Galate 3 - Mina ma Nzambe 1947

Paul abandame muna ko mò n’ichakola bè Galate bwe miyeko midi onyeza bato ka, enyeze bato edi echingane a Jésus Christ.

¹ Oh, beni bè Galate, beni tètè biwawunga! Ephèki beni ichimo kobona nda, beni nchu bakoncha bango bobiyènè Jésus Christ o awèchinyè?

² Nga yange beni mo ko iwò di phencha bwe, beni boyambaki Eyaye Echwa o ebati ephe, a matoma ma miyeko iyò ebati a mawò m’èchingane?

³ Beni bokièngu twa, kobona bwe, beni bango bophotaki o ch’èbati Eyaye, ko bochiliza n’èbati a nchoto edi enyèki?

⁴ Beni buchukwa n’oyambe beka bikama bwabona, iyò tedyala kobona bwabona?

⁵ Koncha wango ephè beni Eyaye nà n’akiele matoma ma nguli o phanyak’a beni, wango akiele kobona n’èbati ephe, a matoma ma miyeko iyò ebati a mawò m’èchingane?

⁶ Ko, Abraham achinganaki Nzambe na atangibaki bwe, moto èchwa.

⁷ Beni boyebe kot’èyebele bwe, bakoncha bango badi n’èchingane, owana yena edi bana ba Abraham.

⁸ Ko ebikòtiba nokale bona bwe. Ko mawò mayènibaki bocho bona bwe, edi tonga n’èchingane Nzambe anyeze bapaïen, mango mabiphèbiba n’Abraham nokale bwe mina minyòngò ma moni mi: ”Bato bachò tachanga tonga na kò.”

⁹ Kobona babichangiza bakoncha bango badi n’èchingane ko yò n’Abraham.

¹⁰ Tonga bakoncha bango balondo matoma ma miyeko, badi o cha mokindo, ko ekòtiba bona: ”Koncha wango edi owoka mawò machò mango makòtibaki o mokanda ma miyeko ka, mokindo tòphila wango.”

¹¹ Ko ebiyèniba bona bwe: Moto nyò mò adi oyicha bonyè o bocho ba Nzambe tonga na miyeko ka, ko moto monyèki alòngò ko n’èchingane.”

¹² Ko, miyeko midi odyala tonga n’èchingane ka, ko ”koncha wango ewoke myango talòngò o cha myango.”

¹³ Christ abichomba banga o ch’èbati a mokindo ma miyeko, okomo wango koncha akindibaki ik’a banga tonga ekòtibaki bwe: ”Moto ikika wango ebibakiba o molange, mokindo mobiphila wango.”

¹⁴ Echoko o nà bapaïen bayambaki bonyòngò ba Abraham o ch’èbati a Jésus Christ yango, echoko o nà banga tòyamba ilakako Eyaye tonga n’èchingane yango.

¹⁵ Banyango ba nga ba baphele, nga lobe o elobele a bato bwe, moto nyò mò oyenza muna milakako a mowe ka, oyaka nyò mawò makbwi ikolo na mwango ka.

¹⁶ Kinòwa molakako m’iphèba n’Abraham na momboto ma wango. Wango adi oloba bwe: ”Mboto ka”, ko elobele iloba na ikama bona ka, ko a mò phencha: ”Momboto ma kò”, mwango edi Christ.

¹⁷ Nga bwe, miyeko myango mitikibaki o chima baphela kama inè na mako machato midi olota muna milakako mwango Nzambe achòchòki tonga na Christ ka, tonga myango oyicha bodyobize ilakako ka.

¹⁸ Tonga mo idwa itike itubanaki tonga na miyeko, owana dyango ibodyala tonga n’ilakako ka, ko Nzambe abiphè dyango n’Abraham, ebèki tonga n’ilakako.

¹⁹ Mo edi kobona, miyeko midi tonga na nde? Tonga n’ikubunya machuma o bobu kokoko nchò o momboto mwango moyambaki ilakako tòtubana, miyeko myango mikielibaki na bangelo, miphèbaki o mabòkò ma mwètete.

²⁰ Na koncha wango edi mwètete wango adi odyala mwètete tonga na moto mò phencha ka. Ko Nzambe edi ko mò.

²¹ Miyeko oyicha boyètènè na malakako ma Nzambe ka. Twa nyè. Mo moyeko mophèbibaki tonga n’itubiza bomwè, kobona ibè n’èchwa etubanaki ko tonga na moyeko.

²² Mokanda (ma Nzambe) mobidipha beka ba machuma bichò, kobona echoko ilakako èchingane a Jésus Christ tiphèba na bakoncha bango bachingane yango.

²³ O echingane ebèch’oya ka, eyeka yango ebatelaki banga ebèki miyeko tonga n’ichimbiza banga kokoko nchò o echingane yango tetubana.

²⁴ Kobona miyeko mibèki mowòkòli a banga o nch’a Christ, echoko banga tòdyala banyèki n’èchingane yango.

²⁵ Ko chima o echingane eyakaki, banga bobèki dyò phocha a mowòkòli twa.

²⁶ Beni bachò bodi bana ba Nzambe, ko tonga n’èchingane a Jésus Christ.

²⁷ Tonga beni bachò bango bobiyiniba o Christ, beni bobichwa Christ.

²⁸ Owa edi nyò mojuif, nyò mogrec, twa, owa edi nyò motamba nyò chomi twa, owa edi dyò mwatò nyò bole twa, bachò eya moto ko mò o cha Jésus Christ.

²⁹ Na mo beni bodi o cha Christ, owana beni bodi momboto m’Abraham na bana b’ilakako bitike.