1 Corinthien 12 - Mina ma Nzambe 1947

Matabichi m’Eyaye madi moto elenge elenge ko machò madi tina ko yò.

¹ Banyango ba baphele ba nga b’èbati a Nzambe nga di odinga bwe, beni bodyale bolèngi twa tonga na matabichi m’Eyaye ka.

² Beni oyebe bwe, o beni bobèki bato bango bach’owoka mawò ma Nzambe ka, beni bochimitaka bwe, bokambibe o machana m’ènguma.

³ Echoko nga dinge bochakole beni bwe, moto adi oyicha bolobe n’Eyaye a Nzambe bwe: ”Mokindo tophila Jésus, ka”, na moto nyò mò oyicha bolobe bwe: ”Jésus adi Mokonchi”, ka, ko, o ch’Eyaye Echwa phencha.

⁴ Matabichi ma grâce madi moto elenge elenge, ko, Eyaye edi ko yò phencha.

⁵ Matoma madi moto elenge elenge, ko, Mokonchi modi ko mò phencha.

⁶ Matoma machimube ma grâce madi moto elenge elenge, ko, Nzambe adi ko mò phencha, Koncha wango ekiele mochalo o ch’a beka bichò n’o ch’a bato bachò.

⁷ Ko, moto ikika ayambe matabichi m’Eyaye Echwa tonga n’itocha Nzambe.

⁸ Wona moto aphèbe mawò ma bokèngu n’Eyaye Echwa, wona moto aphèbe mawò ma bolèngi n’Eyaye ko yò,

⁹ wona moto aphèbe echingane n’Eyaye ko yò, wona moto aphèbe matabichi m’ibeliza bato n’Eyaye ko yò,

¹⁰ wona moto aphèbe matabichi m’ikiela matoma machimube ma nguli, wona moto alake mawò, wona moto achambe biyaye botòtè, wona moto alobe bilobele, byango bato badi oyeba ka, moto elenge elenge, wona moto achekwe andephelèti a bilobele byango.

¹¹ Ko, beka bicho bi ekiele Eyaye ko yò, ephè moto ikika ko yango edinge bona.

¹² Tonga ko nchoto idi ko dyò na dyango idi na bikiète bikama bona, ko, bikiète ba nchoto bichò byango bidi bikama bidi nchoto ko dyò, edi na Christ kobona dyòkò.

¹³ Tongo banga bachò boyinibaki o ch’Eyaye ko yò, tonga n’idyala nchoto ko dyò, nyò edyale bajuif, nyò edyale bagrec, nyò edyale batamba nyò edyale bachomi, bèni bachò bobinywa Eyaye ko yò.

¹⁴ Tonga nchoto idi odyala ikiète yò phencha ka, ko, dyango idi bikama.

¹⁵ Mo ekolo elobe bwe: ”Tonga nga di odyala ebòkò ka, nga di odyala eyek’a nchoto ka”, iwò twa yango edi eyek’a nchoto.

¹⁶ Mo itwe ilobe bwe: ”Tonga nga di odyala dichò ka, nga di odyala eyek’a nchoto ka”, iwò twa dyango idi eyek’a nchoto.

¹⁷ Mo nchoto ichò ibèki dichò, enongo iwoka ebidyala owè? Mo dyango ichò ibèki itwe enongo iwoka chòlò ebidyala owè?

¹⁸ Ko kinòwa Nzambe atikaki bikiètè ba nchoto bichò ko, wango adingaki bona.

¹⁹ Mo bikiètè bichò bibèki ko ikiètè ko yò, ibe nchoto ibidyala bwe?

²⁰ Ko, kinòwa bikiètè bikama bidi, ko, nchoto ko dyò.

²¹ Ko, dichò idi oyicha bolobe n’èbòkò bwe, ”nga di phocha ko twa ka”, nyò mutu modi oyicha bolobe na makolo bwe: ”Nga di phocha beni twa ka.”

²² Twa. Bikiètè ba nchoto byango bidi na lèlèkè, nchoto ilèki phocha byango.

²³ Na byango banga bochimunye bwe, biphè nchoto choni, banga bolèki ephelele byango botochibe, na bikiètè byango, banga bodi na choni tonga na byango, banga bolèki bochweze byango bilamba,

²⁴ ko, bina bikiètè bidi phocha byango twa. Ko, Nzambe koncha wango etonginyaki nchoto, aphèki ekiètè a lèlèkè echoko yango elèkaki botochibe,

²⁵ echoko kako tidyali o nchoto, ko, bikiètè bichò bidyale o kophay mo tonga n’iwuyana yango.

²⁶ Mo ekiètè yò echèbe, bina bikiètè bichò bitabinye dyango, na mo ekiètè yò eyambe botochibe, bina bikiètè bichò bichange na yango.

²⁷ Ko, kinòwa beni bodi nchoto a Christ, na beni bodi bikiètè ba wango, moto ikika enongo a wango.

²⁸ Nzambe atikaki o ebuliki bapôtre bocho, chima wango atikaki bana baninga badyale mibandi, na bana baninga wango atikaki badikichi na tonga n’ikiela matoma machimube ma nguli, na tonga n’idyala na matabichi m’ibeliza bato, nyò bakielichi ba bibonge, na badyale bakomandi, nyò balobe bilobele, byango bato badi oyeba ka moto elenge elenge.

²⁹ Bato bachò badi bapôtre? Bato bachò badi badikichi? Bato bachò bakiele matoma machimube ma nguli?

³⁰ Bato bachò badi na matabichi m’ibeliza bato? Bato bachò balobe bilobele byango bato badi oyeba ka? Bato bachò bayiche bochekole byango.

³¹ Ko, boyengaka boyambe matabichi ma grâce mango malèki mananè. Na kinòwa nga dinge bodikize beni manè mango malèki botochibe.