Bimwa 3 - Mina ma Nzambe 1947

Mikanda ma bibuliki o Sardes na Philadelphie na Laodicée.

¹ Kòtè o ma angelo a ebuliki o Sardes bwe: ”Elobe koncha wango edi na biyaye ba Nzambe mochabali na mièti mochabali. Nga yebe matoma ma kò, kombo a kò eyènènè bwe, k’òdi na bomwè, ko, k’òdi mowaki.

² Wumwa, olendize beka byango bibèki mboli n’iwa. Tonga nga ch’odwa matoma ma kò manyèki o bocho ba Nzambe ka.

³ Obatelaka bwe k’òbiyamba mawò na k’òbiwoka mango, na yencha motema ma kò, na okiekaka n’Ikièngu. Mo k’òdi obatelaka, owana nga taya o ma kò ko moyibe bona, na kò tiyebi komo o chonga yango nga taya.

⁴ Edi tonga k’odi na bana bato bango bach’okuliza biphebo o bilamba ba bango ka, na bango tatambola o ch’èlongo a nga na bilamba biphumbaki, tonga bango badwebaki banyèki.

⁵ Koncha wango ewunche (maphèphi) tachweza wango bilamba biphumbaki, na nga tiphanchi kombo a wango o mokanda ma bomwe, na nga tayebiza kombo a wango o bocho ba Chango a nga na bangelo ba wango.

⁶ Koncha wango edi na matwe m’iwoka, awokaka mawò mango Eyaye elobe o cha bibuliki.”

⁷ Kòtè o ma angelo a ebuliki o Philadelphie bwe: ”Elobe kobo Mwè Echwa, Mwè Nènè, koncha wango edi n’iphongola a David, o wango adiphole edi moto nyò mò iyiche bodiphe twa, na o wango adiphe, edi moto nyò mò iyicha bodiphole twa.

⁸ Nga yebe matoma ma kò. Kieka, nga bitika ekuki a kò phololo, edi moto nyò mò iyicha bodiphe yango twa. K’òdi nguli ekama twa, ko k’òbatelaki mawò ma nga kot’èbatele, na k’òbotata kombo a nga ka.

⁹ Kieka nga dinge botike bana baninga bango badi o synagogue a Satana o mabòkò ma kò. Bana baninga o elongo a bango balobe bwe, bango edi bajuif ko edi bwanya, kieka nga dinge bokiele kobo, nga tatika bango bakwabane o cha makolo ma kò, na kobona bango tayeba bwe, nga leki edingele kò.

¹⁰ Tonga k’òbatelaki moyeko ma nga n’ichimbo, kobona na nga tabatela kò, na nga taphakola kò o cha bobiko bokuli ba bomekibe, bwango tòphola o che echò tonga n’imeka bè che bachò.

¹¹ Kieka nga ya dyòlò, obatelaka eyeka yango edi na kò, kot’èbatele, ta moto nyò mò akwa ngul’a kò.

¹² Koncha wango ewunche (maphèphi) nga tachekola wango adyale ikonchi a temple a Nzambe a nga, na wango dyò titubi o cha wango, na nga takòtè kombo a Nzambe a nga na kombo a Jérusalem etemu, na kombo a nga o ma wango, Jérusalem yango techònò o ma Nzambe a nga na techunda.

¹³ Koncha wango edi na matwe m’iwoka, awokaka mawò mango Eyaye elobe o cha bibuliki.”

¹⁴ Kòtè o ma angelo a ebuliki o Laodicée bwe: ”Elobe kobo koncha wango edi bwe: Amen, ndèngè ètungu na ndèngè a nènè, mwè bophotiche a bokuba ba Nzambe.

¹⁵ Nga yebe matoma ma kò. K’òdi nyò meya nyò phio twa, nga dingaki bwe, ibè k’òbèki nyò na meya nyò phio.

¹⁶ Ko kinòwa k’òdi mo ko na tutuku phencha, echoko o nga talwa kò o cha muna ma nga yango.

¹⁷ K’òlobe nchu bwe: Nga di mandi, bomandi ba nga buleka, nga di dyò phocha eyeka nyò yò twa, nchene k’òdi tètè o cha bobongi, bokambi, boyoko na eboti na bolumbu.

¹⁸ Na kobona nga teye kò bwe, chomba or wango ebichònò o meya, tonga n’ichekola kò odyale mandi, mòchi k’ochombe bilamba biphumbaki tonga n’ichwa, mòchi choni a bolumbu ka kò odyale oyènènè ka, ochombaka minò m’ikana o michò, mòchi k’oyènè beka.

¹⁹ Bato bachò bango nga leki edingele nga tinde bango, na nga phè bango mateyo m’iphèbo. Kobona yencha motema kot’èyenchele.

²⁰ Tika nga di chu o bili b’èkuki na nga kotele. Koncha wango ewoke ikingo a nga na wango adiphole yango, na kobona nga takola o ma wango na ba wango tòdya enongo yò.

²¹ Koncha wango ewunche (maphèphi) nga tadyèza wango bwa enongo yò na nga o kiti a nga, motwatwa ko nga koncha na wunchaki bichò bona na ya bwa o kiti a Chango a nga.

²² Koncha wango edi na matwe m’iwoka, awokaka mawò mango Eyaye elobe o cha bibuliki.”