1 ATEPTAP PEETUUSYEK 11 - BUKUIT NE TILIL

Kieeti Daudi koek laitoriat

¹ Koyumjigei anyun Israel tugul ole mi Daudi eng’ Hebron, ak kolenji, Keero, ki koweguk ak ko ki banyeguk.

² Eng’ betusiek che kigosiirto, ye ki laitoriat Saul, ko ki inye ne kiimaandoi Israel ak imutu koweek: ak kilenjin Jehovah Kamuktaindeng’ung’, Ibae bikyuk Israel, ak iegu bounindet eng’ bikyuk Israel.

³ Kobwa anyun boisiek tugul che bo Israel ole mi laitoriat eng’ Hebron, ak kiiyomisgei Daudi ak ichek eng’ Hebron eng’ taitab Jehovah; ak kiil Daudi, koek laitoriat eng’ Israel, ko u ng’olyotab Jehovah ne kimwa eng’ Samuel.

⁴ Ak kiwa Daudi koboto Israel tugul Jerusalem (noto ko Jebus); ak kimi oloto Jebusik, bik che kimenyei emonoto.

⁵ Ak kilenji bik che kimenyei Jebus Daudi, Menyone oli. Ago kinam Daudi irimet ne bo Sion; noto ko nganasetab Daudi.

⁶ Ak kile Daudi, Chito age tugul ne sib kobarei Jebusik koegu ne o ak koek kiptaiyat. Ak kisib kwo kotogosta Joab weritab Seruia, ak kigiyai koek ne o.

⁷ Ak kimeny Daudi irimet; kigiguure anyun nganasetab Daudi.

⁸ Koteech anyun komuut nganaset, koboch Milo koyiem; ak koteech Joab kogetyi ole kiga kobutok eng’ nganaset ne kiga ng’et.

⁹ Ak kieet Daudi kotesak; amu kimi Jehovah ne bo lugosiek koboto inendet.

Murenik che nyigonen che no Daudi

¹⁰ Chu ko che eechen che bo bik che kimen che kitinyei Daudi che kitook kogimegitu koboto inendet eng’ bounatennyi, koboto Israel tugul, si koyai inendet koek laitoriat, ko u ng’olyotab Jehovah agobo Israel.

¹¹ Ak ni ko koitetab murenik che kimen che kitinyei Daudi: Jasobeam, weritab Hakmonindet, ne o ne bo bik sosom; kinam ng’otinnyi ak kobar bogol somok, tugul kibagenge.

¹² Ak ne kirubei inendet ko ki Eleasar, weritab Dodo, Ahoindet ne ki agenge ak murenik somok che ki kimen.

¹³ Kimi ak Daudi eng’ Pas-damim, ak kiga iyumgei eng’ yoto Pilistik koyai luget, eng’ ole kimi mbaret ne kimi sairik che chang’; ak kimwei bik eng’ taitab Pilistik.

¹⁴ Ak kitononso eng’ kwenutab mbaranato, ak koet mbaranato, ak kobar Pilistik; ak kisor Jehovah ichek eng’ katerteret ne o.

¹⁵ Ak kichortagei somogu eng’ che eechen sosom, koba ole mi Daudi eng’ ruandet, kot koit kebenetab Adulam; ak kiga teech lugetab Pilistik eng’ atebwetab Repaim.

¹⁶ Ak kimi Daudi eng’ betunoto, irimet, ak kimi agine lugetab Pilistik Bet-lehem eng’ betunoto.

¹⁷ Ak kiam melelda Daudi, ak kile, Eiye, inaga ng’o beekab keringetab beek, ne mi Bet-lehem aee ne negite ormarichet!

