1 Timothée 6 - Mina ma Nzambe 1947

Dyombo a bachali. Ateye bango tonga n’èdyalele a iyekola a bwanya.

¹ Bato bachò bango badi o botamba, bawokaka mawò ma bayèkumu ba bango, ta mawò ma Nzambe n’iyekola bibèchiba.

² Batamba bango badi na bayèkumu bango badi n’èchingane, tadyancholake bango, tonga bango badi banyango ba baphele b’èbati a Nzambe, ko, bakielizaka bango o mochalo kot’èkielize, tonga bango badi n’èchingane, badi bakonde, na bango bayenge bokiele beka byango bidi binyòngò. Boyekuzaka na boteyaka bango mawò mango.

³ Mo moto adikize bato iwò akbwi, na wango adi ochingana mawò ma nènè ka mawò ma Mokonchi ma bèni Jésus Christ n’iyekola dyango ichònò o echingane a Nzambe,

⁴ owana michò ma wango midiphame na nganga tonga wango adi oyeba eyeka ka, adi mokata ma biyangi na mibambi, myango mitubize eyubi na mitoko, na mbechi na bichimunye bibè,

⁵ mibandi mikwikuli o phanyak’a bato bango badi na mitema midyobo, badi odyala n’iwò a nènè o ch’a mye ma bango ka, bachimunye bwe, echingane a Nzambe edi tonga n’ikotiza bango. (Obanganaka o ma bango).

⁶ Echingane a Nzambe n’èchoko motema mochundaki bichanganaki biya na motuya mokuli.

⁷ O bango babotaki bèni o che owoni, bèni boboya na beka ka, nà bèni bodi oyicha bolangwe na beka ka.

⁸ Mo bèni bodi na bekidya na bilamba b’ichwa, tika mitema ma bèni midyale michundaki na byango.

⁹ Ko, bakoncha bango badinge bodyale bamandi, bango bakwe o maphèphè na bawuche o meya, na baphongo b’ingè, bakama bango badyobo, na babwake bato o ibomi n’ènongo ichumbana.

¹⁰ Tonga tin’a beka bibè bichò edi mokata ma mbongo, bana baninga bango baluphaki idwa baphambwaki o manè m’èchingane na bakibizaki mitema ma bango makiba makama.

¹¹ Ko, ko, moto a Nzambe, obanganaka beka bi, na olondoko echwa, bonyòngò ba Nzambe, echingane elumba, etungu, na chabo.

¹² Omanaka bita binyòngò b’èchingane, obaka bomwè butenela, k’obwangibaki tonga n’iwò dyango, okomo k’òchakolaki Jésus o michò ma bandèngè bakama.

¹³ O bocho ba Nzambe, koncha wango elòngize beka bichò, n’o bocho ba Jésus Christ, koncha wango echakolaki mina minyòngò o michò ma Ponce Pilate,

¹⁴ nga teye kò bwe, owokaka moyeko mu, kò moto monyòngò, wango adi odyala na biphebo n’iwo twa bona, kokoko ncho Jésus Christ, Mokonchi ma bèni toyèniba,

¹⁵ mango toyèniba o bobiko bwango mwango koncha mobichòlò, koncha edi n’ilèmu nà na Mokomandi edi ko mwango phencha, Mokonchi ikolo na bakoncha bango badi mikonchi, na Mokomandi ikolo na bakoncha bango badi bakomandi,

¹⁶ bomwè butenela bodi ko na mwango phencha, mwango modyale o ch’a phololo, yango bato badi oyicha bochukane mpoli na yango ka, koncha wango moto nyò mò o phanyak’a bato ach’oyènè ka, oyicha nyò boyènè ka, tika mwango modyale na nguli na botochibe biteneli Amen.

¹⁷ Otindaka bato bango badi bamandi o bobiko bu tadyalake na nganga, na tadyalake n’ichena a bango o idwa, dyango idi oyicha botenele ka, ko, bochenizaka Nzambe koncha wango aphè bèni beka bichò bilèki bikama, tonga bèni todyala nyèmu na byango.

¹⁸ Otindaka bango bakiele ekielele enyòngò, badyalaka bamandi o ch’a matoma manyòngò, badyalaka bakabi, bachanganaka na baninga o ch’a kièlèlè,

¹⁹ bakonginyaka kobona nchalela enyòngò o machu mango taya, echoko bango taba bomwe butenela yango.

²⁰ O Timothée, ochobaka beka byango bitikibaki o mabòkò ma ko, otonaka mawò m’iphwa, na ”mibambi” ma bato, bango badi odyala na bolèngi ba nènè ka,

²¹ bana bato bachinganaki bolèngi bwango na bango baphambwaki o manè m’èchingane. Tika grâce edyale na kò!