Bimwa 8 - Mina ma Nzambe 1947

Mwan’a gbata amiche ndembo a mochabali. Jean ayènè bangelo mochabali na malimba mochabali. Bangelo batabocho banè bawule malimba.

¹ Na okomo Mwan’a gbata amichaki ndembo a mochabali, ikolo idimelaki myò ndambo elembe a bucha.

² Na nga yènèki bangelo mochabali bango badi chu o bocho ba Nzambe, baphèki bango malimba mochabali.

³ Na wona angelo ayakaki, atèmèki chu kbamu na autel, bwango bodi o bocho ba trône, na wango abèki na kobo a or na mananachi, baphèki wango mananachi makama, tonga wango tachanginya mango na mayonga ma bato b’èchwa bachò o autel a or, bwango bodi o bocho ba trône.

⁴ Na nchumbele a meya ma mananachi na mayonga ma bato b’èchwa bichònòki o ebòkò a angelo na bitutaki o bocho ba Nzambe.

⁵ Angelo akwaki kobo a mananachi, atondizaki wango na meya ma autel, n’awuchaki myango o che. Etubaki makingo na biluncha na bangachi na che enyalwaki.

⁶ Na bangelo mochabali bango babèki na malimba mochabali balongeleki tonga n’idyala banyèki n’iwula mango.

⁷ Okomo angelo atabocho awulaki ilimb’a wango, etubaki manyali na meya, bachanginyaki byango na malongo, na bawuchaki byango o che. Ebati a che a ichato edikaki na ika ichato a milange idikaki, na biyembu bichò bidikaki.

⁸ Na angelo mobandi awulaki ilimba. Etubaki ko bokoli bonè, bwango bololaki bona, na bowuchibaki o may manè, na ebati a ichato a may manè echekwaki malongo.

⁹ Na beka ba bomwè bichò byango bibèki o cha may manè byango biwaki o ika dyò a ichato, na ika a ichato a machwa idyoboki.

¹⁰ Na angelo a ichato awulaki ilimba. Na moti monè mwango mololaki mochònòki ikolo, mokwaki ikolo na bibale na banchomba.

¹¹ Kombo a moti mwango: Absinthe (edi motwatwa Bololo) ika a may a ichato ichekwaki bololo, na bato bakama bawaki tonga may machekwaki kota bololo kobona.

¹² Na angelo a inè awulaki ilimb’a wango. Na bucha na wòli na mieti bibètibaki, na kobona ika a ichato a byango idyoboki, kobona phololo a mieche na mikolo edyoboki.

¹³ Na nga yènèki na nga wokaki ngongonyoli awumbwaki o phanyak’a ikolo na che, alobaki nikichi bwe: ”Mawa, mawa, mawa, ma bakoncha bango badyale o che tonga na malimba machato mango bangelo tawula.”