Galate 6 - Mina ma Nzambe 1947

Paul achilize mateyo ma wango, n’achakole bè Galate bodingo ba wango.

¹ Beni, banyango ba nga ba baphele, mo wona mò akwe o cha machuma, beni bakoncha bango bodi n’èyaye, bolanguzaka wango n’èyaye a ndèphè. Ko, okiekaka kò koncha n’ikièngu, ta iphèphi dyango iphila nà kò.

² Bonyanyanaka mimba ma baninga, kobona beni botubinye miyeko ma Christ.

³ Mo wona moto achimunye bwe, wango aleki baninga bonè, ko wango ayènènè moki bona, wango achukwize nchoto a wango n’ichena.

⁴ Moto ikika amekaka matoma ma wango tonga n’iyicha bochombwane ko o ch’èbati a wi koncha, odya o ch’èbati a baninga bakbwi ka.

⁵ Tonga na moto ikika adi na dyumb’a wango inyanya.

⁶ Koncha wango eyambe mawò akabaka beka binyòngò bichò na koncha wango edikize mawò kot’èkubele.

⁷ Tolengwake! Nzambe adi ochimita bwe, abèchibe ka. Tonga beka byango moto aphike, wango tatòlò byango dyòkò.

⁸ Tonga koncha wango ephike o ebati a nchoto, wango tatòlò byango etòlòlò edyoboki, ko, koncha wango ephike o ebati Eyaye, wango tatòlò bomwè b’Eyaye ba biteneli.

⁹ Tika bèni bodyale okondo enongo ikiela beka binyòngò ka, tonga mo bèni bodyale okondo ka, owana bèni tòtòlò okomo bobiko tokoka.

¹⁰ Kobona o bèni bochaka na bobiko bikiela ekielele enyòngò tika bèni bokiele kobona na moto ikika, tabocho na banyango ba baphele o ch’èchingane.

¹¹ Bokieka mamelo mananè ma, nga kòtè mango o ma beni n’èbòkò a nga koncha.

¹² Ko bakoncha bango bayenge kuma o ebati a nchoto, badinge botomize na beni bwe, bokubibi tonga n’idyala oluphiba tonga n’awèchinye a Christ ka.

¹³ Nyò bakubibi bango makoncha badi owoka miyeko ka. Ko, bango badinge bwe, beni bokubibi tonga n’iyicha bochombwane tonga na beni.

¹⁴ Beka bichò bina bidi tètè mochika na nga, nga di ochombwana tonga n’èyeka akbwi nyò yò ka, ko n’awèchinye a Jésus Christ, Mokonchi ma bèni, tonga na nga edi motwatwa beka ba che bibikòtiba awèchinye na nga; elenge ko yango tonga na beka ba che.

¹⁵ O cha Jésus Christ edi dyò mophièphiè nyò mokubibi twa, eya ko ilòngò itemu phencha.

¹⁶ Tika phi na bobila bidyale na bakoncha bango bawoke moyeko mu, na o ikolo na Israël a Nzambe.

¹⁷ Tika moto nyò mò adyale ophè nga iphanu o chima yango ka, tonga ndembo a Mokonchi Jésus edi o nchoto a nga.

¹⁸ Tika grâce a Mokonchi ma bèni Jésus Christ edyale na biyaye ba beni, banyango ba nga ba baphele. Amen.