1 Corinthien 9 - Mina ma Nzambe 1947

Achakole bwe, wango adi chomi o cha Jésus.

¹ Nga di odyala mophinchwibaki ka? Nga di odyala apôtre ka? Nga boyènè Jésus Christ Mokonchi ma beni ka? Beni bodi odyala botoma ba nga o ch’a Mokonchi ka?

² Mo nga di odyala apôtre na bana baninga ka, nga di apôtre nyò na beni, tonga beni bodi ndembo a botoma b’apôtre ba nga o ch’a Mokonchi.

³ Iwò dyango nga yambole bakoncha bango badinge bochambe nga botote.

⁴ Banga bodi na chwa idya n’inywa twa?

⁵ Banga bodi odyala na chwa ilèngè na mwachi wango edi moto èchingane ko bana bapôtre bona ka, na ko banyango ba baphele ba Mokonchi na Céphas bona ka?

⁶ Edi ko banga na Barnabas phencha bodi odyala na chwa iphinchwiba o mochalo ka?

⁷ Ekiele mochalo o bita n’èwute nchoto a wikoncha nda? Moto aphike molange ma vigne n’adi odya mpuk’a mwango ka, nda? Nyò ebatele ikand’a banyama n’adi onywa mabele ma dyango ka, nda?

⁸ Nga di oloba mawò mango ko ekumb’a bato edi bona ka? Miyeko midi oloba elenge ko yango ka?

⁹ Tonga bakòtèki o miyeko ma Moïse bwe: ”Todiphake muna ma ngombo, wango edyate lòchò.” Nzambe awuye bangombo?

¹⁰ Wango adi oloba mawò mango machò tonga na banga ka? He, tonga na banga bakòtèki bwe: Koncha wango ekime, takima n’ichena, na koncha wango etoko lòchò, takiela botoma bwango n’ichena iyamba ik’a wango.

¹¹ Mo banga bophikaki beka b’èyaye na beni, mo banga botòlò beka ba beni ba che, ye elèki bokama?

¹² Mo bana baninga badi na chwa yango na beni, banga bodi olèka bango chwa yango ka? Ko, banga boch’onyakuza yango ka, banga bodikize ndèphe o beka bichò, ta eyeka nyò yò ewunduza mina minyòngò ma Christ.

¹³ Beni boyebe bwe, bakoncha bango bakiele mochalo o temple bayambe bekidya ba bango ba temple, na bokoncha bango bakiele mochalo o autel, bayambe ik’a bango a autel.

¹⁴ Mokonchi motindaki elenge ko yango bwe, bakoncha bango bachakole mina minyòngò talòngò na myango.

¹⁵ Ko, nga ch’onyakuza eyeka nyò yò kobona ka. Na nga bokòtè iwò dyango tonga bwe, beni bokielize nga kobona ka, tonga nga lèkaki edingele mòchi bowe ika dyango moto amiche botochibe ba nga bwabona.

¹⁶ Tonga mo nga chakole mina minyòngò, ye edi odyala botochibe ba nga ka, edi kokomo nga kiele kobona, mo ng’ochakola mina minyòngò ka, owana mokindo tophila nga.

¹⁷ Mo nga kiele kobona na bodingo ba motema, owana nga di n’iwuta, ko, mo nga kiele kobona odya na bodingo ba motema ka, nga di o mochalo mwango ko mobateli phencha bona.

¹⁸ Kobona iwut’a nga idi nde? O nga chakole mina minyòngò, nga tachakola mina minyòngò ma Christ bwabona, ta ng’anyakuza chwa yango nga di o ch’a mina minyòngò.

¹⁹ Nga chekwaki mokièlichi a bato bachò, nchene nga di mophinchwibaki na bachò, echoko nga tadwa ebuliki a bato bakama yango.

²⁰ Nga bèki o phanyak’a bajuif ko mojuif bona, tonga n’idwa bajuif, nga bèki phanyak’a bakoncha bango badi o ch’a miyeko, ko moto wango adi o ch’a miyeko bona, nchene nga di odyala o ch’a miyeko ka, ko, tonga n’idwa bakoncha bango badi o ch’a miyeko.

²¹ Nga bèki o phanyak’a bakoncha bango badi odyala na miyeko ka, ko koncha wango edi odyala na miyeko ka bona, nchene nga di odyala bwabona o miyeko ma Nzambe ka, ko, nga tulize nchoto o ch’a miyeko ma Christ, echoko nga tadwa bakoncha bango badi odyala na miyeko ka yango.

²² Nga bèki o phanyak’a baninga ba lèlèkè ko nga bèki na lèlèkè bona, echoko nga tadwa baninga ba lèlèkè yango. Nga chekwaki o elenge a nga echò, tonga na bato bachò, tonga n’iphakola bana baninga moto elenge elenge.

²³ Ko, nga kiele beka bichò tonga na mina minyòngò, echoko nga tadyala n’ik’a nga o ch’a myango yango.

²⁴ Beni bodi oyeba ka, bakoncha bango babangane o manè m’imèka mbangu, bango babangane bachò, ko, wona mo ayambe iwuta elòngò a balèki. Bobanganaka kot’èbangane, echoko beni toyamba dyango yango.

²⁵ Ko, moto ikika akole o ch’a mbangu akiènge nchoto o beka bichò, bakoncha bango bakiele kobona tonga n’iyamba ngula wango tibiki, ko, banga tonga n’iyamba ngula wango tebika.

²⁶ Echoko nga bangane bwe, ko edi odyala eyeka iphwa bona ka yango, ng’owucha ko koncha wango ewuche bwabona bona ka.

²⁷ Ko, nga chèbize nchoto a nga, na nga kiènge dyango, ta nga chakola bana baninga mawò na chima ngi koncha takondo o ch’a momeko.