3 Jean 1 - Mina ma Nzambe 1947

Jean achange tonga na Gaïus atambole o cha nènè kot’ètambole. Adi na kièlèlè tonga na Diotrèphe. Atoche Démétrius. Mibèchò.

¹ Nga mokoto, nga kotè mawò o ma Gaïus, wango edingibaki, koncha wango nga dinge nènè.

² Konde a nga, nga dinge beka ba kò bichò bitubane nonyòngò, na nga dinge nguli edyale o ch’a nchoto a kò, ko o ch’a mwe a kò edi edyalele enyòngò bona.

³ Nga lèkaki bochange okomo banyango bayakaki ma nga bachakolaki tonga na nènè a kò, na ko k’òtambole o ch’a nènè bona.

⁴ O nga woke bwe, bana ba nga batambole o ch’a nènè, nga di moni makbwi m’ilèka moni mu twa.

⁵ Konde a nga, k’òkiela ekielele enyòngò o beka bichò byango k’òkiele na banyango, na banyango b’iyenda dyòkò,

⁶ bango bachakolaki elumb’a kò o bocho b’èbuliki a Nzambe. Mo k’òtonde bango echiki a bango ko Nzambe adinge bona, owana ko tokiela ekielele enyòngò.

⁷ Bango bakièki echiki tonga na kombo a Jésus Christ; baboyamba beka ba bato, bango bach’owoka mawò ma Nzambe ka, ka.

⁸ Kobona bèni bodi n’iwò iyamba bakoncha bango badi kobona, echoko bèni bokielizane o nènè yango.

⁹ Nga bikòtè mana mawò m’èbuliki a Nzambe, ko, Diotrèphe, koncha wango adinge bodyale mwe tabocho, odinga boyambe bèni ka.

¹⁰ Echoko o nga taya nga tabatiza matoma mabè ma wango, mango wango akiele, na mawò mabè mango wango alobe tonga na bèni yango. Ko, edi okoka kobona phencha ka, wango adi oyamba banyango b’ebati a Nzambe ka, na bakoncha bango badinge boyambe bango, wango awunduze bango, n’amiche bango o phanyak’a èbuliki a Nzambe.

¹¹ Konde a nga, tokielake ko bato babè bakiele bona, okielaka ekielele yango bato banyongo bakiele. Koncha wango ekiele ekielele enyòngò edi mwe Nzambe, ko, koncha wango ekiele ekielele ebè ach’oyènè Nzambe ka.

¹² Démétrius abiyebiba na bato bachò na nènè, moto monyòngò, na bango makoncha dyòkò bolobe tonga na wango, na k’òyebe bwe, mawò ma bango madi nènè.

¹³ Nga di na mawò makama m’ikotè kò, ko ng’odinga bokòtè na mè ma mikanda na plume ka.

¹⁴ Nga chenize boyènè kò dyòkò na bakò todyokana.

¹⁵ Tika phi edyale na kò. Baninga babèche kò. Obèchèkè baninga, moto a kombo a kombo.