Bimwa 20 - Mina ma Nzambe 1947

Satana akangibe. Bowumwele ba tabocho. Bokonchi ba baphela motuku mò. Satana awutwibe dyòkò. Botòtè ba chima o che.

¹ Na nga yènèki angelo mò achònòki ikolo, achundaki o che, abèki na phungula a ibela a meya mitenila o ebòkò a wango.

² Na wango akandaki dragon mokoto ma mochèmè, edi wana Molemba na Satana, akangaki wango tonga n’idyala o cha bokango baphela motuku mò.

³ N’awuchaki wango o ch’ibela a meya mitenila, n’adiphaki dyango, n’atikaki ndembo o ekuki a ibela, yango ebèki ikolo na wango, mòchi wango adyale dyò bolenguza bato ka, kokoko ncho o baphela motuku talekana; na chima wango taphinchwiba dyòkò elembe eki.

⁴ Na nga yènèki batrône baphèki bakoncha bango badyaki bwa o bango chwa ichamba botòtè. Na nga yènèki biyaye ba bakoncha bango bakiènibaki makingo tonga na mawò ma Nzambe na mawò mango bango bakubolaki tonga na Jésus, nà bakoncha bango batonaki bochambele nyama a ibèli, na batonaki bokòtibe ndembo a wango o bocho nyò o ebòkò, na bango bachekwaki na bomwè, na bachekwaki bakomandi o cha Christ baphela motuku mò.

⁵ Ko bana baninga bakbwi babophola o bomwè ka, kokoko ncho o baphela motuku mò talekana. Ye edi bowumwele ba tabocho.

⁶ Edi moni n’èchwa na koncha wango edi n’ika o cha bowumwele ba tabocho. Tonga bowe bodi dyò chwa ikolo na bango twa; bango tadyala ko badikichi ba Nzambe na Christ, na bango takomanda o cha wango baphela motuku mò.

⁷ Na okomo baphela motuku mò talekana, Satana tawutwiba dyòkò o cha monyoli ma wango.

⁸ Na wango tatuba o dindo tonga n’ilenguza bato bachò bango badi o matumu ma che manè, nà o Gog na Magog, na takonginya bango tonga na bita, na bokama ba bango badi ko dyèlò a may manè bona.

⁹ Na bango takonginya bato ba che bachò, tonga n’ikomba enongo o b’èchwa na mboka akonde, ko meya michònòki ikolo, mikwaki o che na mitumbaki bango.

¹⁰ Na Molemba koncha wango elenguzaki bango abwakibaki nà wango o cha meya ko myango, na nyama a ibèli nà mobandi ma bwanya. Na bango tachèbè na mieche na mikolo biteneli o biteneli.

¹¹ Na nga yènèki trône mophumbaki monè na koncha wango edyaki bwa o wango, na che na ikolo bilemwaki tonga na bocho ba wango, ebèki dyò enongo eki tonga na byango twa.

¹² Na nga yènèki bato bawaki bakiaki na bananè batèmèki chu o bocho ba trône, na mabuku madiphwibaki, ko badipholaki buna bò, ebèki buku ba bomwè na bato bawaki bachambibaki botòtè ko ekòtibaki o mabuku bona, tonga na matoma ma bango.

¹³ Na may manè matubizaki bibembe ba mango, na bowe na bokonchi ba bwango botubizaki bibembe ba bango, na bango bachambibaki botòtè ko matoma ma bango mabèki bona.

¹⁴ Na bowe na bokonchi ba bowe bobwakibaki o ch’ibela a meya mitenela, ye edi bowe ba mobandi, ibela a meya mitenela.

¹⁵ Na koncha wango ebokòtiba kombo a cha buku ba bomwè ka, tabwaka wango o ch’ibela a meya mitenela.