Hébreu 4 - Mina ma Nzambe 1947

Iywe a bana ba Nzambe a sabbat (bucha ba chònò). Nguli a mawò ma Nzambe. Christ adi Moyekochi monè a bobila.

¹ Tonga kinòwa edi n’ilakako ikola o ch’iywe a wango, tika banga bokieka n’ikièngu, ta moto nyò mò o phanyak’a beni tatikana o chima.

² Tonga nà banga bobiyamba mina ma moni myango elenge ko yò na bango ko ilakako dyango bango, bawokaki, ibèki na bango bwabona, tonga bango babowoka dyango na baboyamba dyango n’èchingane ka.

³ Banga bango bochinganaki boyiche bokole o ch’iywe, ko wango alobe bona: ”Nga dyengaki o ch’ibèli a nga bwe, bango tikoli o ch’iywe a nga.” Wango alobaki kobona o matoma ma wango mabèki matunywibaki kokoko ncho o bophotiche ba che.

⁴ Wango alobaki o enongo yò tonga na bucha bwango bopholaki mochabali bwe: ”Nzambe ayoki o bucha bwango bopholaki mochabali o matoma ma wango machò,”

⁵ na dyòkò bwe: ”Bango tikoli o ch’iywe a nga.”

⁶ Tonga lebo edi n’ènongo ikola na bana baninga, ko bakoncha bango bayambaki mina ma moni mi bocho, bango baboyicha bokole ondo ka, ebèki tonga n’iphomuny’a bango.

⁷ Ko Nzambe abichòchò dyò bucha bò bwe: ”Lebo,” alobaki dyango bocho na David bwe: ”Lò mo beni bowoke ikingo a wango, tòngotwizake mitema ma beni.”

⁸ Tonga mo Josuè akambaki bango o ch’iywe, ibè Nzambe aboloba tonga na bucha bakbwi ka.

⁹ Na kobona edi na iywe a bana ba Nzambe a sabbat (sabbat motwatwa bucha ba chònò).

¹⁰ Tonga koncha wango ebikola o ch’iywe a Nzambe owana wango abitunyola matoma ma wi koncha, ko Nzambe atunyolaki matoma ma wango bona.

¹¹ Tika na bèni bobandachane kot’èbandanchane tonga n’ikola o ch’iywe dyango, mòchi moto nyò mò adyale okwa tonga n’iphè etika a iwokake ko bango bona ka.

¹² Tonga mawò ma Nzambe madi na bomwè na nguli, na mango maleki mingowa michò myango midi na mèngo o bibati bichò bibale mèngo, mango makole o cha mwè kokoko ncho mango makakuze motema n’èyaye, mikwa na bòngò na mango madi tòtè a bichimunye na beka byango bidi o cha chòkòtò a motema.

¹³ Eyeka etulibaki nyò yò edi odyala na wango o yiche ka, bichò bidi otata bocho ba wango, edi o bocho ba wango banga tòphè machango.

¹⁴ Tonga banga bodi na Moyekochi monè kobona, wango akièki ikolo, alekanaki makolo machò, Jésus, Mwan’a bole a Nzambe, tika banga bobandame n’ichimbo o ch’èchingane yango banga bochingane.

¹⁵ Tonga banga bodi na Moyekochi monè wango ayiche botabinye banga o cha lèlèkè a banga, wango aphèphibaki o beka bichò ko banga bona, ko, abèki bochuma nyò bò twa.

¹⁶ Na kobona echoko banga boyiche bophole o kiti a grâce na okili, tonga n’iyèyamba bobila na grâce iyamba grâce (motwatwa ndombo) o kota bobiko, tonga n’idwa mokieliche.