Bimwa 4 - Mina ma Nzambe 1947

Jean ayènè kiti a Nzambe o ch’èmwa ikolo.

¹ O chima yango nga kiekaki, nga yènèki ekuki a ch’ikolo ebèki phololo. Ikingo a tabocho dyango nga wokaki, dyango ibèki ko eloncho a ilimba bona, dyango ilobaki na nga bwe: ”Kondela oye woni, na nga tayènèza kò beka byango biyengotube.”

² Na nga chekwaki o ch’Eyaye tètè dyòlò. Na nga yènèki trône (motwatwa kiti) a Nzambe o ch’ikolo, na moto mò adyaki bwa o wango.

³ Elenge a koncha wango edyaki bwa o wango ewulaki iboko a jaspe, n’iboko a sardoine, na ngubi wango ewulaki emeraude adyongaki trône.

⁴ Batrône mako mabale na banè babèki okbòlòkò a trône, edyaki bwa o bango baphomba mako mabale na banè, bango bachwaki bilamba biphumbaki na bangula ba or babèki ikolo na mitu ma bango.

⁵ Na ngachi na makingo na biloncha bichònòki o trône. Mienda mochabali milolaki o bocho ba trône myango edi wana biyaye ba Nzambe mochabali.

⁶ Nà o bocho ba trône ebèki ko may manè ma tatala a cristal bona. Otatete a trône na okbòlòkò a trône ebèki banyama banè, bango batondaki na michò n’obocho n’ochima.

⁷ Nyama atabocho awulaki lion, nyama wango ebandaki awulaki chango a ngombo, nyama wango ebandaki wango a mobandi bocho ba wango bowulaki ko moto bona, nyama wango epholaki inè awulaki ngongonyoli awumbwe bona.

⁸ O cha banyama bachò banè ba moto ikika abèki na maphaphu machamano, o maphaphu mango matondaki na michò n’okbòlòkò n’ocha mwè, na bango balobaki na mieche na mikolo, baboyo ka, bwe: ”Echwa, Echwa, Echwa edi na Mokonchi, Nzambe, Konchayombo, koncha wango ebèki, na edi, na oteya.

⁹ Na o banyama baphè ingòko na botochibe na bokumu na koncha wango edi bwa o trône n’adi na bomwè biteneli o biteneli,

¹⁰ baphomba mako mabale na banè bachunde na mangoto o bocho ba koncha wango edi bwa o trône, na bachambele koncha wango edi na bomwè biteneli o biteneli, na bawuche bangula ba bango o bocho ba trône, na balobe bwe:

¹¹ ”Kò, Nzambe a banga, Mokonchi, k’òdi monyèki n’iyamba bokumu na botochibe na chwa, tonga k’òdi motuli a beka bichò, beka bichò bi bitubaki na bitulibaki edi tonga na bodingo ba kò.”