Tite 3 - Mina ma Nzambe 1947

Bana ba Nzambe tadyalake n’iwokake na mikonchi, badikizaka bato bacho chabo. Mibèchò.

¹ Obatizaka bango bwe, batulizaka manchoto ma bango na mikonchi na bakomandi, na bawokaka bakomandi badyale n’ilòngibaki o beka bichò,

² tabèchèkè moto nyò mò, tadyalake na phocha mitoko, ko badyalaka na ndèphè na badikizaka chabo o beka bichò na bato bachò.

³ Tonga ikale bèni makoncha bobèki bolèngi twa bobèki n’iwokake, bolengwaki, bèni bobèki batamba o ch’a bibembeli na baphongo moto elenge elenge, bèni bobèki o ch’a beka bibè na boyino, bèni bobèki na ngièngeli o michò ma bato na boyinanaki.

⁴ Ko, o bonyòngò ba Nzambe Mobil’a bèni n’èlumb’a wango na bato bitubaki o phololo,

⁵ wango aphakolaki bèni, ebodyala iwò tonga na matoma manyèki mango bèni bokielaki ka, ko, tonga n’èlumb’a wango, n’iyinib’a mitema n’ènyechele yango Eyaye Echwa enyeze,

⁶ yango wango alèkaki ephukele tonga na Jésus Christ, Mobil’a bèni,

⁷ echoko bèni bango wango anyèzaki na grâce a wango todyala bakwe ba beka b’itike ko ichen’a bèni idi bona bomwè butenela yango.

⁸ Iwò di idi ngingi na nga dinge bwe, kò tòchakola dyango na nguli, echoko bakoncha bango bachingane Nzambe bakiele matoma manyòngò kot’ekielele. Beka bi bidi binyòngò na binyèki na bato.

⁹ Onakolaka biyangi ba biwawunga, bolokicha na bikoko ba mikanda ma milolongi ma bachango na mibambi na mitoko ma miyeko, tonga beka bi bidi bwabona, bidi biphwa.

¹⁰ Koncha wango ekakuze baninga, obengaka wango ma kò, o chima k’òbichiliza boteye wango iteyo dyò nyò mabale,

¹¹ tonga k’òyebe koncha wango ebilengwa, na wango akiele machuma, n’achambe nchoto a wango koncha botote.

¹² Okomo nga tindaki Artèmas dyò Tychique o ma kò ophalanganaka kot’èphalangane boyaka o ma nga o Nicopolis, tonga nga chòchòki bobike ondo o botanda.

¹³ Zénas, moto a bolèngi ba miyeko n’Apollos okiekaka n’ikièngu ta eyeka nyò yò tèchenga na bango o moluka.

¹⁴ Tika banyango ba baphele ba bèni ebati a Nzambe bayekole edyalele ikiela matoma manyòngò echoko yango badi na phocha bakielichi, echoko bango tadyala n’iwuta yango.

¹⁵ Baninga bachò bango badi na nga babèche ko. Obèchèkè bakoncha bango badinge banga o ch’èchingane. Tika grâce edyale na beni bachò.