1 Jean 1 - Mina ma Nzambe 1947

Jean achakole bwe, Christ adi phololo.

¹ Beka byango bibèki o bophotiche, beka byango banga bowokaki na beka byango bango boyènèki na michò ma banga, na byango banga botokoloki na mabòkò ma banga makulanaki na byango, banga bochakole, na banga bolobe tonga n’Iwo a Bomwè.

² Tonga Bomwè boyènibaki na banga, na banga bobiyènè na banga bobimwanyola bwango, na banga bochakole beni Bomwè butenela, bwango bobèki na Chango na boyènibaki na banga,

³ beka byango banga boyènèki na bowokaki, beka byango banga bochakole nà na beni, echoko beni bodyale kophay mò na banga yango, ko kophay a banga adi na Chango na Mwan’a bole a wango Jésus Christ.

⁴ Na banga bokòtè beni mawò echoko moni ma beni modyale monyèki yango.

⁵ Mina mi edi myango banga bobiwoka na wango, na bochakole beni dyòkò bwe, Nzambe adi phololo na boyi nyò boki bodi odyala o ch’a wango ka.

⁶ Mo bèni bolobe bwe, bèni bodi kophay na wango na bèni botambole o boyi, owana bèni bokiele bwanya na kobona nènè odyala na bèni ka.

⁷ Ko mo bèni botambole o phololo ko wango adi phololo bona, owana bèni bodi na kophay mò o ch’a mitema ma bèni, na malongo ma Mwan’a bole a wango, Jésus Christ matènize bèni o machuma machò.

⁸ Mo bèni bolobe bwe, bèni bodi machuma twa, owana bèni bochukwize ebati a bèni n’ichena na nènè edi o ch’a bèni twa.

⁹ Mo bèni bochakole machuma ma bèni, owana wango adyale n’ètungu n’èchwa tonga n’iphè bèni pardon a machuma, na wango atenize bèni o machuma machò.

¹⁰ Mo bèni bolobe bwe, bèni bobokiela machuma ka, owana bèni bochekole wango moto a bwanya, na mawò ma wango madi o ch’a bèni twa.