Bimwa 12 - Mina ma Nzambe 1947

Mwatò na dragon (edi Molemba o elenge a mochèmè).

¹ Na ndembo enè eyènènèki o ikolo, nga yènènki mwatò bucha bodyungaki nchoto a wango ichò, woli abèki o cha makolo ma wango, o chomb’a mutu, wango abèki na ngul’a mieti dyomu na mibale.

² Wango abèki na dyemu na abemaki na mokaka m’ibota.

³ Na ndembo akbwi eyènènèki o ikolo, na bokieka, nga yènèki dragon monè motelaki, wango abèki na mitu mochabali, na machèkè dyomu, na o mitu myango wango abèki na bangula mochabali.

⁴ Dòngbò a wango emichaki ika a mieti m’ikolo a ichato, n’èwuchaki myango o che. Na dragon atèmèki chu o bocho ba mwatò wango eyengobote, tonga n’imina mwana wango otèbotiba.

⁵ Wango abotaki mwan’a bole, koncha wango otèyenda bato bachò na motongo m’èdunga. Ko mwan’a wango akwebaki n’akièki ikolo o ma Nzambe na trône a wango.

⁶ Na mwatò abanganaki o engongo yango, akièki o enongo a bobe, Nzambe alòngeleki enongo a wango ondo, wango tawokolo wango owana machu motuku mò na kama ibale na mako machamano.

⁷ Na o kilo etubaki bita, Michel na banelo ba wango bamanaki na dragon, na dragon na bangelo ba wango bamanaki na bango.

⁸ Ko dragon na bangelo ba wango baboyicha bango ka, na o ikolo ebèki enongo nyò eki tonga na bango twa.

⁹ Dragon monè mokoto ma mochèmè etangibe bwe, Molemba, na Satana, bawuchaki wango o che, koncha wango elenguze bato bachò, bawuchaki wango o che elongo yò na bangelo ba wango.

¹⁰ Na nga wokaki ikingo ilobaki nikichi ikolo bwe: ”Kinòwa bucha b’ichungiba buphola, na nguli na bokonchi edi ko beka ba Nzambe, na chwa a Christ a wango, tonga koncha wango ebèphunde banyango ba banga ba baphele (b’èbati a Nzambe) abiwuchiba o che, koncha wango ebèphunde bango mièche na mikolo o bocho ba Nzambe.

¹¹ Bango bawunchaki wango na nguli a malongo ma Mwan’a gbata nà na nguli a mawò mango machakwibaki tonga na wango. Bango babochoba mamwè ma bango ka, na kobona echoko bango babobangana bowe ka yango.

¹² Beni bakoncha bango badyale o ikolo, bochanga! Ko mawa ma che na may manè tonga Molemba abikiè o ma beni ndo n’ibèli ikuli, tonga wango ayebe bwe, wango adi dyò bobiko bokama twa.

¹³ O dragon ayènèki bwe, wango achil’owuchibe o che wango alekaki eluphele mwatò, wango ebotaki mwana.

¹⁴ Ko baphèki mwatò maphaphu ma ngongonyòli monè, tonga n’iwumbwa, n’akiè o bobe o echoko yango tawokolo wango mochika na mochèmè, o bobiko na o mabiko na o ndambo a bobiko.

¹⁵ Ko mochèmè molwaki may makama o chima mwatò ko bongumbu bwango ebale echè bona, tonga n’ichècha wango o nch’a akbwi.

¹⁶ Ko che echekwaki mokielichi a mwatò, yango edipholaki muna ma yango na eminaki may machò, mango mochèmè molwaki.

¹⁷ Ko ibèli a dragon ilekaki ngandele o nch’a mwatò, na wango akièki tonga n’imana na elongo a bana ba wango, bakoncha wango bawoke miyeko ma Nzambe, na bakubole mawò tonga na Jésus.

¹⁸ Na wango atèmèki chu o mokièngata ma may monè.