Mina minyòngò myango Saint Luc akòtèki 21 - Mina ma Nzambe 1947

Makota ma mwato a chani. Jésus achiakole bayekoli ba wango tonga na bodyobo ba Jérusalem na tonga boyelele ba wango.

¹ O Jésus akiekaki ikolo, wango ayènèki bwe, bato ba mandi bakanaki matabichi ma bango o chanduku a mbongo.

² Na wango ayènèki mwatò moyoko dyòkò, wango abèki chani, akanaki makota mabale.

³ Wango alobaki bwe: ”Nga lobe na beni nènè, beka byango chani a moyoko wo akanaki o chanduku a mbongo bilèki bina beka byango bana bato bakanaki bichò,

⁴ tonga bango bachò bakanaki o chanduku iphè Nzambe matabichi, beka byango binyoloki na bango, ko, wona mwatò akanaki beka byango wango abèki na phocha bichò.”

⁵ O bana bato balobaki tonga na ndako a Nzambe na maboko manyòngò na matabichi ma ndako ma Nzambe, mango yango ebèki elongibaki na mango,

⁶ wango alobaki bwe: ”Beni boyènè beka bi, ko, machu mango taya o bango tichimiti bwe, dina iboko tiyakami ikolo na dina, taphancha mango machò.”

⁷ Bango bayangaki wango bwe: ”Modikichi, beka bi titubana bucha bophe?”

⁸ Wango alobaki na bango bwe: ”Bokiekaka nonyòngò, ta bango balenguza beni, tonga bakama taya o kombo a nga, taloba bwe: ”Edi tètè nga, na bobiko boya mpoli.”

⁹ Tolondoke bango. O beni towoka bita na makoku, totilake, tonga beka bi kokomo byango biphote botube nò dyò, ko, bochukele boch’okoka ka.”

¹⁰ Na wango alobaki na bango bwe: ”Dia tinana na dina na buna bokonchi tonana na buna,

¹¹ na bonyalwe bokama todyala o binongo o binongo, molaka na mabonganaka, na bimwa ba bobo bikama, na mandembo m’ikolo tayènènè.

¹² O beka bi bibèki bich’ophota ka, bango takanda beni, tachèbiza beni na takamba beni o mandako m’ibondima ma bango, na monyoli, na takamba beni o bocho ba mikonchi na bagolophuma, tonga kombo a nga.

¹³ Beka bi tiphè beni bobiko b’ichiakola mawò.

¹⁴ Bokanaka mawò o ch’a mitema ma beni, ta beni bochimunya bocho ko beni tophaka manchoto ma beni bona;

¹⁵ tonga nga taphè beni muna ma bolengi, byango bandoli ba beni tiyichi bowunche beni mokalo.

¹⁶ Na nyango na chango na banyango ba baphele na banyango b’ingomb’a beni na baninga takamba beni, na bango taboma bana bato o phanyak’a beni,

¹⁷ na bato bachò tayina beni tonga kombo a nga,

¹⁸ na mochwe nyò mò o mitu ma beni tichumbani.

¹⁹ Bodwa biyaye ba beni n’etungu a beni.

²⁰ O beni boyènè Jérusalem adyongiba na bibuliki ba bita, owana beni boyebe bodyobo ba yango boya mpoli.

²¹ Komoyena bakoncha banga badi o Judée tabangana o makoli, na bakoncha bango badi o ch’a mboka talangwa o yango, na bakoncha bango badi o makuba dyo tikiè o ch’a yango.

²² Iwò di edi machu m’ibutiza eba, na mango tatuba ko bakòtèki o mawò ma Nzambe bona.

²³ Ko, kièlèlè ekuli tedyala na bakoncha bango badi na myemu na bango banywangize bana machu ma. Tonga kièlèlè ekuli tedyala o che, n’ibèli o ma bato.

²⁴ Bato takwa o ch’a mbièli a bita, na bango takandiba batamba, taphancha bango o ma bakoncha bango bach’owoka mawò ma Nzambe ka bachò, na bakoncha bango bach’owoka mawò ma Nzambe ka tadyata Jérusalem kokoko ncho bobiko ba bango bach’owoka mawò ma Nzambe ka totunywiba.

²⁵ Na mandembo tatubana o ch’a bucha na woli na mièti, n’eyubi tedyala o ch’a bato o che, na bango taphanwa o ikingo a may manè na bachokela.

²⁶ O elongo yango bato tawa na bobo n’ibonda a beka byango tiya o che, na nguli ikolo tètèmbubana.

²⁷ Tètè bobiko bwango beni toyènè Mwan’a bole a moto taya o ephephelo na kilo ekama na botochibe bokama.

²⁸ Ko, o beka bi biphote botube, bobèkwaka michò ma beni n’ikolo, tonga ichungib’a beni iya mpoli.”

²⁹ Na wango achiakolaki bango ekoko bwe: ”Bokieka, o molange ma figuier na mina milange michò,

³⁰ o myango mibichil’ophume, beni makoncha boyebe ibula iya mpoli.

³¹ Edi elenge ko yango o beni boyènè beka bi bitubane, beni boyebe bokonchi ba Nzambe boya mpoli.

³² Nga lobe na beni nènè: Mo beka bichò bi bich’ophota botubane ka, bato ba bobiko bu tiwe.

³³ Ikolo na che tidyobo, ko, mawò ma nga tidyobo.

³⁴ Ko, bokiekaka n’ikièngu na beni makoncha, ta mitema ma beni midyala na chululu a bonywe ba maléku, na chululu a iphanu a bomwè, owana bucha bwango tophakiza beni,

³⁵ tonga bucha bwango todyala ko boya bona na bato bachò o ch’echò.

³⁶ Echoko beni tobatela na toyonga yango, tika beni bodyale banyèki n’ibangana beka bichò byango tiya bi, mòchi beni bophole o bocho ba Mwan’a bole a moto.”

³⁷ Na mièche wango adikizaki o ndako a Nzambe, ko, mikolo wango akièki n’adyalaki o bokoli botangibe Olivier.

³⁸ Na bato bachò bayakaki ma wango na tompengu tonga n’iwoka wango.