2 Pierre 2 - Mina ma Nzambe 1947

Badikichi a bwanya, n’ichèbo a bango.

¹ Ko, badikichi ba bwanya batèmèki chu o phanyak’a bato dyòkò, ko badikichi ba bwanya tatèmè o phanyak’a beni dyòkò, bango taya na mitoko o phanyak’a beni na tatata Mokonchi mwango mophakolaki bango tabembe embenche ekuli dyo dyolo

² na bato bakama talondo matoma mabè ma bango, na manè ma nènè tabèchiba iwò a bango.

³ Tonga na chululu a mbongo bango tabandinya beka ba beni ba mawò ma bwanya, ichèbo a bango ibichil’ochochibe, n’èmbenche a bango edi odyala ila bilò ka.

⁴ Bangelo bango bakielaki machuma, Nzambe abochoba ka, ko, wango atindaki bango o ch’a mangièngèlè ma boyi, babombibe kokoko ncho ichèbo,

⁵ na mo wango abophakola bato ba kale ko wango achobaki Noè bona ka, wango abèki elòngò a mwambi a matoma manyòngò, okomo wango atindaki moya manè ma bato ba machuma ba che,

⁶ na wango akindelaki Sodom na Gomorrhe n’atezaki bango n’ibomi, n’atikaki bango ko ndembo a bato babè bango taya bona,

⁷ na wango aphakolaki Lot, moto èchwa, koncha wango echèbèki o kophay a bato babe, bango bakielaki matoma mabe ma choni,

⁸ tonga moto wango koncha èchwa abikaki otete a bango achèbèki o ch’a motema ma wango m’èchwa bucha na bucha, tonga na matoma mabè mango wango ayènèki n’awokaki,

⁹ kobona Mokonchi moyiche bophakole bato ba wango o ch’iphèphi, ko, bochèbize na bobombe kokoko ncho bucha b’ichamba botòtè bato ba machuma,

¹⁰ tètè bakoncha bango batambole o ch’a chululu a baphongo ba manchoto, na badyanchole bokonchi ba mikonchi, Badi na mitema mikwikuli na banchamole, badi otila enongo ibèche matochibe ka.

¹¹ Ko, bangelo bango balèki bango nguli na bononè, bango badi ochamba bango botòtè b’ichèbo ba mbèchi o bocho ba Mokonchi ka.

¹² Ko, bango badi ko banyama bona, badi odyala na bolèngi ka, babotibaki tonga n’ikaniba n’ibomiba, okomo bango babèche beka byango bango badi oyeba ka, na bango tachukwa n’ichena, n’iwuta dyango bango badinge boyambe na matoma mabè.

¹³ Bango badwe moni ma bango o ch’a matoma mabè, mango bango bakiele na moche. Bango badi biphebo ba mbindo na biphebo ba choni, na bango balèki bokiele bolengi na beni o bango badye bwa na beni o mecha enongo bokiele mandeko.

¹⁴ Michò ma bango mitonde na bochembi na midi tingingi na machuma, na bango babembize baninga o ma bango, bango badi odyala ngingi ka na mitema ma bango midi n’èkumba ènyima, bana ba mokindo.

¹⁵ Bango balangwaki manè ma lengenge, na balangwaki, bango balondoki manè ma Balaam, mwan’a bole a Bosor, koncha wango edingaki iwut’a matoma mabè,

¹⁶ bachekizaki wango tonga n’iwokake a wango, yanga nyama, wango adi oyicha bolobe ka, alobaki na wango n’ikingo a moto, n’awunduzaki mobandi o botoma bobè ba wango.

¹⁷ Bakoncha bango badi bachomba ba mè twa, biphephelo byango bitinde enguchi ekuli, na boyi boyindaki babibomba tonga na bango biteneli.

¹⁸ Na tonga n’iloba mawò mananè m’iphwa bango babembize o ch’a boya ba phongo o nchoto na matoma ma choni bakoncha bango babanganaki baninga bango batambole o ch’a matoma mabè enongo eki,

¹⁹ balake bango bwe, badyale baphinchwibe ko bango makoncha badi batamba b’ibomi, tonga koncha wango ewunchibaki na moninga abichekwa motamb’a wango.

²⁰ Mo bango bakochwaki matoma mabè o che tonga na bokièngu ba Mokonchi ma bèni na Mobila Jésus Christ, ko chima o bango babikangiba na babiwunchiba na mango, kobona iwò a chima ilèki iwò a bocho bokuli.

²¹ Ebèki enyòngò mo bango baboyeba manè m’èchwa ka, elèki bokuli chima o bango babimèchènè na mango enongo ilangwa moyeko m’èchwa, mwango motikibaki na bango.

²² Etubaki na bango ko elobibaki o ekoko a nènè bwe: ”Mbwande abutwe tonga n’iphèlè bilwa ba wango, na ngoya wango abiphubiza nchoto a wango abutwe dyòkò, abingane o miboku.”