1 Jean 2 - Mina ma Nzambe 1947

Christ adi Mophakoli na mokielichi a banga bato ba Nzambe.

¹ Bana ba nga, nga kotè mawò ma o ma beni, ta beni bokiela machuma. Mo moto akiele machuma, mokielichi a bèni adi o ma Chango, Jésus Christ, koncha èchwa.

² Wango adi mowuti imicha machuma ma bèni, odya machuma ma bèni phencha ka, ko, ma bato bachò o che.

³ Bèni boyebe bwe, bèni bobimèchène na wango o iwò di, mo bèni bowoke miyeko ma wango.

⁴ Koncha wango elobe bwe: Nga bomèchène na wango, na wango owoka miyeko ma wango ka, yengu koncha edi moto a bwanya, nènè edi o ch’a wango twa.

⁵ Ko, koncha wango ewoke mawò ma wango, elumb’a Nzambe edi o ch’a wango enyèki, nènè. Bèni boyebe bwe, bèni bodi o ch’a wango o iwò di.

⁶ Koncha wango elobe bwe, wango atenele o ch’a wango, yengu koncha edi n’iwò itambola ko wango atambolaki bona.

⁷ Bakonde ba nga, ng’okotè moyeko motemu ma beni ka, ko, moyeko mokale, mwango mobèki na beni kokoko ncho bophotiche. Moyeko mokale modi iwò dyango beni bobiwoka ikale.

⁸ Nga kotè beni moyeko motemu dyòkò, mwango modi o ch’a wango nènè, na o ch’a beni, tonga boyi bophanchane na mwenda ma nènè muchil’odiphuze.

⁹ Koncha wango elobe bwe, wango adi o ch’a phololo n’ayine mwanyango a wango, wango adi o ch’a boyi dyòkò.

¹⁰ Koncha wango edinge mwanyango a wango, wango adyale o ch’a phololo, na bokando nyò bò bodi o ch’a wango twa.

¹¹ Ko, koncha wango eyine mwanyango a wango adi o ch’a boyi, na wango atambole o ch’a boyi, na wango oyeba ncha yango wango adi ka, tonga boyi boyindizaki michò ma wango.

¹² Nga kòtè o ma beni, bana ba nga, tonga na machuma ma beni mabimichiba, tonga na kombo a wango.

¹³ Nga kòtè o ma beni, bachango, tonga beni bobimèchène na koncha wango abèki o tabophotiche. Nga kòtè o ma beni, bawoli, tonga beni bobiwuncha Satana.

¹⁴ Nga bikòtè o ma beni bana ba nga, tonga beni bobimèchène na Chango. Nga bikòtè o ma beni bachango, tonga beni bobimèchène na koncha wango ebèki o tabophotiche. Nga bikòtè o ma beni bawoli, tonga beni bodi na nguli, na mawò ma Nzambe matenele o ch’a beni, na beni bobiwuncha Satana.

¹⁵ Todingake che, nyò beka byango bidi o che. Mo moto adinge che, owana elumb’a Chango edi o ch’a wango twa.

¹⁶ Tonga beka bichò byango bidi o che, phongo a nchoto, phongo a michò, na bomwè b’ikondiza nchoto, beka bi bidi odyala beka ba Chango ka, ko, edi beka ba che.

¹⁷ Che techumbana na phongo a yango, ko, koncha wango ekiele bodingo ba Nzambe tadyala biteneli.

¹⁸ Bana ba nga, kinòwa edi bobiko ba chima. Beni bobiwoka bwe, Antéchrist ayengoya, na kinòwa bana b’Antéchrist b’ichil’otube, echoko bèni boyebe bwe, kinòwa edi bobiko ba chima.

¹⁹ Bango bachònòki o phanyak’a bèni ko bango babodyala elòngò o bèni ka, mo bango babèki elòngò a bèni, ibe bango babandamaki na bèni. Ko, beka bi bitubanaki tonga n’iyebiba na bato bwe, bachò abodyala elòngò a bèni ka.

²⁰ Beni bobiyamba mayita m’ichinga ma Koncha Echwa, na boyebe beka bichò.

²¹ Nga bokòtè ma beni tonga n’iyebiza beni nènè ka, tonga beni boyebe yango, na bwanya bodi o ch’a nènè twa.

²² ”Moto a bwanya” edi nda? edi odyala koncha wango etate Jésus bwe, wango adi odyala Christ ka? Antéchrist edi koncha wango etate Chango na Mwan’a bole.

²³ Koncha wango etate Mwan’a bole, wango odyala nyò na Chango ka, na koncha wango echakole Mwan’a bole adyala na Chango dyòkò.

²⁴ Mawò mango beni bophotaki bowoke o bophotiche, tika mango matenele o ch’a beni. Mo mawò mango beni baphotaki bowoke o bophotiche matenele o ch’a beni, owana beni totenela o ch’a Mwan’a bole na Chango.

²⁵ Ilakako di edi dyango wango alakaki bèni, bomwè butenela.

²⁶ Nga bikotè beni mawò mango tonga na bakoncha bango balenguze beni.

²⁷ Na mayita m’ichinga, mango beni bobiyamba na wango, matenele o ch’a beni, na beni bodi phocha bwe, moto adikize beni twa, ko, mayita m’ichinga mango madikize beni beka bichò, mango madi nènè, madi odyala bwanya ka, na ko mango mabidikiza beni bona, botenelaka o ch’a wango.

²⁸ Bana ba nga, botenelaka o cha wango, kobona beni todyala na bokili o wango tadikiza nchoto ta wango abutiza bèni na choni o boyelele ba wango.

²⁹ Mo beni boyebe bwe, wango adi n’èchwa, boyebaka dyòkò bwe, koncha wango ekiele beka b’èchwa abotibaki na wango.