Bimwa 17 - Mina ma Nzambe 1947

Mwatò a bochembi ikolo na nyama a ibèli. Mwan’a gbata ayiche.

¹ O phanyak’a bangelo mochabali bango babèki na bakobo mochabali wona mò ayakaki n’alobaki na nga bwe: ”Yaka woni, nga tadikiza kò echambibe yango mwatò a bochembi achambibe botòtè ba wango; mwatò wango edi bwa ikolo na may manè

² edi matò wango mikonchi ma che mikolaki na wango, na wango alangizaki bato ba che na du vin a wango a bochembi.”

³ Chima wango akambizaki nga o ch’èyaye o enongo a bobe. Na o enongo yango, nga yènèki mwatò adyaki bwa ikolo na nyama a ibèli motelaki, wango atondaki na makombo ma bichòki, na wango abèki na mitu mochabali na macheke dyomu.

⁴ Na mwatò achwaki bilamba ba pourpre na ecarlate (edi motwatwa bilamba bitelaki moto elenge elenge) na wango achwaki beka ba or, maboko manywayòngò ma motuya, na mayaka, bichò bi ebèki beka bikalibane. Wango abèki na buku ba or, bwango botondaki na beka bibe, na beka ba wango ba bochembi ba mbindo.

⁵ O bocho ba wango ekòtibaki kombo yò etika a yiche bwe: Babylone monè, koncha wango edi nyango a batò ba bochembi o che.

⁶ Na nga yènèki mwatò alangaki malongo ma b’èchwa na ma bandèngè ba Jésus. Na nga bèki n’ichimo okomo nga yènèki wango.

⁷ Na angelo alobaki na nga bwe: ”Kòchimole kobona mbekende? Nga tachakola kò mawò yiche m’èdyalele a mwatò na nyama a ibèli wango wango adi bwa ikolo na wango, nyama wango adi na mitu mochabali na macheke dyomu.

⁸ Nyama ibèli wango k’òyènèki abèki, ko adi dyò twa ko wango tatuba o ch’ibela a meya, ko wango takiè chumbana. Na bakoncha bango babokòtiba makombo ma bango o mokanda ma bomwe o bophotiche ba che ka, tawa n’ichimo okomo bango tayènè nyama ibèli wango ebèki, adi dyò twa, ko wango taya dyòkò.

⁹ Owa edi kokomo bodyale na bokièngu na bolengi. Mitu mochabali edi wana makoli mochabali, mango mwatò adya bwa ikolo na mango. Myango midi wana mikonchi mochabali.

¹⁰ O phanyak’a myango mina mitano michil’okwe, muna mò modi, ewule mò, okomo mwango tòya, mwango tòchimbama bobiko boki bona.

¹¹ Na nyama a ibèli wango ebèki ko adi dyò twa, wango wikoncha adi wana mò mwambi, ko wango adi wana mwe elongo a mikonchi mochabali, na wango takiè tonga n’ichumbana.

¹² Na mocheke dyomu mango k’òyènèki edi wana mikonchi dyomu, ko myango m’ichokola o bokonchi ka, ko, myango tiyamba chwa a bokonchi elongo yò na nyama a ibèli, ko bobiko boki phencha.

¹³ Mikonchi michò mi midi muna ko mò tonga n’iphè nyama a ibèli chwa na nguli.

¹⁴ Na bango tamana na Mwan’a gbata, ko Mwan’a gbata na bakoncha bango babwangibaki, na bacholibaki n’èlongo a b’ètungu, bango balondo Mwan’a gbata bango tayicha bango, tonga Mwan’a gbata adi Mokonchi ma mikonchi, na Golophuma a bagolophuma.

¹⁵ Na wango alobaki na nga dyòkò bwe: ”May mango k’òyènèki, enongo yango mwatò a bochembi abèki bwa, edi wana bato na bibuliki ba bato, bato ba madia makama na bilobele bikama.

¹⁶ Na macheke dyomu mango k’òyènèki na nyama a ibèli tayina mwatò, tachekola wango moyoko na bolumbu, tadya nchoto a wango na tatumba wango o meya.

¹⁷ Tonga Nzambe abikana edyalele ikiela beka byango wango adinge bokiele o cha mitema ma bango, bango bachò tadyala muna ko mò, tonga n’ikiela kobona, na mikonchi myango tiphè chwa a myango na nyama a ibèli kokoko ncho mawò mango Nzambe alobaki tatunywiba.

¹⁸ Na mwatò wango k’oyènèki, edi wana mboka enè, yango edi na chwa ko mikonchi bona tonga n’ikomanda mikonchi ma che.