1 Corinthien 5 - Mina ma Nzambe 1947

Paul achakole ebuliki a Nzambe ekielele n’ènyèzèlè yango bango tanyèzama bakoncha bango badi o cha machuma.

¹ Chango edi bwe, bochembi bodi o phanyak’a beni, bochembi bwango bato bango bach’owoka mawò ma Nzambe ka badi ekumba ikiela twa, koncha ekwaki mwachi a chango a wango.

² Na beni bodi na nganga. Ebèki enyòngò mo beni bolelaki, tika koncha wango ekielaki botoma bwango amichibe o phanyak’a beni.

³ Nga di odyala na beni na nchoto ka, ko, nga di na beni n’èyaye, na nga chil’ochòchò ko nga bèki na beni ondo bona bwe,

⁴ koncha wango ekielaki botoma bwango, o kombo a Mokonchi Jésus o bèni bachò bokokane na beni, na biyaye ba bèni bichanganaki,

⁵ moto wo tayiliba o mabòkò ma Satana na nguli a Mokonchi ma bèni Jésus, tonga n’ichèbiza nchoto a wango, echoko eyaye a wango techungiba o bucha ba Mokonchi Jésus yango.

⁶ Botochibe ba beni bodi odyala bonyòngò ka. Beni bodi oyeba ka levain iki ichekole mapha machò na bokè?

⁷ Bomichaka levain ikale, echoko beni todyala mapha matemu yango, kobona beni bodi levain twa, tonga Mwan’a Gbata a Pâque abichil’obomibe, wango adi Christ.

⁸ Tika bèni bodye beka ba yenga monè ma Nzambe edi odya mapha ma levain mokale ka, nyò mapha ma levain m’èyubi n’ibèli ka, ko, o ch’a mapha mango madi levain twa, madi mapha ma chèchè na nènè.

⁹ Nga bikòtè o ma beni o ch’a mokanda bwe, todyalake kophay mò na baphele ba bochembi,

¹⁰ nga boloba tonga na baphele ba bochembi ba che ka, nyò bato banyimi, nyò bachangoli ba beka, nyò babinichi ba machana, tonga kobona ebèki kokomo beni bolangwaki o che.

¹¹ Ko, nga bikòtè ma beni bwe, todyalake kophay mò na moto wango atangibe mwan’a Nzambe, ko, wango adi moto a bochembi, nyò monyimi, nyò mobinichi a machana, nyò koncha wango edi na mbechi, nyò monywe a malèku, nyò mochangoli a beka, na todyake enongo yò na wango.

¹² Nga di n’iwò ichamba bato bango badi odyala bana ba Nzambe ka botote iphe? Beni bodi ochamba bato ba Nzambe botote ka?

¹³ Ko bakoncha bango badi odyala bana ba Nzambe ka, Nzambe tachamba bango botòtè. ”Bomichaka koncha wango edi n’ibèli o phanyak’a beni.”