1 Corinthien 7 - Mina ma Nzambe 1947

Paul aphè mateyo tonga na bolonga.

¹ Kinòwa nga chakole beni mawo tonga na mango beni bokotèki nga. Edi enyòngò na moto adyale olònga mwachi ka.

² Ko, tonga na bochembi edi enyòngò bole dyale na mwachi a wango na mwatò adyale na molomi a wango.

³ Molomi akielize mwachi a wango na beka byango bidi na wango, na mwachi a kielize molomi a wango elenge ko yango.

⁴ Mwachi adi okomanda nchoto a wango koncha ka, ekomande molomi elenge ko yango molomi adi okomanda nchoto a wango koncha ka, ekomande mwachi.

⁵ Mo beni bobochòchò enongo itika bokole bobiko bò ka, totonanake, echoko beni todwa bonyongo b’ichambela Nzambe yango, na chima bokolanaka dyòkò, ta Satana aphèphicha beni tonga na beni bokongaki manchoto.

⁶ Nga lobe mawò mango odya moyeko ka, edi mo ichimita.

⁷ Nga dingaki bwe, bato badyale ko nga bona, ko moto ikika abiyamba beka ba Nzambe bochònga, wona wango elenge, wona wango elenge.

⁸ Nga lobe na bandenga na bato ba bachani bwe, bango bakiele ekielele enyòngò mo bango babike o edyalele yango edi na nga.

⁹ Ko, mo bango badi oyicha bokiènge manchoto ka, tika bango balòngane, tonga bolònga boleki chululu a matoma mabe bonyòngò.

¹⁰ Ko, bakoncha bango babilòngana, nga tinde bango bwe‐ko, nga twa edi Mokonchi, mwachi tikakwi na molomi a wango.

¹¹ Ko, mo wango akakwe na molomi a wango tika wango adyale ndenga iyò wango alòngele na molomi a wango, na molomi tatonake mwachi a wango.

¹² O ma baninga bakbwi nga lobe bwe, odya Mokonchi ka. Mo manyango a bole ebati a Nzambe adi na mwachi, wango adi odyala mwan’a Nzambe ka, ko, wango adinge bodyale na molomi a wango, owana molomi tatonake wango.

¹³ Elenge ko yango mo wona mwachi adi na molomi, wango adi odyala mwan’a Nzambe ka, ko wango adinge bodyale na mwachi a wango owana wango tatonake molomi a wango.

¹⁴ Tonga bole bwango bodi odyala mwan’a Nzambe ka, bwango bodi bonyeki tonga na mwachi a bwango, na mwachi wango adi odyala mwan’a Nzambe ka, wango adi monyèki tonga na molomi a wango, okomo wango adi mwanyango a bole ebati a Nzambe, mo ebodyala kobona ka, ibe bana ba beni badi na mbindo, ko, kinòwa bango badi n’èchwa.

¹⁵ Ko, iwò akbwi, mo koncha wango edi odyala mwan’a Nzambe ka, adinge bokakwe, tika wango akakwe, mwanyango a bole nyò mwanyango a mwatò ebati a Nzambe badi odyala batamba edyalele yango ka.

¹⁶ Kò, mwachi k’oyebe bwe, mo kò tophakola molomi a ko? Nyò, kò molomi k’òyebe bwe, mo kò tophakola mwachi a kò?

¹⁷ Tika moto ikika atambole ko manè mango Mokonchi mochòchòki na wango, moto ikika och’edyalele yango Nzambe abwangaki wango.

¹⁸ Mo moto mò abwangibaki adi mokubibaki, tika wango adyale mokubibaki. Mo moto mò abwangibaki wango adi mophièphiè tika wango adyale mophièphiè.

¹⁹ Bokubibe bodi bwabona na miphièphiè midi bwabona, koncha ewoke miyeko ma Nzambe ewokele yango edi na motuva.

²⁰ Tika moto ikika abike o ch’e dyalele yango wango abeki o wango abwangibaki.

²¹ Mo k’èbibwangiba ko motamba bona, todyalake na kièlèlè tonga n’èdyalele yango, ko, mo k’oyiche bolangwe o ch’a botamba elèki bonyòngò, okielaka kobona.

²² Tonga motamba wango abibwangiba bwe, adyale o ch’a Mokonchi, wango adi chomi a Mokonchi, elenge ko yango koncha wango ebibwangiba wango adi mophinchwibaki ko motamb’a Christ bona.

