Bimwa 2 - Mina ma Nzambe 1947

Mikanda ma bibuliki o Ephése, Smyrne, Pergame na Thyatire.

¹ Kòtè o ma angelo a ebuliki o Ephése bwe: Elobe koncha wango edi gbo na mièti mochabali o ch’èbòkò èlomi a wango, koncha wango edyonge bidunga biphaka babuche mochabali.

² Nga yebe edyalele a matoma ma kò, na mochalo ma kò, na ichimbo a kò, na nga yebe bwe, k’òdi okolana o nch’a bato babe ka, k’òbimeka bakoncha bango balobaki bwe, bango badi bapôtre, ko ebodyala kota bapôtre ka, k’òbiyènè bwe, bango babèki bebwanya.

³ K’òdi n’ichimbo, k’òchèbèki tonga na kombo a nga ko, k’òbokondo ka.

⁴ Ko iwò dyango nga woche kò edi di: tonga k’òkakwaki n’èlumba a kò atabocho.

⁵ Obatelaka ekwelele yango k’òkwaki, yencha motema ma kò, ophote bokiele matoma mango k’òkielaki o bobiko ba kò batabocho. Mo k’òtoni bokiele kobona, owana nga taya tonga n’iyèmicha edunga iphaka buche o ma kò.

⁶ Ko, iwò inyòngò dyango idi o ma kò edi tonga k’òyine matoma ma Nicolaites, mango o na nga yine.

⁷ Koncha edi na matwe m’iwoka, awokaka mawò mango Eyaye elobe o cha bibuliki. Koncha wango ewunche (maphèphi) nga tadyeza wango mbuka a molange ma bomwè, mwango modi chu o Paradis a Nzambe.

⁸ Kòtè o ma angelo a Smyrne bwe: Kieka, elobe kobo koncha wango edi mwè tabocho na mwè chima, koncha wango ebèki mowaki ko achekwa na bomwè.

⁹ Nga yebe matoma ma kò na maphanu ma kò, na boyoko ba kò, nchène k’òdi wana mandi, nga yebe mbèchi yango k’òbèchibaki na bakoncha bango balobe bwe, bango badi bajuif, ko bango edi odyala bajuif ka, ko bango badi synagogue (Ndako) a Satana.

¹⁰ Totilake ichèbo dyango tita na kò. Bokieka Molemba takana bana baninga o phanyak’a beni o monyoli tonga n’itika beni bwe, bodyale bamekibaki, na beni tòdyala o ch’ikambi machu dyomu.

¹¹ Odyalaka n’ètungu kokoko ncho o bowe, owana nga taphè kò ngul’a bomwè. Koncha wango edi na matwe, awokaka mawò mango Eyaye elobe o cha bibuliki, Koncha wango ewunche (maphèphi), bowe ba mobandi tiyichi bodyòbize wango.

¹² Kòtè o ma angelo a ebuliki o Pergame bwe: Elobe kobo koncha wango edi na mongòwa ma mèngo na phe na phe:

¹³ Nga yebe enongo yango k’òdi odyale yena, edi enongo a kiti a Satana. K’òbèki ngingi na kombo a nga, k’òbotata echingane a nga ka, nyò okomo babomaki ndèngè a nga ètungu, kombo a wango Antipas o phanyak’a beni enongo yango Satana adyale.

¹⁴ Ko, nga di n’iwò na kò, tonga k’òdi na bana baninga, bango badi ngingi o ch’èchingane a Balaam, koncha wango edikizaki Balak bwe, atike ibaku a iboko o nch’a bana b’Israël, mòchi bwe bango badye nyama a bangoncha a sacrifice, na bakiele bochembi.

¹⁵ K’òdi dyò na bana baninga bango bachingane iyekol’a Nicolaites elenge ko yango.

¹⁶ Yencha motema ma kò, mo kobona twa, dyòlò nga taya o ma kò na nga tamana na bango na mongòwa mwango modi o muna ma nga.

¹⁷ Koncha wango edi na matwe m’iwoka, awokaka mawò mango Eyaye elobe o cha bibuliki. Koncha wango ewunche (maphèphi) nga taphè wango manne ma yiche, na nga taphè wango iboko iphumbaki, o ikolo na iboko dyango ebikòtiba kombo, edi moto nyò mò iyeba kombo yango twa, eyebe yango ko koncha wango eyambe dyango.”

¹⁸ Kòtè o ma angelo a ebuliki o Thyatire bwe: ”Ye elobe Mwan’a bole a Nzambe, koncha wango edi na michò ko milebu ma meya bona, na makolo ma wango mawule edunga ekalebane.

¹⁹ Nga yebe matoma ma kò, n’èlumb’a kò, n’èchingane a kò, na mochalo ma kò, na chabo a kò, na matoma ma kò ma chima moleki mango ma bocho.

²⁰ Ko, nga di n’iwò na kò, edi tonga k’ònèkizaki mwatò kombo Jézabel, wango koncha atange nchoto bwe, adi mobandi ma Nzambe na modikichi, ko wango alenguze bachali ba nga, adikize bango nch’ikiela bochembi, n’adyeze bango banyama ba bangoncha basacrifice.

²¹ Nga phèki wango bobiko b’iyencha motema bwe, atike bochembi, ko wango odingo bowoke ka.

²² Bokieka nga tabwaka wango nywa o tange a bokono, na nga takòniza bakoncha bango bakiele bochembi na wango bokono bokuli, mo bango odinga boyenche mitema o nch’a matoma ma bango mabe ka.

²³ Nga taboma bana ba wango, na kobona bibuliki bichò tiyeba kot’èyebele bwe, nga di koncha wango emeke ngophele na mitema, na nga taphè moto ikika o phanyak’a beni ko matoma ma beni madi bona.

²⁴ Ko na beni bana baninga bango bodi o Thyatire, beni bango bobokola o cha iyekola dyango ka — ko bango balobe bona bwe, chòkòtò a Satana — nga lobe na beni bwe, nga di dyumba akbwi iyaka ikolo na beni twa, nga lobe mo ko bwe,

²⁵ bodyalaka ngingi o edyalele yango edi na beni kokoko ncho a nga taya.

²⁶ Koncha wango ewunche (maphèphi) n’akiele matoma ma nga n’ètungu kokoko ncho o bochukele nga taphè wango chwa ikomanda bapaïen.

²⁷ Wango tayenda bango na motongo m’èdunga, na wango tabonza bango ko babonze mbeya bona,

²⁸ motwatwa ko nga yambaki chwa yango na Chango a nga bona, na nga taphè wango moti ma ndondo.

²⁹ Koncha wango edi na matwe m’iwoka, awokaka mawò mango Eyaye elobe o cha bibuliki.”