Bimwa 1 - Mina ma Nzambe 1947

Jean abèchè bibuliki mochabali byango bidi o Asie, achakole bwe, Jésus ayènizaki elenge a wango na wango, na Jésus atinde wango bwe, akòtè bimwa bichò, byango wango tadikiza wango.

¹ Ye edi bimwa byango Nzambe aphèki Jésus, tonga n’idikiza bachali ba wango beka byango tituba dyòlò, byango wango adikizaki angelo a wango, n’atindaki wango na byango o ma Jean,

² wango achakolaki mawò ma Nzambe n’amwanyolaki tonga na Jésus Christ, na beka byango wango koncha ayènèki na michò bichò.

³ Edi moni na koncha wango ebale mawò mango mabilakiba, na edi moni na bakoncha bango bawoke mango na babatele mango, tonga bobiko boya mboli.

⁴ Jean atinde mibèchò o ma bibuliki mochabali byango bidi o Asie. Tika grâce na phi bidyale na beni bichònò o ma koncha wango edi, na abèki, na oteya, nà biyaye mochabali, byango bidi chu o bocho ba kiti a wango, bitinde mibèchò,

⁵ nà o ma Jésus Christ, ndèngè a nènè, ètungu, koncha wango ebotibaki tabocho o phanyak’a bato bawaki, Mokomandi a mikonchi ma che michò. Yena edi koncha wango edinge bèni, n’awutolaki bèni o cha machuma na malongo ma wango koncha,

⁶ wango achekolaki bèni mikonchi na badikichi ba Nzambe, Chango a wango, tika botochibe na nguli bidyale na wango biteneli o biteneli, Amen.

⁷ Bokieka wango aya na biphephelo na michò ma bato bachò tiyènè wango, nà bakoncha bango bamaki wango, na mangomba machò o che tawa na mochaba o bango tayènè wango. He, Amen.

⁸ Nga di l’alpha na l’oméga (motwatwa A na Z), elobe Nzambe, Mokonchi, koncha wango edi, na abèki, na oteya, Konchayombo.

⁹ Nga Jean, mwanyango a bole a beni, koncha echanganaki, na beni o cha kièlèlè na o cha bokonchi na ngingi a Jésus, nga bèki o echanga, kombo a yango Patmos, tonga na mawò ma Nzambe na mawò mango mamwanywibe tonga na Jésus.

¹⁰ Nga bèki o ch’Eyaye bucha ba Mokonchi, na nga wokaki ikingo o nguli o chima nga, ko ikingo o ilimba bona,

¹¹ na dyango ilobaki bwe: Kòtè beka byango k’òyènè o cha buku, otindaka buku bwango o ma bibuliki mochabali, byango bidi o Asie: Ephèse, Smyrne, Pergame, Thyatire, Sardes, Philadelphie na Laodicée.

¹² Nga chekwaki tonga n’iyènè ikingo dyango ilobaki na nga, o nga chekwaki, nga yènèki bidunga ba or (or ewule mbengi) biphaka babuche mochabali,

¹³ ophanyak’a babuche bango nga yènèki moto mò awulaki elenge a Mwan’a bole a moto, achwaki lobu mochanda wango apholaki o matindi, na wango achwaki kamba a or o bochomba ba wango.

¹⁴ Mutu ma wango na chwe a wango bibèki biphumbaki ko nchungi a gbata mophumbaki bona, ko neige bona (neige edi mbula mophumbaki a Photo) na michò ma wango miwulaki milebu ma meya.

¹⁵ Makolo ma wango mawulaki ko edunga yango batelize o ikuba bona. Na ikingo a wango ibèki ko ikito o bongumbu ba may manè bona.

¹⁶ Na o ebòkò èlomi wango abèki na mièti mochabali, o cha muna ma wango etubaki mongowa mwango mobèki na mèngo na phe na phe, na bocho ba wango bobèki ko bucha bwango boleki elangele bona.

¹⁷ Okomo nga yènèki wango, nga kwaki o cha makolo ma wango motwatwa ko nga bèki moto mowaki bona. Ko wango ayakaki ebòkò a wango èlomi ikolo na nga, n’alobaki na nga bwe: Totilake! Nga di mwè bocho na mwè chima,

¹⁸ koncha wango edi na bomwè, nga bèki mowaki, ko, kieka nga di na bomwè biteneli o biteneli, maphongola ma bowe na ba bokonchi ba meya mitenela madi gbo o cha mabòkò ma nga.

¹⁹ Na kobona, kòtè beka byango k’òyènèki, na kòtè dyòkò beka byango bidi kinòwa, na byango otiya.

²⁰ O ebati a beka ba yiche byango k’òyènèki na nga mièti mochabali myango k’òyènèki o ch’èbòkò èlomi a nga, yena wana te, bangelo ba bibuliki (ba Nzambe) na bidunga biphaka babuche mochabali yena wana te bibuliki makoncha.