Baromain 4 - Mina ma Nzambe 1947

Abraham achekwaki n’èchwa tonga n’èchingane a wango.

¹ Ne bèni toloba tonga n’Abraham, chango a bèni monè ebati a nchoto bwe nde?

² Mo Abraham abèki monyèki tonga na matoma ma wango kobona wango ayichaki bochache nchoto. Ko, o bocho ba Nzambe twa.

³ Ne mawò ma Nzambe malobe bwe nde? ”Abraham achinganaki Nzambe, na kobona wango atangibaki n’èchwa.”

⁴ Koncha wango ekiele matoma, iwut’a wango obaliba tonga na gràce ka, ko, tonga n’ibobe a mango.

⁵ Koncha wango edi okièla matoma ka, ko, wango achingane koncha wango enyèze moto a machuma, echingane a moto wango etangibe n’èchwa.

⁶ Na David elenge ko yango atoche moto wango na moni, tonga Nzambe atange wango n’èchwa, odya na matoma ka, alobe bwe.

⁷ ”Bakoncha bango babiyamba pardon a matoma mabe ma bango badi na moni, na machuma ma bakoncha bango madiphiba.

⁸ Koncha wango Mokonchi modi dyò otanga machuma ma wango ka, adi na moni.”

⁹ Iwò kombo ”Moni” edi a bakubibe phencha, edi odyala nà a miphièphiè ka? Banga bolobe bwe, Abraham atangibaki n’èchwa tonga n’èchingane.

¹⁰ Wango atangibaki n’èchwa kobona bwe? Etubaki kobona komo ephe? O wango abèki akubiba iyò o wango abèki achaka mophièphiè? Ebotuba kobona o wango abèki mokubibaki ka, o wango abèki achaka mophièphiè.

¹¹ Na wango ayambaki bokubibe ko ndèmbo yango edikizaki bwe, wango abèki n’èchwa tonga n’èchingane a wango bona, o wango abèki achaka mophièphiè. Tonga wango tachekwa chango a miphièphiè m’èchingane michò nà myango titangiba n’èchwa.

¹² Wango tachekwa nà chango a bakubibe ko bango ongotwana tonga na bokubibe phencha ka, edi kokomo bango tatambola o matambi m’èchingane a chango a bèni Abraham o wango abèki achaka mophièphiè.

¹³ Abraham na mboto a wango baboyamba ilakako bwe wango tadwa che o eyeka itike bona, tonga na miyeko ka, ebèki tonga n’èchingane èchwa.

¹⁴ Ko mo bango toyamba beka bitike tonga na miyeko, owana echingane edi bwabona n’ilakako idi dyò kilo onch’a bango twa.

¹⁵ Tonga miyeko mitubize ibèli na kobona mo miyeko midi twa, owana matoma mabe dyò twa.

¹⁶ Bayambi ba beka b’itike tayamba o ch’èchingane n’èchingane tetubiza grâce echoko ilakako tidyala ngingi na mboto a wango icho yango, ko odya na bakoncha bango badi na miyeko phencha ka, ko, nà na bango badi n’èchingane Abraham. Ko ekòtibaki bona: Wango adi chango a banga bachò bwe:

¹⁷ ”Nga chòchòki kò bwe, kò tòdyala chango a bato bakama”, wango adi chango a banga o bocho ba Nzambe, koncha wango wango achinganaki o bocho ba koncha wango echekole bawe bomwè, koncha wango ebwange beka byango bidi twa, ko byango bibèki bona.

¹⁸ O ichena ibèki twa wango achenizaki n’achinganaki, echoko wango ayichaki bodyale chango a bato bakama yango, ko mawò mango mabiphota bolakibe bona bwe: ”Mboto a kò tidyala kobona.”

¹⁹ Wango abèki lèlèkè o ch’èchingane twa o wango achinganaki ebati a nchoto a wango koncha, dyango ibèki ko mowè bona‐baphela ba wango babèki mboli n’iphola kaman’èkuku a Sara ebèki ko ewaki bona.

²⁰ Wango abokamba ilakako a Nzambe ebati iphomunya ka, ko, wango alendaki o ch’èchingane tonga wango atochaki Nzambe.

²¹ N’ayebati kot’èyebele bwe, eyeka yango Nzambe alakaki, wango ayichaki bophe yango.

²² Echoko wango atangibaki n’èchwa tonga n’iwò dyango yango.

²³ Ko, ebokòtiba kobona tonga na wango phencha ka bwe, wango atangibaki n’èchwa tonga n’èchingane yango, ekòtibaki nà tonga na bèni.

²⁴ Tatanga na bèni n’èchwa, bèni bango bachingane koncha wango ewumuzaki Mokonchi ma bèni Jésus o bowè,

²⁵ koncha wango ebomibaki tonga na machuma ma bèni, na Nzambe awumuzaki wango tonga ninyèza bèni.