Baromain 2 - Mina ma Nzambe 1947

Paul achakole bwe, ichèbo a Nzambe edi n’èchwa.

¹ Echoko kò, moto, dyò iwò iloba bwe, nga boyeba ka, ka, yango, iwò twa nyò edi kò, mochambi a botòtè. Tonga mo k’òchambe moninga botòtè ochambaka n’èbati a kò koncha, tonga okomo k’òchambe wona moninga botòtè, nà kò koncha odi o cha mokalo ko mwango.

² Na banga boyebe nènè, botòtè ba Nzambe tòchunda ikolo na bakoncha bango bakiele kobona,

³ k’òchimunye bwe, kò koncha echambe baninga botòtè o beka byango nà k’òdi o cha byango kò tòkochwa o botòtè ba Nzambe?

⁴ Nyò k’ònchambole beka ba Nzambe ba bomandi: bonyòngò, chabo nandèphè ba Nzambe, na k’òdi oyeba bwe, bonyòngò ba Nzambe bodinge bokielize kò enongo inyeza motema ka?

⁵ Tonga na bokuli ba motema ma kò, mwango odinga boyenchibe ka, k’òkonginye wona ibèli, dyango tichunda o ma kò, bucha b’ibèli bwango tòdikiza bwe Nzambe adi tòtè èchwa.

⁶ Tonga wango taphè moto ikika ko motema ma wango modi bona.

⁷ Wango taphè bakoncha bango badi n’ètungu o matoma manyòngò bomwè butenela, na o cha mango bango bayenge bokalebane na botochibe na beka ba biteneli.

⁸ Bakoncha bango badi na machicha na badi odinga nènè ka, badinge ko machuma, ibèli na bonchanga tichunda ikolo na bango.

⁹ Kièlèlè n’èyubi tiphila motema ma koncha wango ekiele bobe, bophotize bajuif, mobandi bagrec.

¹⁰ Ko, bokalebane na botochibe na phi tichunda bophotize bajuif, mobandi bagrec.

¹¹ Tonga Nzambe adi kachelanga na moto twa,

¹² bakoncha bango bakielaki machuma o miyeko mibèki twa, tachumbana bwabona, ko bakoncha bango bakielaki machuma o bango bayebaki miyeko, tachamba bango botòtè ikolo na miyeko myango.

¹³ Bakoncha bango bayebe miyeko moyeba phencha, ko, owoka myango ka, badi odyala banyèki o bocho ba Nzambe ka, ko, bakoncha bango bawoke miyeko kot’èwokiele tachamba bango botòtè b’èchwa.

¹⁴ Okomo bapaien bango badi miyeko twa, ko bango badi o ch’ibondo a miyeko, kobona miyeko midi na bango makoncha,

¹⁵ tonga bango badikize ndembo, yango eyènènè bwe, miyeko midi mikòtibaki o cha mitema ma bango. Kobona baconscience ba bango badikize bichimunye ba bango o bango badi o cha kophay na baninga, iyo baconscience baphunde bango iyo bayebize bango.

¹⁶ He, tedyala kobona o bucha, bwango Nzambe tachamba bato botòtè o beka ba bango ba yichè, tachamba na mina minyòngò ma Jésus Christ, myango nga chakole mi.

¹⁷ Kò, k’òtangibe bwe mojuif na k’òyengole nchoto o cha miyeko na k’òcheche nchoto o cha Nzambe.

¹⁸ K’òyebe bodingo ba wango tonga badikizaki kò miyeko, echoko k’òyiche bochambe beka binyòngò botòtè yango.

¹⁹ K’òchimunye bwe, k’òdi motutichi a bato b’ibòti na k’òdyale mwenda o phanyak’a bato bango badi

²⁰ o boyi, modyèchi a biwawunga, modikichi a bato bango badi bolengi twa, beni bakoncha bango bodi na èlenge a nènè na bokièngu o cha miyeko.

²¹ Kò koncha k’òyekola ka, k’òyekuze ko baninga bakbwi. Kò koncha echakole mawò bwe: toyibake, ko, kò koncha k’òyibe.

²² Kò koncha echimbe bwe tòkielake bochembi, ko kò koncha k’òkiele bochembi. Kò, koncha edi na ngièngèli tonga na machuma, nà kò koncha odi o cha bongoncha bwango.

²³ Kò koncha k’òcheche nchoto bwe, k’òyebe miyeko, ko, k’ònchamole Nzambe tonga k’òlote miyeko,

²⁴ ko bakòtèki bona: ”Kombo a Nzambe ebèchibe o phanyak’a bapaien tonga na beni.”

²⁵ Bokubibe bodi bonyòngò mo k’òwoke miyeko micho, ko, mo k’òlote mina miyeko, bokubibe ba kò bodi bwabona.

²⁶ Mo koncha wango edi mophièphiè awoke miyeko, nyò wango adyale mophièphiè, otanga wango mokubibi ka?

²⁷ Koncha wango edi mophièphiè tonga edyalele a wango, ko, wango awoke miyeko, wango taphanuza kò koncha wango edi o cha mawò ma miyeko, na mikubiba, ko, kò koncha kòdi moloti a miyeko.

²⁸ Bojuif bodi odyala tonga na kombo phencha ka, na odyala tonga na bokubibe o nchoto phencha ka

²⁹ ko, koncha wango etangibe mojuif adyalaka mokubibaki o cha motema, bokubibe o cha motema n’Eyaye Echwa, odya na miyeko ka, botochibe ba wango ochònò o ma bato ka, bochònò o ma Nzambe.