elfusiek lo ak bogol sisiit, che kiga ilaach karik si koyae luget.

²⁵ Che bo lagokab Simeon, che kimen che nyigonen che bo luget ko ki elfusiek tisab ak bogol agenge.

²⁶ Che bo lagokab Lawi ko ki elfusiek ang’wan ak bogol lo.

²⁷ Ak ki kandoindet Jeoiada ne bo gotab Aron, ak kimi koboto inendet bik elfusiek somogu ak bogol tisab;

²⁸ ak Sadok, neranet ne ki kim ak ko nyigan, ak kiptainik tiptem ak aeng’ che bo gotab kwandanyi.

²⁹ Ak che bo lagokab Benjamin, tupchosiekab Saul ko ki elfusiek somok; amu kita konamegei kebeberta ne o ne bo bichoto ak gotab Saul agoi betunoto.

³⁰ Ak che bo lagokab Epraim, ko ki bik elfusiek tiptem ak sisiit, che kimen che nyigonen, bik che toogunotin eng’ gorikab kwanisiekwak.

³¹ Ak che bo kebebertab bororietab Manase, ko ki elfusiek taman ak sisiit che kiga kimwa eng’ kainaik, si kobwa koyai Daudi koek laitoriat.

³² Ak che bo lagokab Isakar, che kiiguitos agobo betusiek, che kiingen kit ne kanyol koyai Israel; ki bogol aeng’ kandoikwak; ak kigase it ichek tupchosiekwak tugul.

³³ Che bo Sebulun, che kiimuchi komanda koba luget, che kiimuchi kotet luget, eng’ karik alak tugul che bo luget; ak che kiimuchi kong’at luget, ago kima kotinyei muguleldo ne besiot aeng’.

³⁴ Ak che bo Naptali, ko ki kiptainik elfut agenge, ak kimi koboto icheget, bik elfusiek sosomu ak tisab che kitinyei long’onik ak ng’otwek.

³⁵ Ak che bo Danik, che kiimuchi kotet luget, ko ki elfusiek tiptem ak sisiit ak bogol lo.

³⁶ Ak che bo Aser, che kiimuchi komanda koba luget, che kiimuchi kotet luget, ko ki elfusiek artam.

³⁷ Ak eng’ bitonin eng’ Jordan, ne bo bikab Reuben, ak bikab Gad, ak ne bo kebebertab bororietab Manase, che kitinyei karik alak tugul che bo boriet che yaei luget, ko kimi bik elfusiek bogolu agenge ak tiptem.

³⁸ Kibwa Hebron chuto tugul eng’ muguleldo ne igesunotgei che icheget ko bikab luget, che kiimuchi kong’eet luget, koyai Daudi koek laitoriat koboi Israel tugul, ak bik tugul che king’et che bo Israel ko kitinyei maget agenge koyai Daudi koek laitoriat.

³⁹ Ak kitebi eng’ yoto ak Daudi betusiek somok, koamisiei ak koeeisei: amu kiga chopchi tuguk tupchosiekwak.

⁴⁰ Ak ichek che ki negite bichoto, koboch Isakar ak Sebulun ak Naptali, ko kiib amitwogik eng’ sigirok ak tambesik, ak eng’ nyumbusiek, ak eik, amitwogik che bo busiek, makatinik che bo mogoonik, ak temenik che mi logoek che bo sabibuk che yaamnyotin, divaik, mwanik, eik, ak kechirek che chang’: amu kimi boiboiyet Israel.