Colossien 1 - Mina ma Nzambe 1947

Paul abèche bana ba Nzambe. Achange tonga n’èchingane a bango. Achakole bwe, Christ adi elenge a Nzambe, na adi mutu m’èbuliki a Nzambe. Achange tonga n’ichèbo dyango itaki na wango tonga na mina monyòngò.

¹ Paul, apôtre a Jésus Christ tonga na bodingo ba Nzambe na Thimothée, mwanyango a bole èbati a Nzambe a bèni,

² o ma banyango ba baphele o Christ b’èchwa, na b’ètungu, bango badi o Colosses. Tika grâce edyale na beni na phi a Nzambe, Chango a bèni na Mokonchi Jésus Christ.

³ Banga bophè Nzambe ingòko, Chango a Mokonchi ma bèni, Jésus Christ o mayonga ma banga tonga na beni kokoko,

⁴ tonga banga bowokaki echingane a beni o ch’a Jésus Christ, n’èlumb’a beni, yango beni bodi na yango na bato b’èchwa bachò,

⁵ tonga n’ichena dyango idi ibombibaki na beni ikolo, dyango beni bowokaki bocho o mawò ma nènè o mina minyòngò,

⁶ myango mipholaki o ma beni na myango midi o ch’echò, na myango mibote mpuka na mikate ko myango mikielaki o phanyak’a beni kokoko o bucha ba tabocho bona, okomo beni bowokaki myango na bomèchènèki grâce a Nzambe o ch’a nènè,

⁷ ko beni boyekolaki a Epaphras bona, mochali a botoma bò na banga, akonde, na modikichi ètungu a Christ tonga na beni,

⁸ na wango achakolaki nà na banga elumb’a, beni o ch’Eyaye,

⁹ echoko banga bobokondo boyonga tonga na beni ka yango, o bucha bwango banga bowokaki iwò dyango kokoko ncho kinòwa, na banga boyonge bwe, beni botonde na bokièngu ba bodingo ba wango, na bolèngi na bophomu b’Eyaye bichò,

¹⁰ na botambole ko etambole yango Mokonchi modinge bona, na kobona bochangize mwango o beka bichò, na bobote mpuka a matoma manyòngò machò, na bokate o ch’a bokièngu ba Nzambe,

¹¹ na bolènde na nguli echoko ko nguli a botochibe ba wango edi bona, tonga n’idikiza ngingi na chabo o beka bichò.

¹² Na bophè Chango ingòkò na moni, koncha wango enyèzaki beni bodyale bakabi ba beka b’itike ba b’èchwa o phololo.

¹³ Koncha wango emichaki bèni o nguli a bowe, n’atikaki bèni o bokonchi ba Mwan’a bole a wango akonde.

¹⁴ O ch’a wango bèni bodi n’ichungiba, pardon a machuma ma bèni.

¹⁵ Yengu koncha edi elenge a Nzambe, wango oyèniba ka, abotibaki makuba machò bocho.

¹⁶ Beka bichò bitulibaki tonga na wango, byango bidi ikolo, na byango bidi o che, beka byango biyènibe na beka byango bidi oyèniba ka, nyò bakiti ba botochibe, nyò bakomandi nyò mikonchi, nyò nguli o phanyak’a biyaye, beka bichò bitulibaki na wango na tonga na wango.

¹⁷ Wango adi beka bichò bocho, na beka bichò bibike o ch’a wango,

¹⁸ na wango adi mutu ma nchoto, dyango idi ebuliki a Nzambe, wango adi bophotiche, mwe tabocho o phanyak’a bawe, echoko wango tadyala moto a tabocho o beka bichò yango.

¹⁹ Tonga ebèki enyèki na Nzambe bokokele bochò todyala o ch’a wango.

²⁰ Na Nzambe tanyèza beka bichò na wango dyòkò, o chima wango atubizaki phi tonga na malongo ma wango awèchinye, nyò beka byango bidi ikolo nyò beka byango bidi o che.

²¹ Na beni dyòkò bango bobèki mochika na wango ikale, na beni bobèki bandoli ba wango o ch’a mitema, tonga na matoma mabè,

²² ko kinòwa wango awutaki tonga na beni na bowe ba nchoto a wango, tonga n’iyicha botike beni o bocho ba wango n’èchwa, banyèki n’iwò twa,

²³ mo beni bobandame n’èchingane, etungu na ngingi olangwa ichen’a mina minyòngò, myango beni bowokaki ka, niè, na myango michakwibe o bokuba ba nch’a ch’ikolo bocho, nga Paul, nga bitikiba mochali a mina minyòngò myango.

²⁴ Kinòwa nga change o ch’a makambi ma nga tonga na beni, na nga tunyole makambi ma Christ o nchoto a nga, mango mawuli o nchoto a wango, dyango idi ebuliki a Nzambe.

²⁵ Nga bitika mochali a yango, ko mina m’ikaba beka ba Nzambe myango wango aphèki nga tonga na beni midi bona, na bochakole mawò ma Nzambe o binongo bichò kot’èchakole,

²⁶ mawò ma yiche mango mabèki mabombibe o bophotiche ba mabiko na mangomba, ko, kinòwa mayènibe na bato b’èchwa ba wango,

²⁷ tonga Nzambe aingaki boyebize bango bomandi ba botochibe ba mawò ma yiche bidi bwe o phanyak’a bato bango bach’owoka mawò ma Nzambe ka, ”mango madi Christ o ch’a beni, ichen’a botochibe”,

²⁸ wango banga bochakole na boteye moto ikika, na bodikize moto ikika na bokièngu bochò, echoko banga toyicha botike moto ikika o bocho ba wango ko moto monyèki bona o ch’a Jésus Christ yango.

²⁹ Tonga n’iwò dyango nga dyòkò nga lèki ekielele mochalo mokuli ko nguli a wango edi bona, yango ekiele mochalo o ch’a nga kot’èkielele.