Hébreu 5 - Mina ma Nzambe 1947

Christ adi Moyekochi monè ko edyalele a Melchisédek bona.

¹ Tonga koncha wango otèdyala moyekuchi monè, babile wango otete a bato, n’atikibe o bocho ba Nzambe echoko wango takiela matoma m’ilòngize ebati a bato, tonga n’iphè matabichi na sacrifice tonga na machuma yango.

² Na wango ayiche bodyale chabo na biwawunga na bakoncha bango babilengwa o manè, edi tonga na wi koncha adi na lèlèkè.

³ Na kobona tonga na lèlèkè yango edi na wango edi kokomo nà wango taphè sacrifice tonga na machuma ma wi koncha elenge ko yò na machuma ma bato.

⁴ Edi moto nyò mò ikwa botochibe bwango wi koncha twa, edi kokomo Nzambe abwange wango ko wango abwangaki Aaron bona.

⁵ Na Christ elenge ko yango, wango abokwa botochibe b’idyala moyekuchi monè wango koncha ka, ko wango ayambaki bwango na koncha wango elobaki bwe: ”K’òdi mwan’a bole a nga, lèbo nga bibota kò.”

⁶ Ko wango alobe o yena enongo bona: ”K’òdi moyekuchi a biteneli ko edyalele a Melchisédek bona.”

⁷ O machu mango o ebati a nchoto wango abelelaki n’alelaki na mbicholi, n’ayongaki nabondimaki koncha wango eyichaki bophakole wango na bowe, na wango ayambaki iyambola a mayonga ma wango, na lèmèmè yango ebèki o cha wango emichibaki.

⁸ Nyò wango adyale Mwan’a bole ko wango amèchènèki n’iwoka mawò o ch’ichèbo a wango.

⁹ Ko, o wango atunyolaki bichò, wango ayambaki chwa iphè bakoncha bango bawoke wango ichungiba biteneli.

¹⁰ Na Nzambe atangaki wango bwe, Moyekuchi monè ko edyalele a Melchisédek bona.

¹¹ Edi mawò makama m’iloba tonga na beka bichò bi, ko edi ekuli enongo iloba mango kot’èlobele, tonga beni bodi owoka mango kot’èwokele ka.

¹² Machu ma ibè beni byichaki bodyale ko badikichi bona, na kinòwa edi kokomo banga tòphota bodikize beni nchalela a tabocho a mawò ma Nzambe, edi na beni bwe, beni boch’onywange mabèlè ika idya kota bekidya.

¹³ Ko koncha wango elòngo tonga na mabèlè, wango adi odyala monyèki n’idikiza ebati èchwa ka, tonga wango achaka ko mwana bona.

¹⁴ Ko kota bekidya edi tonga na baphomba, bango babiyeba nch’ikakuza beka bibè na beka binyòngo.