Colossien 2 - Mina ma Nzambe 1947

Ateye bango, ta bango bakola o iyekol’a bwanya.

¹ Tonga nga dinge beni boyebe bwe, nga di na bita b’èyaye bikuli tonga na beni, na bango badi o Laodicée, na bakoncha bango baboyènè elenge a nga ka bachò,

² echoko mitema ma bango mibwangizibe, okomo bango bachangane o elumba n’o bomandi bochò ba nyèmu na bokièngu yango, tonga n’iyeba mawò ma yiche ma Nzambe Christ,

³ o ch’a wango matabichi ma bophomu na bokièngu bidi bibombibaki bichò.

⁴ Nga lobe mawò ma tonga ta moto nyò mò achukwiza beni n’ichena na mawò ma maphèphi.

⁵ Tonga mo nga di odyala na beni na nchoto ka, eyaye a nga edi na beni, na nga change okomo nga yènè ilòngiba inyòngò dyango ikomande o phanyak’a beni na ngingi èchingane a beni o Christ.

⁶ Ko beni boyambaki Jésus Christ, Mokonchi bona, botambolaka o ch’a mwango.

⁷ Bodyalaka na bochongo na bokataka o ch’a mwango na ngingi o ch’èchingane ko badikizaki beni bona, na botondaka n’èphèlèlè ingòkò.

⁸ Bokiekaka n’ikièngu ta moto nyò mò adyobiza beni na ”bokièngu ba bato” na beka ba bwanya, ko bikumba ba bato bango baluphe beka ba che bona, ko ”mayekola ma bana ba che bona”, edi odyala Christ ka.

⁹ Elenge a Nzambe echo èbike n’ètonde o ch’a wango.

¹⁰ Na beni bobitonda o ch’a wango, koncha wango edi mutu ma mikonchi ma biyaye michò na nguli a myango echò.

¹¹ Beni bokubibaki na wango dyòkò na bokubibe bwango bodi odyala ba mabòkò ka, okomo beni bomichaki motema mokale o ch’ikubiba a bato ba Christ,

¹² bokundibaki na wango o ch’a may m’iyiniba, bawumuzaki beni na wango dyòkò n’èchingane a nguli a Nzambe, yango wango awumuzaki Jésus o bowe.

¹³ Na beni bango bobèki bawaki dyòkò tonga na machuma ma beni tonga na mitema ma beni mibodyala mikubibaki ka, wango alòngizaki beni o ch’a wango, o chima wango aphèki bèni pardon a machuma ma bèni machò,

¹⁴ n’aphanchaki iwò, dyango ikòtibaki na mabòkò o miyeko, dyango iwunduzaki bèni, dyango wango amichaki, n’akòtèlèki dyango awèchinye,

¹⁵ na wango akatulaki mikonchi ma biyaye beka ba bita ba myango, na nguli a myango echò, n’atikaki myango o ch’a choni o phanyak’a bachò, na wango achangaki ikolo na myango.

¹⁶ Tochimitake bwe moto nyò mò achambe beni botòtè tonga na bekidya, nyò tonga na beka b’inywa, nyò tonga na yenga monè, nyò tonga na woli motemu, nya tonga na chono,

¹⁷ tonga beka bichò bi bidi ko iyilingi phencha ba beka byango tiya, ko, nchoto edi a Christ.

¹⁸ Tochimitake moto nyò mò amiche iwut’a beni a bawunchi, iyò wango adinge bokiele kobona o wango adikize ”elenge n’ituliza nchoto”, nyò tonga n’ichambela bangelo iyò nyò wango achimunye bemwa, tonga wango akondize nchoto bwabona, tonga na motema ma nchoto,

¹⁹ wango adi obika ma koncha wango edi mutu ka, nchoto ichò na miongo na chicha idwe ekatele a dyango o ch’a Nzambe.

²⁰ Mo beni bowaki na Christ o ch’a ”mayekola” ma bana ba che, batike miyeko ko elenge yango beni bolòngòki o ch’a beka ba che bona dyòkò:

²¹ ”Tokwake, tomekake, tokulanake n’eyeka”,

²² beka byango bichò bikànibaki tichila o byango bidi binyakwaki ko miyeko na mayekola ma bato bona, mbekende?

²³ Beka bichò bi bidi na ”bolengi” o michò ma bato, bango bachòlò beka byango bango bachambele na byango bango makoncha, tonga ”n’ituliza manchoto” na tonga n’ichèbiza mango, na botochibe bodi o ch’a byango twa, bawokolo motema ma nchoto phencha.