2 Timothée 3 - Mina ma Nzambe 1947

Achakole beka byango titubana o machu ma chima. Atinde bango bwe, babale mawò ma Nzambe.

¹ Oyebaka iwò di o machu ma chima tadyala mpoli, beka bikwikuli tituba.

² Tonga bato tadyala moto a nchoto a nchoto n’ènyima, na chachi, na nganga, tadyala na phocha mbèchi, tadyala n’iwokake na nyango na chango, badi odinga bophè ingòko ka, n’èchwa ko twa,

³ n’èlumba ko twa, n’ètungu ko twa, bakiele ko mitango, na chululu, na bophenye, badi kiètètè na beka binyòngò bichò,

⁴ tadyala baphanchi ba baninga, na badi na bichimunye ko twa, balèki etondele na nganga, balèki edingele moni ma che o mata ma Nzambe,

⁵ badi n’èlenge a bonyòngò ba Nzambe ko, babitata nguli a bwango. Olangwaka nà kò o phanyak’a bango!

⁶ Elongo a bango edi bakoncha bango bakole o ch’a mandako na bakande batò, bango badi lèlèngo na machuma, na baphongo moto elenge elenge batinde bango,

⁷ bayekuze bango kokoko, ko bango badi oyicha bophole o bolèngi ba nènè ka.

⁸ Ko Jannès na Jambres bayètènèki na Moïse bona, na bakoncha bango bayètènè na nènè badi elenge ko yango, bato bango babidyobo o ch’a mitema, badi oyicha bobandame o ch’èchingane n’ètungu ka.

⁹ Ko, bango tiyichi bobandame, tonga na bowawunga ba bango toyèniba o michò ma bato bachò, ko etubaki na bana baphele bona.

¹⁰ Ko, k’òlondoki iyekol’a nga n’ètungu, n’ètambole a nga, na botina ba nga, n’èchingane a nga, na ndèphè a nga, n’èlumb’a nga, na chabo a nga, na o babengachanaki na nga, na machèbo ma nga,

¹¹ mango mataki na nga o Antioche, n’Iconie na Lystre. Nga bandamaki n’ètungu o machèbo mango, na Mokonchi mophakolaki nga o beka bichò.

¹² Na bakoncha bachò bango badinge bolondo ilòngo dyango idi inyèki o ch’a Jésus Christ tabengachana na bango.

¹³ Na bato babè na bakoncha bango bachukwize baninga n’ichena, bango talèka ekièndele mochika o matoma mabè talenguza bato, na bango makoncha badi balengwaki.

¹⁴ Ko, kò, òdyalaka o ch’a beka byango k’òyekolaki, na byango k’òchinganaki, na, oyebaka dyòkò bakoncha bango badikizaki ko byango.

¹⁵ Okomo k’òbèki mwana k’òyekolaki mikanda mèchwa, myango miyiche bophè kò bolengi b’iyamba ichungiba n’èchingane o ch’a Jésus Christ.

¹⁶ Mawò machò mango madi o mokanda ma Nzambe matubaki o muna ma wango koncha, madi manyèki n’idikiza bato, n’ichekiza bato, n’ilanguza bato tonga n’ikatiza bato o ch’èchwa.

¹⁷ Echoko moto a Nzambe tatunywiba n’adi monyèki o matoma manyòngò machò yango.