Galate 2 - Mina ma Nzambe 1947

Paul achakole bwe, mina minyòngò myango wango achakolaki otete a bapaïen, na bana bapôtre bachimitaki mina myango. Motòkò ma Pierre na Paul. Bajuif na bapaïen bachekwe banyèki tonga n’èchingane a Christ, miyeko onyeza bato ka.

¹ O chima yango o baphela dyomu na banè elekanaki, nga kondelaki o Jérusalem dyòkò elongo na Barnabas, nga kwaki na Tite o ch’èlongo yango dyòkò.

² Nga kièki ondo ebèki tonga n’èmwa. Nga lobaki na bango bwe, mina minyòngò myango nga chakole o phanyak’a bapaïen, nga lekaki elobele na bè nch’ikolo, ta nga chukwa na matoma m’iphwa.

³ Ko, Tite koncha ebèki, na nga, wango abèki mo Grec babotinda wango bwe, akubibi ka.

⁴ Tonga bana banyango ba baphele ba bwanya babikola o phanyak’a banga tonga n’iyèyebela edyalele yango edi na banga o cha Christ, tonga n’ichekola banga batamba.

⁵ Banga bobochimita edyalele a bango enongo nyò eki ka, ko banga bonakolaki bango, na kobona echoko mina minyòngò tibandama bochakwibe otete a beni kot’èchakwibe yango.

⁶ Nyò bakoncha bango batangibe bwe, bè nch’ikolo, nga di iwò n’èdyalele a bango twa, ko Nzambe ayebe, tonga wango adi kachelanga na moto nyò mò twa, bango babèki iwò ichakola nga twa.

⁷ Ko o bango bayènèki bwe, nga biyamba dyòmbò iyèchakola mina minyòngò otete a miphièphiè nà Pierre ayambaki dyòmbò ko dyango iyèchakola myango otete a bakubibi.

⁸ Tonga koncha wango ebèki na Pierre n’achekolaki wango apôtre otete a bakubibi, wango abèki nà na nga, abichekola nà nga apôtre otete a bapaïen.

⁹ O bango bayènèki grâce yango ephèbaki na nga, Jacques, Céphas, na Jean, bango batangibaki bwe, makonchi, bango baphilaki banga na Barnabas o mabòkò, na bayebizaki na banga bwe, banga bokiè o ma bapaïen, na bango o ma bakubibi.

¹⁰ Banga botindibaki kobona tonga n’iyèbatele bayoko, nà nga kielaki kobona tètè kot’èkielele.

¹¹ Ko okomo Céphas apholaki o Antioche, nga taki na wango tètè n’ètèlèlè a mobambi tonga wango abèki na mokalo, tonga na baphundi bango wango aphundibaki.

¹² Tonga okomo bato bango Jacques atindaki babach’ophola ka, wango adyaki bwa o phanyak’a bapaïen, n’adyaki enongo yò na bango, ko o bango bapholaki wango akakwaki nà abomboki otete a bango, tonga wango atilaki bakubibi.

¹³ Nà bana bajuif bakielaki bolengi elenge ko yango bakolizaki nà Barnabas o cha bwango.

¹⁴ Ko, okomo nga yènèki bwe, bango babotambola kot’ètambole o cha mina minyòngò ma nènè ka, nga lobaki na Pierre o michò ma bango bachò bwe: Kò, koncha edi mojuif na k’òdyale och’èdyalele a bapaïen, yena edi odyala edyalele a bajuif ka, na kobona kò tòyicha bochekole bapaïen bwe, bachekwe o edyalele a bajuif bwe?

¹⁵ Ko banga bobotibaki bajuif, na banga bodi odyala bato ba machuma otete a bapaïen ka,

¹⁶ ko, banga boyebe bwe, moto adi onyè tonga na matoma ma miyeko ka, bonyè ko n’èchingane a Jésus Christ, nà banga bango bochinganaki Jésus Christ echoko o na banga tònyè o ch’èchingane a Christ yango, odya tonga na matoma ma miyeko ka, mòchi moto nyò mò adyale odyala monyèki tonga na matoma ma miyeko ka.

¹⁷ Ko, mo banga boyenge tonga n’idyala banyèki o cha Christ, ko banga boyènibe bwe, bodi bato ba machuma, Christ adi bwè b’ichala na bè machuma? Twa nyè.

¹⁸ Ko, mo nga phote botonge ndako yango nga phanzaki, owana nga koncha nga yènize bwe, nga edi tètè moloti a miyeko.

¹⁹ Tonga nga koncha nga biwa o ebati a miyeko, tonga n’ilòngò o bocho ba Nzambe, nga bikòtiba o awèchinye elongo na Christ.

²⁰ Na kinòwa nga koncha nga di dyò bomwè o cha nga twa, edi Christ koncha elòngò o cha nga, ko bomwè bwango bodi o cha nchoto a nga bu, nga lòngò bwango o ch’èchingane o cha Mwan’a bole a Nzambe, koncha wango edingaki nga, n’aphèki nchoto a wikoncha tonga na nga.

²¹ Nga di obwaka grâce a Nzambe ka, tonga mo echwa etube tonga na miyeko, kobona bowe ba Christ bodi bwabona.