Baromain 14 - Mina ma Nzambe 1947

Bokielizaka baninga bango badi na leleke o ch’èchingane.

¹ Mo wona mo adi mokòki o ch’èchingane boyambaka wango kot’èyambele, tochambake wango botòte tonga na bichimunye ba wango.

² Wona mo adi n’èchingane idya iphwa, koncha edi na lèlèkè adye kò beka byango bitò o che phencha.

³ Koncha wango edye, tanakolake koncha wango edi odya ka. Nà na koncha wango edi odya ka elenge ko yango, tachambake koncha edye bòtòte. Tonga Nzambe abiyamba wango.

⁴ Na k’òchambe mochali a moninga bòtòte, k’odi bwe? Mo nyo wango adi chu nyo adi o cha ebimbo edi iwo a mokomandi a wango koncha. Ko wango tadyala chu, tonga Mokonchi modi na nguli iphingiza wango chu.

⁵ Wona mò awechinye mabucha, ko wona mò atange mango machò elenge ko yò. Tika moto ikika achòchò kot’èchòchòlò.

⁶ Mo wona mò atange bucha bò kot’ètangele, tika wango akiele kobo o bocho ba Mokonchi, mo wona mò adye, tika wango adye o bocho ba Mokonchi, wango aphè nchu Nzambe ingòko. Na koncha wango edi odya ka, akielaka kobona o bocho ba Mokonchi, na wango aphè Nzambe ingòko.

⁷ Tonga moto nyò mò o ch’èlòngò a bèni olòngò tonga na wikoncha ka, n’adi owa tonga na wikoncha ka.

⁸ Mo bèni bodi na bomwe, owana edi tonga na Mokonchi, mo bèni bowe edi dyò ko tonga na Mokonchi. Kobona mo bèni bodi na bomwe nyò bowe, bèni bodi b’èlòngò a Mokonchi.

⁹ Echoko Christ awaki, n’awumwaki yango, tonga n’idyala Mokonchi ma bawe na ba bomwe.

¹⁰ Ko, k’òchambe mwanyango a kò a bole botòtè mbekende? Nà kò dyòkò, k’ònakole mwanyango a kò a bole mbekende? Bucha bèni bachò totèmèchu o bocho ba kiti a Nzambe a botòtè,

¹¹ tonga ebikòtiba bwe: ”Ko nènè edi bona nga di na bomwe, elobe Mokonchi mangòtò machò tanòtèmè o bocho ba nga, na malemu machò tatocha Nzambe.”

¹² Na moto ikika o ch’èlòngò a bèni taphè Nzambe machango tonga na wikoncha.

¹³ Tika bèni bodyale ochambana botòtè ka. Ko bochambanaka n’èchambane akbwi, mòchi moto nyò mò adyale odyala ibaku iboko tonga n’iwuncha mwanyango a wango a bole ka.

¹⁴ Nga yebe kòt’èyebele o cha Mokonchi Jèsus bwe eyeka myò yò edi okula mbindo yango koncha ka ko, mo moto achimunye bwe, eyeka yò edi na mbindo, owana mbindo yango edi na wango koncha.

¹⁵ Mo bekidya ba kò b’iphè mwanyango a kò a bole kièlèlè na kò òchukele wango o cha kièlèlè yango, owana mombalo ma kò modi odyala dyò o ch’èlumba ka. Todyalake modyòbichi a bakoncha, bango Christ achèbèki kokoko ncho bowe tonga na bango.

¹⁶ Tochimitake bwe, beka binyòngò byango beni bobiyamba bibèchibe.

¹⁷ Tonga bokonchi ba Nzambe bodi odyala tonga na bekidya na beka binywa ka, ko, bwango bodi echwa na phi na moni o ch’Eyaye Echwa.

¹⁸ Koncha wango ekiele mochalo ma Christ tonga n’edyalele ye, wango adi monyèki o bocho ba Nzambe, na kobona wango adi ngingi o cha bomèkibe o bocho ba bato.

¹⁹ Tika bèni boyenge beka byango bibwange phi, na beka byango bilèndize echingane.

²⁰ To dyobizake beka ba Nzambe tonga n’idya. Beka bichò bidi chèchè, ko koncha wango edye byango n’èdyelele a ibaku iboko, owana beka byango bidi bibe.

²¹ Edi odyala enyòngò bodye nyama na bonywe du vin ka, nyo eyeka akbwi, yango ephe mwanyango a kò a bole bokando.

²² Echingane yango edi na kò òdyalaka na yango o bocho ba Nzambe na kò koncha. Edi moni na koncha wango echòchò ekielele a wango kòt’èchòchòlò, mòchi wango adyale eyubi o chima yango twa.

²³ Koncha wango edye beka n’iphomunya owana wango abichambiba bobòtè, tonga beka byango bidi okieliba n’èchingane ka. Tonga beka bichò byango bidi okieliba n’èchingane ka, edi machuma.