Galate 5 - Mina ma Nzambe 1947

Paul ateye bè Galate bwe, bakiekaka n’ikièngu tonga n’èdyalele a miyeko ma bajuif. Wango achakole mbuka a matoma m’Eyaye na mbuka ebati a matoma ma nchoto.

¹ Christ aphakolaki banga tonga n’èchekola banga bachomi. Kobona bodyalaka n’ichimbo, ta beni bobutwa dyò o cha mobongo ma botamba.

² Bokieka, nga Paul, nga lobe na beni bwe, tonga mo beni bochimite bwe, bango bakube beni, owana Christ adi ebati a beni tètè bwabona.

³ Na nga lobe dyò na beni kot’èlobele bwe, koncha wango echimite bwe, bakube wango, owana wango awokaka miyeko michò kot’èwokele.

⁴ Beni bakoncha bango badinge bodyale banyèki tonga na nguli a miyeko (boyebaka bwe) beni bophambwa o ebati a Christ, na grâce edi dyò nch’a beni twa.

⁵ Tonga n’Eyaye banga bobonde ichena èchwa n’èchingane.

⁶ Tonga o cha Christ nyò mophièphiè nyò mokubibi edi etika twa, etika edi ko echingane yango ekiele matoma n’èlumba.

⁷ Beni bobanganaki kot’èbangane, ewunduzaki beni enongo iwoka mawò ma nènè nda?

⁸ Ekielele yena ebochònò o ma koncha ebwangaki beni ka.

⁹ Mòmbòtò moki mò mochekole mapha machò na bokè.

¹⁰ O nch’èbati a Mokonchi nga chingane beni bwe, beni bodi bichimunye bakbwi twa. Ko koncha wango elenguze beni wango tata n’ichèbò.

¹¹ Beni banyango ba nga ba baphele, mo nga chakole mawò tonga na bokubibi dyòkò, bango babengachane na nga, mbekende? Kobona ibaku awèchinye a iboko ibichil’omichibe.

¹² Nga lekaki edingele bwe, baphele bango baphè beni iphanu bakube manchoto ma bango makoncha kot’è kubele.

¹³ Beni banyango ba nga ba baphele, babwangaki beni tonga n’idyala awutwaki, na, tòchimitake bwe, manchoto ma beni makiele ko mango madinge bona, ko, bokielizana n’èlumba.

¹⁴ Tonga miyeko michò mibichangana o ch’iwò ko dyò bwe: ”Kò tòdinga moninga ko k’òdinge nchoto a kò koncha bona.”

¹⁵ Ko, mo beni botwane (minò) na bodyane, bokièkaka n’ikièngu, ta beni bominana.

¹⁶ Nga bwe, botambolaka o ch’Eyaye, mòchi beni bodyale okiela matoma mango nchoto idinge ka.

¹⁷ Tonga na nchoto idi na bodingo bwango boyètènè n’Eyaye, na Eyaye eyètènè na nchoto elenge ko yango, edi ikoko ophanyak’a beka bibale bi, tonga n’iwunduza beni, enongo ikiela ko beni bodinge bona.

¹⁸ Tonga mo Eyaye etambuze beni, owana beni bodi odyala o cha miyeko ka.

¹⁹ Ko mbuka a nchoto dyango idi iyènènè, edi di: Bochembi, mbindo, bophongo,

²⁰ bobibize machana, bochèkè ba bonganga, echonga,

²¹ mototi, eyubi, ibèli, bokuli, ichicha, bochènginya, mitiki, babome ba bato, bonywe ba maleku na bombombo, yena edi beka byango. Nga lobe na beni kinòwa ko nga lobaki na beni bocho bona bwe, bakoncha bango bakièlè kobona, bango tidwe bokonchi b’ikolo.

²² Ko mbuka Eyaye edi di: elumba, mòni, phi, chabo, ndèphè, bonyòngò, etungu, bokoki, bokièngè nchoto,

²³ miyeko midi oyètènè na beka byango ka.

²⁴ Bakoncha bango badi bè Jésus Christ babikòtè baphongo na beka byango nchoto iyenge awèchinye.

²⁵ Mo banga bodi na bomwè tonga n’Eyaye, kobona botika na banga botambole o ch’Eyaye.

²⁶ Tika banga bodyale oyenga botochibe b’iphwa bwango botubize machicha na bophè eyubi ka.