1 Corinthien 13 - Mina ma Nzambe 1947

Elumba edi eyeka yango eleki matabichi machò bonè.

¹ Mo nga lobaki na malèmu ma bato na ma bangelo, ko, bodyala n’èlumba ka, nga bèki ko ikingo èdunga bona, nyò ko ilimba iwulibe bona.

² Mo nga di na mawò m’ilaka, mo nga yebe beka ba yiche bichò na bokièngu bocho, mo nga di n’èchingane echò ikumwiza makoli, ko, mo nga bodyala n’èlumba ka, ibe nga di bwabona.

³ Mo nga phanche beka ba nga bichò tonga n’idwa bekidya ba bayoko, mo nga yilelaki nchoto a nga tonga n’idika, ko, mo nga bodyala n’èlumba ka, ibe matoma mango madi bwabona.

⁴ Elumba edi na ndèphè na bonyòngò. Elumba edi odyala n’èyubi ka, elumba edi okondiza nchoto ka, yango edi nganga twa.

⁵ Yango edi okiela eyeka yango edi enyèki twa ka, elumba edi oyenga beka ba yango koncha ka, yango edi obèlè ka, yango edi mokanela tonga na botoma ba moyembwa twa.

⁶ Elumba edi moni o ch’a matoma mabè twa, ko, yango edi na moni ma yango o ch’a nènè.

⁷ Elumba edi na ndèphè o beka bichò, yango echingane beka bichò, yango echenize beka bichò, na yango edi n’ètungu o ch’a kièlèlè echò.

⁸ Elumba tichili biteneli, ko, matabichi m’ilaka mawò tachila, matabichi m’iloba bilobele byango bato badi oyeba ka tachila, na bokièngu tochila.

⁹ Tonga bokièngu ba banga bodi ekulu phencha, na mawò m’ilaka ma banga madi ekulu phencha.

¹⁰ Tonga o eyeka yango edi enyèki teya, owana eyeka yango edi ekulu techila.

¹¹ O nga bèki mwana nga lobaki ko mwana bona, nga chimunyaki ko mwana bona, nga chonginyaki ko mwana bona, ko, o chima nga bikata bole nga bichiliza edyalele a mwana.

¹² Kinòwa banga boyènè yuko ko o ch’a tatala bona, ko, bucha bwango banga toyènè mabocho, kinòwa banga boyebe ekulu phencha, bucha bwango banga toyeba kot’èyebele ko babimèchinya nga bona.

¹³ Kinòwa beka bichato bi tibika; echingane, ichena, n’èlumba, ko, o phanyak’a byango elumba elèki bonè.