¹⁸ Ak kichut lugetab Pilistik murenjoto nyigonen somogu, koba koram beek eng’ keringetab Bet-lehem, ne kimi ye negite ormarichet, ak koib, koipchi Daudi: ago ma cham Daudi koee, kitumda eng’ taitab Jehovah,

¹⁹ ak kile, Ingoetena Kamuktaindennyu, si mayai kii: tos aee korotikab bichu koinde sobonwekwak ng’oiyondit? Amu kaib beechu eng’ kandaet ne kainde sobonwekwak ng’oiyondit. Ko ma cham anyun koee amu noto. Kiyai tuguchuto bichoto kimen somogu.

²⁰ Ak ki ne o eng’ bichoto somok Abisai ng’etab kametab Joab: amu kinam ng’otinnyi ak kobar bik bogol somok, ak kitook kainennyi koboto bichoto somok.

²¹ Eng’ bichoto somok ko ki konyitot Abisai kosiir chun aeng’, ak kigiyai koek kiptaiyandenywa: ago ma ityi che bo tai somok.

²² Kibar Benaia, weritab Jeoiada, weritab chito ne nyigan ne bo Kabseel, ne kiga koyai boisionik che eechen, werik aeng’ che bo Ariel ne bo Moab: kichortagei agine kwo kobar ng’etundo eng’ kwenutab keringet eng’ betusiekab teluchi.

²³ Ak kibar Misrindet, chito ne koi kot, ne bo kakwautik mut che bo eut tonon; ak kimi eutab Misrindonoto ng’otit ne u ketit ne taachin usisiek chito ne nabisiei; ak kichortagei ole mi inendet kotinyei kirokto, ak koreb ng’otit eng’ eutab Misrindet, ak kobare inendet ng’otinnyi.

²⁴ Kiyai tuguchuto Benaia weritab Jeoiada, ak kitook kainennyi koboto bichoto somok ki kimen.

²⁵ Keero, ki konyitot inendet kosiir bichoto somok, ago ma ityi che bo tai somok: ak kiinde Daudi inendet koboi ribikyik.

²⁶ Ak bik che kimen kogeny che bo lugosiek ko ki: Asael ng’etab kametab Joab, Elanan weritab Dodo ne bo Bet-lehem;

²⁷ Samot Harorindet, Heles Pelonindet;

²⁸ Ira weritab Ikes Tekoindet, Abieser Anatotindet;

²⁹ Sibekai Husatindet, Ilai Ahoindet;

³⁰ Maarai Netopatindet; Heled weritab Baana Netopatindet;

³¹ Itai weritab Ribai ne bo Gibea ne bo lagokab Benjamin, Benaia Piratonindet;

³² Hurai ne bo kererusiekab Gaas, Abiel Arbatindet;

³³ Asmabet Baharumindet, Eliaba Saalbonindet;

³⁴ werikab Hasem Gisonindet, Jonatan weritab Sage Hararindet;

³⁵ Aiam weritab Sakar Hararindet, Elipal weritab Ur;

³⁶ Heper Mekeratindet, Aija Pelonindet;

³⁷ Hesro Karmelindet, Naarai weritab Esbai;

³⁸ Joel ng’etab kametab Natan, Mibar weritab Hagri;

³⁹ Selek Amonindet, Naarai Berotindet, chito ne kiipchin karik Joab weritab Seruia;

⁴⁰ Ira Itrindet, Garib Itrindet;

⁴¹ Uria Hitindet, Sabad weritab Alai;

⁴² Adina weritab Sisa Reubenindet, ne o ne bo bikab Reuben, ak bik sosom che kimi koboto inendet;

⁴³ Hanan weritab Maaka, ak Josapat Mitnindet;

⁴⁴ Usia Asteratindet, Sama ak Jeiel werikab Hotam Aroerindet;

⁴⁵ Jediael weritab Simri, ak Joha, ng’etab kamet, Tisindet;

⁴⁶ Eliel Maabindet, ak Jeribai, ak Josabia, werikab Elnaam, ak Itma Moabindet;

⁴⁷ Eliel, Obed ak Jaasiel Mesobaindet.