2 Corinthien 7 - Mina ma Nzambe 1947

Paul awe na moni tonga na mawò mango Tite achakolaki bwe, bèCorinthien bileka ewokele mawò kot’èwokele.

¹ Beni baninga ba nga bakonde, o bèni bodi o cha malakako ma, tika bèni bochènize ebati a bèni makoncha na beka byango biphè biphebo nyò o nchoto nyò o motema, na bokate o ch’èchwa na botile Nzambe.

² Bophè na banga enongo o cha mitema ma beni. Banga bobokiela ebe na moto nyò mo ka, banga bobòdyòbiza na moto nyò mò ka, na banga bobokambiza moto nyò mò ka.

³ Nga oloba mawò ma tonga n’ichamba beni botòtè ka nga bichakola nchu bwe, beni bodi na banga o cha mitema nà o ebati a bowe nà o ebati a bomwè.

⁴ Nga di na bokili bokama o ebati a beni, na nga chombwane tonga na beni, moni ma nga mutonda na mophanchangane o cha maphanu ma banga.

⁵ Tonga elembe o banga bopholaki o Macèdoine manchoto ma banga mach’oyamba iywè ka, maphanu madi na banga o binongo bichò, o dindo edi bita, o cha banga edi na bobo.

⁶ Ko Nzambe koncha wango ebwangize bè kièlèlè abwangizaki nà banga, okomo Tite ayakaki owoni,

⁷ ko ebodyala tonga na boyelele ba wango phencha ka, ko tonga n’ibwangicha dyango beni bobwangizaki wango. Wango achakolaki banga phocha yango edi o cha beni na mbembe o beni na motaba mwango beni botabinyaki nga, echoko nga lekaki tètè echangele yango.

⁸ Mo nyò nga phèki beni kièlèlè tonga na mokanda mwango nga kòtèki ma beni, nga di eyubi o chima mwango twa. Ko, mo nga yambe eyubi tonga na mokanda mwango — tonga nga yebe mokanda mwango mophèki beni kièlèlè, yango ebèki bobiko boki phencha

⁹ — ko kinòwa nga change, edi odyala tonga na kièlèlè yango beni boyambaki ka, ko, tonga na kièlèlè yango inyèza beni. Kièlèlè yango beni boyambaki ebèki ebati a Nzambe, mòchi ichèbo idyale odyala na beni tonga na banga ka.

¹⁰ Tonga kièlèlè yango edi o ebati a Nzambe etubize ncha yango ekambe bato o ch’ichungiba yango edi dy’ò òtubiza eyubi ka, ko kièlèlè a bato ba che tekamba bango o bowe.

¹¹ Na bokieka, kièlèlè yango beni boyambaki ebati a Nzambe etubizaki beka binyòngò bi: chululu idikiza ndèphè tonga na kièlèlè yango beni baphèki banga, na chululu iloba bwe, banga boboyeba ka, na chululu a moyayo, na bobo, na bochime, na phocha, ye tètè ichèbo! Beni buyèniza tètè kot’èyènize bwe, beni bodinge bodyale tètè chèchè o nch’èbati yango.

¹² Mo nyò nga kòtèki ma beni kobona, ebokòtiba kobona tonga na mokieli a machuma phencha ka, ebokòtiba kobona tonga na koncha wango echèbèki bwabona phencha ka, ko, tonga n’itubiza chululu yango beni bobèki na banga o bocho ba Nzambe.

¹³ Na kinòwa bibwangiza mitema ma banga. Na o ch’ibwangicha di Tite alekaki ebwangize mitema ma banga, tonga eyaye a wango elendaki tonga na beni bachò.

¹⁴ Na mo kinòwa nga chombwane o bocho ba wango tonga na beni, owana mawò mango madi ophè nga chòni ka. Tonga ko banga bolobaki nènè o bocho ba beni bona, na kobona kinòwa mawò mango banga bochombwane o bocho ba Tite tonga na beni mayènènè bwe, madi nènè.

¹⁵ Na kinòwa motema ma wango muleka etondele n’èlumba o nch’a beni, o wango abatele ewokele, yango beni bachò bowokaki, na eyambele yango beni boyambaki wango na moyayo na bobo.

¹⁶ Nga leki echangele na nga di na bokili bonyòngo tonga na beni o beka bichò.