Ephésien 4 - Mina ma Nzambe 1947

Bikiètè b’èbuliki bichò bidi ko ekiètè yò bona.

¹ Nga, moto monyoli a Mokonchi, nga teye beni bwe, botambolaka o mochalo mwango wango abwangaki beni ko bato banyèki bona,

² botulizaka manchoto ma beni kot’ètulize, bodyalaka na chabo, botikanaka beka bibè o ch’elumba,

³ bomèkaka bochobe mitema ma beni o ch’Eyaye ko yò kot’èmèkele na bongièngèlè ba phi.

⁴ Nchoto ko dyò, n’Eyaye ko yò ko beni bobwangi baki o ichena dyò bona,

⁵ na Mokonchi ko mò, n’echingane ko yò, n’iyiniba ko dyò, na Nzambe ko mò, wango adi Chango a bachò,

⁶ koncha wango edi ikolo na bachò, o phanyak’a bachò n’o ch’a bachò.

⁷ Baphèki moto ikika o phanyak’a bèni grâce ko momèko ma matabichi ma Christ madi bona.

⁸ Echoko wango alobaki bwe. ”Wango akièki ikolo, wango akwaki bato ba monyoli bakama, na wango aphèki bato matabichi yango.”

⁹ ”Wango akièki ikolo”, etik’a mawè mango edi nde, yango echakole bwe, wango achundaki o binongo byango bidi o ch’a che nò dyo.

¹⁰ Koncha wango echundaki edi koncha wango ekondelaki dyòkò ikolo na makolo machò, echoko wango tatondiza beka bichò yango.

¹¹ Wango atikaki bana baninga o mochalo ma bapôtre, bana baninga mibandi, bana baninga badikichi, bana baninga babateli, na bayekuchi.

¹² Tonga wango adingaki bolòngele bato b’èchwa bwe, bakielize baninga mochalo m’itonga nchoto a Christ,

¹³ kokoko ncho bèni bachò tophola echingane ko yò, na bokièngu ba Mwan’a bole a Nzambe, ko moto wango ebitunyola bichò adi monyèki bona kokoko ncho bokokele ba Christ.

¹⁴ Echoko bèni tidyali ko bana baki bango badi biyelele bona yango, baphanchibaki na mawò ma bakoncha bango bakiele bolèngi, enongo ichukwiza baninga n’ichena,

¹⁵ ko bodyale ko bato bango balobe mawò ma nènè bona, na bakatè o beka bichò o ch’elumba, kokoko ncho ma mutu wango edi Christ,

¹⁶ nchoto ichò inyèki o ch’a wango itongamaka na nguli na miongo michò, myango michangane o bikiètè ba dyango ko byango bidi na phocha bona, tonga n’ikatiza nchoto dyango koncha o ch’elumba.

¹⁷ Kobona nga lobe na nga teye beni titingi o kombo a Mokonchi bwe, tokielake ko ekielele yango bato bach’owoka mawò ma Nzambe ka bakiele bona, bango batambole o ch’a bichimunye ba bango b’iphwa,

¹⁸ bolèngi ba bango babikola o ch’a boyi, badi bato biyenda o bomwè ba Nzambe, tonga bango bangotwizaki mitema ma bango, na tonga bomèmè ba bango,

¹⁹ badi oyeba bowoke mina minyòngò dyòkò ka, bayilelaki manchoto ma bango makoncha tonga n’ikiele matoma mabè machò, na bakiele matoma ma choni, ko moto a monyimi bona.

²⁰ Ko beni, beni bobomèchènè na Christ kobona ka,

²¹ mo beni bowokaki tonga na wango, na badikizaki beni o ch’a wango ko nènè edi o ch’a Jésus bona,

²² tonga n’imicha bikumba ba motema b’ikale, mwango modyobo tonga na phongo a mwango,

²³ na boyenga tonga n’iyamba bolèngi o ch’eyaye a beni botemu,

²⁴ na bochwa moto motemu, wango etulibaki ko echw’a nènè edi bona o ch’a Nzambe.

²⁵ Echoko beni totika bwanya yango, na moto ikika taloba na moninga ko nènè, tonga bèni bodi bikiètè ba nchoto dyò.

²⁶ ”Tobèlèke na tokielake machuma”, todimuzake dichò a bucha n’ibèli.

²⁷ Tophèke molemba enongo o ch’a mitema ma beni.

²⁸ Koncha wango ebèki eyibe tayibake dyòkò, akole o mochalo, akiele matoma manyòngò na mabòkò ma wango, tonga n’idwa beka b’iphè koncha wango edi na phocha.

²⁹ Totubizake iwò ibè nyò dyò o ch’a mina ma beni, ko mawò manyongo phencha, mango mayiche bolèndize beni, na mango maphè bato bango bawoke mango grâce.

³⁰ Tochebizake Eyaye Echwa a Nzambe yango ephèbibaki na beni ko ndembo ichungiba kokoko ncho bucha b’ichungiba.

³¹ Embanga, ibèli, boyino, yokela n’èchoki beka bi bichò tidyala mochika na beni, na bobè bochò.

³² Bodyalaka kot’èdyalele na mitema m’èlumba, na bophènè pardon ko Nzambe aphèki beni pardon o ch’a Christ bona.