Bimwa 13 - Mina ma Nzambe 1947

Ekoko a banyama b’ibèli babale.

¹ Na nga yènèki nyama ibèli atubaki o cha may manè, abèki na macheke dyomu na mitu mochabali, n’abèki na diadème dyomu o macheke ma wango (diadème edi bibanga byango echwe ko mikonchi), na o mitu ma wango ekòtibaki mawò ma mbèchi.

² Na nyama ibèli, wango nga yènèki, awulaki, ngwe, na makolo ma kiepha, na muna ma wango mobèki ko muna ma lion bona. Na dragon aphèki wango nguli a wango na trône a wango na chwa ekama.

³ Na nga yènèki ophanyak’a mitu ma wango muna mò mokonchaki phota enè a bowe, ko phota a bowe yango ebelaki, na ch’echò eyènèki nyama wango n’ichimo.

⁴ Na bango bachambelaki dragon tonga wango aphèki nyama ibèli chwa kobona, na bango bachambelaki nà nyama ibèli, balobaki bwe: ”Ne edi elenge na nyama a ibèli nda? ne eyiche bomane na wango nda?”

⁵ Na baphèki wango muna mwango motondaki na mbèchi na nganga, na baphèki wango chwa ikomanda bawòli mako manè na babale.

⁶ Na wango adipholaki muna n’abèchèki Nzambe, n’adyancholaki kombo a wango na tabernacle a wango nè bakoncha bango badi o ikolo.

⁷ Baphèki wango chwa imana na bato b’èchwa tonga n’iyicha bango. Na baphèki wango chwa ikomanda bato ba madia machò ba bilobele bichò na bato moto elenge elenge.

⁸ Na bakoncha bango babèki makombo o mokanda ma Mwan’a gbata wango ebomibaki o bophotiche ba che twa, bango tachambela ko wango.

⁹ Koncha wango edi na matwe m’iwoka, awokaka.

¹⁰ Koncha wango ekane bato o monyòli na wango takola ko o monyòli, koncha wango ebome bato na mongowa nà wango tabomiba ko na mongowa. Ye edi komo a b’èchwa idyala na chabo n’èchingane.

¹¹ Na nga yènèki wona nyama ibèli akbwi, atubaki o cha che, wango abèki na macheke mabale elenge na mwan’a gbata, alobaki elenge na dragon.

¹² Nyama a mobandi ayichaki bokiele matoma moto elenge elenge ko nyama atabocho bona, ayambaki chwa itutiza bato bachò o nch’ichambela nyama atabocho, nyama wango ebèki na phota a bowe, ko yango ebelaki.

¹³ Na wango akielaki matoma machimube moto elenge elenge, n’ayichaki botubize meya michònò ikolo mikwe o che o michò ma bato bachò.

¹⁴ Na wango alenguze bakoncha bango badi o che, tonga na matoma machimube, mango wango ayambaki chwa ikiela o michò ma nyama ibèli a tabocho, na wango alobe na bakoncha bango badi o che bwe, bakiele ndembo elenge a nyama ibèli atabocho wango bamaki mongowa ko abutwa na bomwè.

¹⁵ Na nyama a mobandi ayambaki chwa iyicha bophè ndembo a nyama ibèli bomwè, na kobona yango eyichaki bolobe, na eyichaki bobome bakoncha bango batonaki bochambele elenge a nyama ibèli.

¹⁶ Na tedyala kobona, bato bakiaki na bananè, bayoko na bamandi, bachomi na batamba bachimite bwe, takòtiza ndembo o ebòkò èlomi nyò o bocho.

¹⁷ Tonga mo koncha wango edi ndembo a kombo a nyama ibèli twa, na ndembo yango eyènize mamelo ma kombo a wango twa, owana wango oyicha nyò bochombe nyò bochombe nyò botekize beka ka.

¹⁸ O enongo ye edi kokomo bodyale na bokièngu; koncha wango edi na bolengi abalaka tonga n’iyeba etika a imelo a nyama ibèli, tonga etika yango edi bwe, imelo a bato. Imelo a wango edi bwe: Kama ichamano na mako machamano n’ichamano.