Tite 1 - Mina ma Nzambe 1947

Mibèchò. Achakole edyalele yango badikichi ba Nzambe tadyala o ebuliki.

¹ Paul, mochali ma Nzambe n’apôtre de Jésus, Christ atindibaki tonga n’ikiela mochalo m’èchingane ma bato ba Nzambe bochònga, na bolèngi ba nènè, yango edi o bonyòngò ba Nzambe,

² atindibaki tonga n’ichen’a bomwè butenela edi bwango Nzambe, koncha wango edi oyicha bokiele bwanya ka, alakaki o wango abach’otula che ka.

³ O bobiko bwango wango achòlòki, wango adikizaki nga mawò ma wango, mango madi na nga, tonga n’ichakola bato miyeko ma Nzambe, Mobil’a beni,

⁴ nga, Paul, nga bèche Tite, mwan’a bole a nga tonga n’èchingane ko yò. Tika grâce na phi ephèbè na kò ebati a Nzambe, Chango, na Jésus Christ, Mobil’a bèni.

⁵ Nga tikaki kò o Crète, echoko ko tolòngele beka byango biwulaki yango, na tonga n’ichòlò babateli o mamboka o mamboka, ko nga tindaki kò bona,

⁶ mo moto mò adi n’iwò twa, adyale na mwachi ko mò phencha, n’adyale na bana bango badi n’èchingane, badi odyala na kuma ebè ka, tadyalake n’iwokake.

⁷ Kobona mobateli èbuliki a Nzambe tadyalake n’iwò nyò dyò, ko edyalele yango mobateli a Nzambe tadyala bona: tadingake nchoto a wikoncha, tadyalake n’ibèli, tadyalake na phocha malèku, tadyalake na phocha bonchanga, tadyalake na chululu a mbongo,

⁸ wango ayambaka babutu na moni, adyalaka na chululu a beka binyòngò bichò, adyalaka na motema ma bophomu, na monyèki, n’èchwa n’adyale na nguli ikiènga nchoto a wi koncha.

⁹ Okiekaka n’ikièngu na mawò ma ngingi ko wango ayekolaki mango bona, echoko wango ayiche boteye bato n’iyekol’a nènè yango, n’adimize bakoncha bango badi na bobetinya.

¹⁰ Bato bakama badi, bango badi odinga bakomandi ka, bango badi na mawò m’iphwa, na bachukwize bato n’ichena, tètè bakoncha bango badi n’èchingane a bakubi ba bato,

¹¹ k’òdi n’iwò idipha mina ma bango, tonga bango bachekole mangomba makama, badikize beka byango bidi odyala binyèki ka, tonga na chululu a mbongo.

¹² Moto mò o phanyak’a bango, mobandi ma bango alobaki bwe: ”Be Crète badi bato ba bwanya, kokoko, banyama babè, mye ma bimèmè.”

¹³ Iwò dyango idi nènè. Kobona ochèkizaka bango kot’èchèkize, echoko bango badyale n’èchingane a nènè yango,

¹⁴ ta bango bachingana bikoko ba bajuif na miyeko ma bato, bango babwake mabèkè o nch’a nènè.

¹⁵ Beka bichò bidi cheche na bakoncha bango badi cheche, ko, bakoncha bango badi na mbindo echingane twa, eyeka nyò yò a bango edi odyala cheche ka; iwò akbwi, biyaye ba bango na baconscience ba bango badi na mbindo.

¹⁶ Bango bachakole na mina ma bango bwe, bango bayebe Nzambe, ko, matoma ma bango matate wango, tonga bango badi na ngièngèli, bato b’iwokake, babidyobo o beka binyòngò bichò.