Bimwa 5 - Mina ma Nzambe 1947

Eboto a buku na mandembo mochabali.

¹ Na nga yènèki o ebòkò èlomi a koncha wango edyaki bwa o trône buku bokòtibaki n’ocha mwè n’omabèkè, bokangibaki na mandembo mochabali.

² Na nga yènèki tètè angelo a nguli, wango alobaki nikichi bwe: ”Edi monyèki n’iwutola buku n’imicha mandembo ma bwango nda?”

³ Ebèki moto nyò mò o ch’ikolo nyò o che nyò o cha che iyicha bowutole buku tonga n’iyènè o cha bwango twa.

⁴ Iwò dyango nga lelaki elelele ebèki tonga edi moto iyicha bowutole buku n’iyènè o cha bwango twa.

⁵ Ko wona phomba alobaki na nga bwe: ”Tòlelake, kieka lion a dia a Juda, eyana a tina a David, abiwuncha, wango ayiche bowutole buku n’amiche mandembo ma bwango.”

⁶ Na nga yènèki mwan’a gbata ayènibaki ko mobomibaki bona abèki chu otete a banyama banè na baphomba, wango abèki na machèke mochabali, na michò mochabali, myango edi wana biyaye ba Nzambe mochabali, byango bibitindiba o ch’echò.

⁷ Ko wango akièki, akwaki buku o ch’èbòkò èlomi a koncha wango edyaki bwa o trône.

⁸ Okomo wango achil’okwe buku, banyama banè na baphomba mako mabale na banè bachundaki na mangoto o bocho ba mwan’a gbata, moto ikika abèki na harpe na bakobo ba or, bango bango batondaki na beka ba mananachi, edi wana mayonga ma bato b’èchwa.

⁹ Bango bayembaki eyembo etemu, yango elobe bwe: ”K’òdi monyèki n’ikwa buku na bomiche mandembo ma bwango, tonga k’obomibaki, na k’òchombaki bato na Nzambe na malongo ma kò, bato ba madia machò, ma bilobele bichò, na bato bachò moto elenge elenge.

¹⁰ Na k’obichekola banga mikonchi na badikichi ba Nzambe a Banga tonga n’ikomanda o che.”

¹¹ Na o ch’èmwa a nga, nga yènèki na nga wokaki makingo ma bangelo bakama okbòlòkò a trône, na o phanyak’a banyama na baphomba, na bokama ba bango bobèki des myriades de myriades et des milliers de milliers (motwatwa: 100,000,000,000,000),

¹² na bango balobaki nikichi bwe: ”Mwan’a gbata wango ebomibaki, wango adi monyèki n’iyamba chwa, bomandi, na bokièngu, na nguli, na bokumu na botochibe.”

¹³ Na beka byango bitulibaki o ch’ikolo na o che, na o cha che, na o may manè, na beka bichò byango bidi o cha byango, nga wokaki byango bilobaki bwe: ”Koncha wango edi bwa o trône bango na Mwan’a gbata, tika bango bayambe botochibe na bokumu na nguli biteneli o biteneli.”

¹⁴ Na banyama banè balobaki bwe: ”Amen”, na baphomba bachundaki na mangoto na bachambelaki.