²³ Beni bobichombiba na motuya mokuli, tochekwake batamba ba bato dyòkò.

²⁴ Banyango ba baphele b’èbati a Nzambe, tika moto ikika abike o bocho ba Nzambe o ch’edyalele yango wango abèki o wango abwangibaki.

²⁵ Chima ebati a bawoli ba batò, bango bachaka bandenga, nga di odyala na moyeko ma Mokonchi ka, ko, nga phè bango mo iteyo phencha, tonga n’èlumb’a Mokonchi nga di monyèki n’ichingiba na bato.

²⁶ Nga chimunye bwe, tonga na kièlèlè yango edi kinòwa, koncha wango ebike ko edyalele yango wango adi bona, wango akièle ekielele enyòngò.

²⁷ Mo k’òdi na mwachi toyengake bwe, bokakwe, mo k’òdi mwachi twa, toyengake mwachi.

²⁸ Mo k’òdinge bolònge, edi odyala machuma ka, nyò mowoli a mwatò mo wango alòngibe, edi odyala machuma ka. Ko, bakoncha bango tayamba chachela o manchoto ma bango, na nga lèki bodinge bochobe beni.

²⁹ Ko, banyango ba baphele ba nga b’èbati a Nzambe, nga lobe bwe: Bobiko bodi boki, echoko bakoncha bango badi na bachi tadyala ko bango badi bachi twa bona yango.

³⁰ Na bakoncha bango balele tadyala ko bango badi olela ka bona, na bakoncha bango bachange, tadyala ko bango badi ochanga ka bona, na bakoncha bango bachombe beka, tadyala ko bango badi oyicha bodyale na byango ka bona.

³¹ Na bakoncha bango banyakuche beka ba che, tadyala ko bango badi onyakucha byango ka bona, tonga beka ba che biya mpoli na bochukele ba byango.

³² Na nga dingaki bwe, beni bodyale baphinchwibaki niphanu. Koncha wango edi olònga ka, adi n’iphanu a beka byango bidi beka ba Mokonchi, ko wango tadyala monyèki na Mokonchi bona.

³³ Ko koncha wango ebichil’olònge adi n’iphanu a beka byango bidi beka ba che, ko wango tadyala monyeki na mwachi a wango bona.

³⁴ Na kobona motema ma wango modi mokabibaki. Na kachelage edi o phaynaka a mwatò wango edi na molomi na mowoli a mwatò wango echaka ndenga, koncha wango edi odyala na molomi ka, adi n’iphanu a beka byango bidi beka ba Mokonchi bwe, ko wango tadyala n’echwa na nchoto n’eyaye bona, ko koncha wango edi na molomi adi n’i phanu a beka byango bidi beka ba che, ko wango tadyala monyeki na molomi a wango bona.

³⁵ Nga lobe mawò mango tonga n’ikieliza beni edi odyala tonga n’itokiza beni o meya ka, ko, tonga n’ikieliza beni o matoma manyòngò, kobona beni tobika na ngingi o ch’a Mokonchi.

³⁶ Mo moto achimunye bwe, wango adi okiela nonyòngò na mwan’a mwatò a wango ka, o wango achil’okate n’adi molomi twa, mo edi kokomo wango alòngibe tika wango alòngize wango, edi odyala machuma ka, tika wango a lòngibe.

³⁷ Ko moto wango edi na motema ma ngingi, n’eyeka itomiza wango edi twa, ko, wango adi na nguli ikiela ko wango adinge bona, na wango achòchòki bwe, mwan’a mwatò a wango adyale ndenga, wango akiele ekielele enyòngò.

³⁸ Kobona, koncha wango elònge mwan’a mwatò a wango, akiele enyòngò, ko, koncha wango edi olòngiza mwan’a mwatò a wango ka, wango aleki bokiele ekielele enyòngò.

³⁹ Mwachi abikangiba na molomi a wango na moyeko o bobiko ba wango bocho, ko, o chima molomi a wango awaki, owana wango aya mophinchwibaki, chima wango ayiche bolòngibe na koncha wango, wango adinge, ko, o ch’a Mokonchi phencha.

⁴⁰ Ko nga chimunye bwe, mo wango adyale ndenga moni ma wango toleka, na nga dyòkò, nga chingane bwe, nga di n’Eyaye a Nzambe.