Hebriuthek 8 - Iwo Surua Mua Wie Pha Bible

Isu gethek ro Kho Phabi

¹ Zab gethek è nyie yao pha jine ji ro chiih-è hanyie yi hamangkhung hà Hamangkhung-aphuii ro so pha biang ro phazoi shii dug pha ji pha Kho Phabi um ro.

² Ai ne Bajo So ithua Kho Phabi duiine blia rek, ji ne, haliig sbhang nyie yi tharothamang wad è asi pha Ithong è ruii pha ji ro.

³ Zab kho phabi shii ne Hamangkhung-aphuii shii miiram zid phi pha chiih-è mizidthek phi pho ro chiih-è gethek ro Kho Phabi shii mizid pha ne nyie um chid.

⁴ Ai ne sohnyiak hà um arone ai ne phabi arey, nyieliieshii Jewish ro Iphey shii chid pha lasen phi pha ne phabithek um jong.

⁵ Phabithek duiine ithek è rek pha blia ne nui bie pha chiih-è hamangkhung hà nyie um pha ragia ji ro. Hì ne Moses rog shii um pha duiine ò ro. Ai è Shiinyie Haliig rab shii, Hamangkhung-aphuii è aishii yao, “Na è phiing shii nyie doh pha ji duiine zab rab bo.”

⁶ Jishii thuh, Hamangkhung-aphuii nane awairo bran shii shiinyie shii khriig wie rab pha duiine Isu shii phi pha phabi blia ne ithek è de boh ba ro, nyieliieshii hìne wie manathek pha sbangthek duiine rab ro.

⁷ Ibi pha shiinyie rog shii ichiig oi arone jihà ne din pha ji arab chid phro.

⁸ Jishii ai è yao shii, Hamangkhung-aphuii è ai bran rog shii ichiig doh, “Ithong è yao, gu è Israel pha bran rog nane Judah pha bran rog shii iwo shiinyie rab pha, inaithek ne thog sharuii ro.

⁹ Hì ne gu è ithek shii wad è noh ne ithek shii Egyph hà fuang noh pha inai shii gu è ithek ro blangthek shii rab pha shiinyie duiine asi phro. Ithek gu è ithek shii shiinyie shii migi arek ro, chiih-è ji è gu ithek shii agayiig ro.

¹⁰ Thuh, Ithong è yao, inai thog ruii shii Israel pha bran rog shii gu è rab pha shiinyie ne hì ro: Gu ne gui ro iphey ithek khani shii chab phi chiih-è ithek lubuthek shii zey phi pha ro. Gu ne ithek ro Hamangkhung-aphuii rey, chiih-è ithek ne gu bran rey ruii phro.

¹¹ ‘Ithong shii ìd bo ne’ Hanyie jia de awaithek iijiiak shii ayua sha phro awaithek ro hadung-haluiipho shii ayao sha phro, Chiih-è ìu de zabèboh de ithek ne zab gu shii thieg ruii phro.

¹² Gu ne ithek ro layog shii khung phi chiih-è awie pha ji shii khuchung de anow ruii phro.”

¹³ Shiinyie iwo ji è yao srane, Hamangkhung-aphuii è rab, igobi pha jine ihèg rab; chiih-è nyie ihèg rey srane ùb ne sand dun phro.