1 ATEPTAP PEETUUSYEK 10 - BUKUIT NE TILIL

Kiterteri Saul, ak meennyi

¹ Kibargei Pilistik ak Israel, ak kimwei bikab Israel eng’ taitab Pilistik, ak kiibutyo kebar eng’ tulwetab Gilboa.

² Ak kion Pilistik Saul ak werikyik kosub inne, ak kibar Pilistik Jonatan, ak Abinadab, ak Malki-sua, werikab Saul.

³ Ak king’wanit boriet eng’ Saul, ak kinam inendet mwogik; ak kinyalil eng’ mwogik.

⁴ Kolenji anyun Saul chito ne kiipchin inendet karik, Ng’usu rotweng’ung’ bo chok, ak itoorena; si mabwa bichoto chu ma kimuratan kochota. Ago ma cham chito ne kiipchin karik: amu kiiywei mising’. Konam, anyun Saul rotwennyi bo chok, ak kong’at, ak kobutyi.

⁵ Ak kingogeer chito ne kiipchin inendet karik kole kagome Saul, kobutyi agine rotwennyi bo chok, ak kome.

⁶ Kome anyun Saul, ak werikyik somok; ak kibek gonnyi tugul kibagenge.

⁷ Ak kingogeer bik tugul che bo Israel che kimi atebwet kole, kagomwei, ago kagome Saul ak werikyik, kometo nganasokwak, ak komwei; ak kibwa Pilistik komeny nganasochato.

⁸ Ak ki eng’ karon, ye kibwanei Pilistik kobutei bik che kiga kibar, konyor Saul ak werikyik ko kogobek eng’ tulwetab Gilboa.

⁹ Ak kibut inendet, ak koib metinnyi, ak karikyik, ak koyokto koba emetab Pilistik komoswek tugul koipchi logoiywek kanamonikwak, ak koipchi bik agichek.

¹⁰ Ak kiinde karikyik gotab kanamonikwak, ak koratyi metinnyi gotab Dagon.

¹¹ Ak kingogas Jabes-gilead komugul kit ne koyachi Pilistik Saul,

¹² kong’eetyo bik tugul che nyigonen, ak koba koib bortab Saul, ak borwekab werikyik, ak koib kobwa Jabes, ak kotub kowekwak eng’ ketit kel eng’ Jabes, ak korugutgei betusiek tisab.

¹³ Kome anyun Saul amu chalwoktanyi ne kiyachi Jehovah, amu ng’olyotab Jehovah ne ma rib; ak amu kiteeb ng’omnatet kogeny eng’ inendet ne kiboisie oik, koteepse,

¹⁴ ama teebe Jehovah: kobar anyun Jehovah inendet, ak kogochi laitornatet Daudi weritab Jesii.