Jacques 3 - Mina ma Nzambe 1947

Ekoko a bolèmu. Bokièngu ba nènè.

¹ Banyango ba baphele ba nga b’èbati a Nzambe todyalake badikichi bakama o phanyak’a beni, boyebaka bwe, botòtè ba bango tolèka bokuli.

² Tonga bèni bachò bokondo o matoma makama; mo moto adi otubiza iwò iphwa nò dyò ka, owana wango adi monyèki na wango ayiche bochimbe nchoto a wango ichò.

³ Banga bokane bidunga o mina ma bayanga tonga bango tatambola ko banga bodinge bona, na kobona banga boyende manchoto ma bango machò.

⁴ Bokieka machwa mango madi mananè kobona mango binguchi bikuli bidumbe, ko mango machekwe na yenda moki, echoko yango koncha eyende adinge.

⁵ Elenge ko yango bolèmu bodi ekiète eki, bwango bochache beka bikama. Bokieka meya miki miyiche botumbe dyamba inè.

⁶ Kobona bolèmu dyòkò bodi meya bwango bodi ko bato o che bango babichumbana bona, bwango bodi o phanyak’a bikiète ba bèni, bwango bophè mbindo o nchoto ichò bwango botumbe meya o ”ngongoli a bomwè,” na bwango koncha bolutibe na meya ma géhenne.

⁷ Banyama b’ibèli bachò, na banyoli, na banyama bango bakokoto che, na banyama ba mè bamèchinye bango, na bato bamèchinyaki bango,

⁸ ko, bolèmu o phanyak’a bato moto nyò mò oyicha bomèchinye ka, eyeka ebè, yango edi owoka okomo bachekize ka, yango etonde na mate ma bowe.

⁹ Bèni botoche Mokonchi na Chango na bwango, na bèni bokindele bato na bwango, bango batulibaki elenge a Nzambe.

¹⁰ Etubize botochibe na mokindo muna ko mò. Tidyali kobona, banyango ba baphele ba nga b’èbati a Nzambe.

¹¹ Nch’a mè ma nchomba yò edi oyicha botubize may manyòngò na may ma bololo ka.

¹² Banyango ba baphele ba nga b’èbati a Nzambe molange figuier modi oyicha bobote olive ka, na molange vigne modi oyicha bobote figue ka. Na nchomb’a monguta adi oyicha botubize may manyòngò ka.

¹³ Edi na bolèngi na bokièngu o phanyak’a beni nda? Koncha wango edikize matoma ma wango o ch’èdyalele a wango enyòngò na ndèphè na bokièngu.

¹⁴ Ko, mo beni bodi na chululu o boyino n’èyaye a mibambi o ch’a mitema ma beni owana tokondizake manchoto ma beni, na tokielake bwanya ebati a nènè.

¹⁵ Tonga ”bokièngu” bwango bodi ochònò ikolo ka, ko, bwango bodi ba che, bwango bodi ”b’èbati a nchoto”, bwango bochònò o ma biyaye bibè.

¹⁶ Echoko yango edi eyubi na mibambi, echoko yango edi lingata na beka bibè bichò.

¹⁷ Ko, bokièngu bwango bochònò ikolo bodi tabocho bodyale cheche, chima bodyale na phi, ndèphe na chabo, bwango botonde n’èlumba na mpuka inyòngò, bwango bodi iphomunya twa, bwango bodi okiela bolèngi ka,

¹⁸ na mpuka èchwa iphike dyango koncha o ch’a phi na bato bachò bango badi na phi.