Hébreu 2 - Mina ma Nzambe 1947

Iyekol’a Jésus Christ ileki miyeko ma Moïse bonè. Christ aleki bangelo bonè. Christ achekwe elenge a moto.

¹ Echoko bèni tòkieka n’ikièngu tonga na beka byango bèni bowokaki kot’èkiekele yango, ta bèni bochumbana.

² Tonga mo iwò dyango bangelo bachakolaki ibèki ngingi kobona, na machuma n’iwokake bibiyamba iwuta dyango ibèki inyèki na matoma ma mango,

³ na kobona bèni tòyicha bokochwe bwe? mo bèni bodi owoka ichungiba dyango ka, dyango Mokonchi mochakolaki bocho, na bakoncha bango bawokaki mwango bakòlinyaki mawò mango na bèni muna ko mwango.

⁴ Nà Nzambe ayènizaki na mandembo na matoma machimube, na matoma ma nguli moto elenge elenge, na wango aphèki Eyaye Echwa ko bodingo ba wango bobèki bona.

⁵ Che yango bèni bolobe tonga na yango ye, wango abophè bangelo chwa tonga na yango ka.

⁶ Ko wona moto alobaki kot’èlobele o yena enongo bwe: ”K’òchimunye tonga na moto, edi nde? nyò mwan’a bole a moto, koncha wango k’òwuye?

⁷ K’òtulizaki wango bobiko boki tonga n’idyala o nch’a che a bangelo, k’òbiphè wango botuki ba botochibe na bokumu,

⁸ k’òbitika wango mokomandi a matoma mango makielibaki na mabòkò ma kò, nà k’òbidyatiza makolo ma wango ikolo na beka bichò.” O Nzambe atikaki beka bichò o mabòkò ma wango, abodimola wango eyeka nyò yò ka. Ko, edi oyènè na bèni kinòwa bwe, beka bichò bibiphèba o mabòkò ma wango ka.

⁹ Ko, bèni boyènè Jésus koncha wango batulizaki enongo eki, tonga n’idyala o nch’a che a bangelo, tonga n’ita n’ichèbo a bowe, ko, kinòwa babiphè wango botuki ba botochibe na bokumu, bato bachò tayamba beka binyòngò tonga na grâce a Nzambe na bowe ba wango.

¹⁰ Beka bichò bidi na wango, na beka bichò bidi moto wango, o wango adingaki bokambe bana ba wango bakama o botochibe, ebèki kokomo wango takola o ch’ichèbo, tonga n’inyè bodyale Mokonchi m’ichungib’a bango.

¹¹ Koncha wango enyèzè na bakoncha bango banyèzibe bachò edi Chango ko mò. Echoko wango adi choni tonga n’itanga bango bwe, banyango ba baphele twa, yango.

¹² Wango alobe bwe, ”Nga tachakola kombo a kò na banyango ba baphele ba nga, nga tatocha kò otatete èbuliki,”

¹³ na dyòkò bwe: ”Kieka ye nga, na bana bango Nzambe aphèki nga.”

¹⁴ Okomo bana babichekwa nchoto na malongo, nà wango abichekwa elenge ko yango, tonga na bowe ba wango wango tadyobiza koncha wango edi na chwa a bowe, yena wana edi Molemba.

¹⁵ Na wango tawutola bakoncha bango babèki na bobo ba bowe bachò, okomo bango babèki o cha otamba, o bomwè ba bango bochò.

¹⁶ Tonga edi odyala bangelo bakoncha bango wango aphakole ka, ko, momboto m’Abraham, yena edi bakoncha bango wango aphakole.

¹⁷ Echoko o wango tadyala elenge ko yò na banyango ba baphele ba wango yango, tonga n’idyala Moyekochi ma bobila n’ètungu na monè o bocho ba Nzambe, tonga n’iphakola bato o machuma ma bango.

¹⁸ Tonga wi koncha atuki n’ichèbo na maphèphi, na kobona echoko wango ayiche bokielize bakoncha bango bate na maphèphi yango.