Jacques 1 - Mina ma Nzambe 1947

Jacques ateye bato ba Nzambe bwe, badyalaka chabo o cha kièlèlè.

¹ Jacques, mochali a Nzambe na Mokonchi Jésus Christ, abèche madia dyomu na mabale, mango maphanchanaki.

² Banyango ba baphele ba nga b’èbati a Nzambe, botangaka maphèphi moto elenge elenge mango mate na beni ko moni mochò bona,

³ boyebaka bwe, beka bichò byango bimeke echingane a beni bitubize chabo.

⁴ Tika chabo ekiele botoma ba yango kot’èkielele, echoko beni bodyale banyèki na bobitunywiba yango, n’èyeka nyò yò tichèngi na beni.

⁵ Ko, mo moto mò o phanyak’a beni achenge bolèngi, tika wango ayonge bwango na Nzambe, koncha wango edi n’ikabo na bato bachò, n’adi wochako twa, na bwango tophèba na wango.

⁶ Ko, tika wango ayonge n’èchingane, ophomunya ka tonga koncha wango ephomunye awule chokel’a may manè wango enguchi ephukize n’èdumbe.

⁷ Tonga moto èlenge yena adi ochimunya bwe, wango ayambe eyeka a Mokonchi ka,

⁸ moto wango adi na motema biba bibale, na wango andandange o manè ma wango machò.

⁹ Tika mwanyango a bole a Nzambe, wango atulize nchoto achange o bango bakondize wango o ch’a Nzambe,

¹⁰ ko, koncha wango edi mandi, tika wango akiele elenge ko yango o bango batulize wango.

¹¹ Tonga bucha bokondelaki, na yangal’a bwango ewomizaki byembu, na biphuncha ba byango bikwaki, n’èdyalele enyòngò a byango elengwaki; na moto a mandi tawoma elenge ko yango o manè ma wango.

¹² Koncha wango ebandame n’ètungu o ch’a maphèphi adi n’ilèmu, tonga o wango abichil’omekibe wango tayamba ngul’a bomwè, wango Nzambe alakaki bakoncha bango badinge wango.

¹³ Tika moto nyò mò adyale oloba bwe: Nzambe aphèphize nga ka, tonga Nzambe adi ophèphiba n’èyeka ebè ka, na wango koncha adi ophèphiza moto nyò mò ka.

¹⁴ Ko, moto ikika adi aphèphibe okomo phongo a wango koncha alutize n’abembize wango.

¹⁵ Chima phongo akindaki, wango abote bochuma, ko, o chima bochuma buchil‐otunywibe bwango bobote bowe.

¹⁶ Banyango ba baphele ba nga b’èbati a Nzambe bakonde, tolengwake!

¹⁷ Matabichi manyòngò machò na matabichi manyèki machò machònò ikolo ma Chango a phololo, edyalele a wango edi ochekwa ka, n’èdyalele a wango edi ko yò biteneli.

¹⁸ Ko bodingo ba wango bobèki bona, wango abotaki banga na mawò ma nènè, echoko banga todyala beka ba tabocho o phanyak’a beka byango wango atulaki bichò yango.

¹⁹ Boyebaka bwe, banyango ba baphele ba nga b’èbati a Nzambe, tika moto ikika awoke dyolo, ko, talobake dyolo, na tabeleke dyolo.

²⁰ Tonga n’ibèli a moto idi otubinya beka binyèki o bocho ba Nzambe ka.

²¹ Kobona bomichaka mbindo ichò na beka bakbwi bibè bichò, na boyambaka mawò mango mabiphikiba na ndèphè, mango mayiche bophakole mamwè ma beni.

²² Towokake mawò mowoka phencha, ko, bokielaka mango, ta beni bochukwiza ebati a beni makoncha n’ichena.

²³ Tonga mo k’òwoke mawò mowoka phencha, mo k’òdi okiela mango ka, owana k’òdi ko koncha wango etokolo bocho ba wango o tatala bona,

²⁴ chima o wango achilaka botokolo bocho ba wango, wango alangwe n’abunge elenge a wango koncha dyolo.

²⁵ Ko koncha wango etokolo o cha miyeko minyèki kot’ètokolo, miyeko myango michekole bato bachomi, na abandame o ch’a myango, odyala ko koncha wango ewoke mowoka n’abunge myango bona ka, ko adyalaka ko koncha wango ewoke myango kot’èwokele bona, na kobona wango tadyala na moni o cha botoma ba wango.

²⁶ Mo moto achimunye bwe, wango akiele botoma ba Nzambe, ko wango adi ochiba bolèmu ba wango ka, owana wango achukwize ebati a wango koncha n’ichena, na kobona botoma ba wango b’ichambela bodi bwabona.

²⁷ Botoma b’ichambela bwango bodi cheche na biphebo twa o bocho ba Nzambe na Chango, bwango bodi kobona, bokiè bokieka bana bango badi batike, na bachani o ch’a kièlèlè a bango, na bochobe ebati a wikoncha cheche o che.